Irwan Prayitno: Gubernur Sumatra Barat

Dr. H. Irwan Prayitno M.Sc. Psikolog (lahia di Yogyakarta, Indonesia, 20 Desember 1963; umua 60 taun) adolah surang akademisi pandidikan jo politisi Indonesia. Baliau mamulai jabatan sabagai Gubernur Sumatera Barat periode kaduo pado 12 Februari 2016 sasudah mamanangan pamiliahan Gubernur Sumatera Barat. Sabalunnyo, liau duduak di Dewan Perwakilan Rakyat tigo periode sajak 1999 dari Partai Keadilan Sejahtera. Baliau tanamo sabagai pandiri Yayasan Pendidikan Adzkia, tatok maaja jo badakwah sapanjang kariernyo.

Irwan Prayitno

Biografi
Lahia	20 Desember 1963 (60 tahun (id) ) Yogyakarta
Gubernur Sumatra Barat (id)   12 Pebruari 2016 – 12 Pebruari 2021 Terpilih dalam (id) : Pemilihan umum Gubernur Sumatra Barat 2015 (id)   Gubernur Sumatra Barat (id)   15 Agustus 2010 – 15 Agustus 2015 Terpilih dalam (id) : Pemilihan umum Gubernur Sumatra Barat 2010 (id)   Anggota DPR-RI (id)   1r Oktober 2009 – 15 Agustus 2010 Daerah pemilihan (id) : Sumatra Barat I (id) Terpilih dalam (id) : Pemilihan umum legislatif Indonesia 2009 (id)   Anggota DPR-RI (id)   1r Oktober 2004 – 30 September 2009 Daerah pemilihan (id) : Sumatra Barat I (id) Terpilih dalam (id) : Pemilihan umum legislatif Indonesia 2004 (id)   Anggota DPR-RI (id)   1r Oktober 1999 – 30 September 2004 Daerah pemilihan (id) : Sumatra Barat I (id) Terpilih dalam (id) : Pemilihan umum legislatif Indonesia 1999 (id)
Data pribadi
Kalompok etnis	Urang Minangkabau
Agamo	Islam
Almamater	Universitas Putra Malaysia (id) . Doktor (id) (1996–2000) Universitas Putra Malaysia (id) . Magister (id) (1995–1996) Universitas Indonesia . sarjana (id) (1982–1988) SMA Negeri 3 Padang (1979–1982) SMP Negeri 1 Padang (1976–1979)
Kagiatan
Karajo	Akademisi
Pagawai	Universitas Adzkia (id) (2021–) Universitas Muhammadiyah Jakarta (id) (1999–) Universitas Andalas (1991–1995)
Partai politik	Partai Keadilan Sejahtera
Kaluarga
Pasangan hiduik	Nevi Zuairina (1985–)
Anak	Ibrahim Irwan Prayitno
Abak	Djamrul Djamal (id) , Sudarni Sayuti (id)
Sanak saibu/sabapak	Adib Alfikri (id) jo Khairul Ikhwan (id)
Kerabat (id)	Irfan Aulia Syaiful (id) (menantu (id) )
Laman web	Laman resmi (id)

Barasa dari kaluargo Minangkabau, Irwan manjalani pandidikan manangah di Padang. Baliau mangenal tarbiah jo tajun sabagai aktivis dakwah katiko bakampus di Fakultas Psikologi Universitas Indonesia pado 1982. Sasudah maninggaan status mahasiswa pado 1988, liau baliak ka Padang mandirian Yayasan Pendidikan Adzkia. Baliau sempat maambiak pakerjaan paruah wakatu di untuakan HRD (Human Resource Development) babagai parusahoan pamarentah jo dosen psikologi industri. Sairiang pangukuahan Partai Keadilan pado 20 Juli 1998, Irwan mambantuak jo mangatuoi parwakilan PK di Malaysia. PK maanta Irwan duduak di parlemen hasia pamiliahan umum 1999; Irwan taruih tapiliah untuak duo periode barikuiknyo. Sasudah manyalasaian pandidikan doktor, liau bauntuak tugeh sabagai guru basa bidang pangembangan SDM dan tatok badakwah.

Salaku kapalo daerah, liau mandapek sajumlah panghargaan dari negara. Ampek taun kapemimpinan Irwan ditandoi jo saketeknyo 137 panghargaan dari pamarentah nan diraiah Sumatera Barat. Salamo duduak di parlemen, liau mancurahan pandangannyo dalam panyusunan sajumlah RUU, tamasuak panggunoan sumber energi alternatif paneh bumi. Baliau dicatat karano kamampuan malobi jo panah manulak pamintaan untuak manjadi mantari. Irwan maju sebagai calon anggota Dewan Perwakilan Rakyat (DPR) malalui daerah pemilihan (Dapil) III Sumatera Utara.

Irwan Prayitno adolah anak partamo, punyo tigo adiak, dari orangtuo nan samo-samo dosen. Lahia di Yogyakarta pado 20 Desember 1963, liau mawarisi darah Minangkabau dari ayah Djamrul Djamal jo ibu Sudarni Sayuti. Ayahnyo barasa dari Simabur, Tanah Datar jo ibunyo adolah kalahiran Pauah IX — nan sacaro administratif masuak ka Kecamatan Kuranji, Padang. Mareka samo-samo lulusan PTAIN Yogyakarta jo dosen IAIN Imam Bonjol. Sabalun tingga di Padang, kaluarga ko sempat manetap di Semarang sampai Irwan baumua tigo taun, jo pindah ka Cirebon wakatu Irwan mamasuaki umua sakolah dasar. Irwan mudo isuak mandapekan kapicayoan masyarakaik Suku Tanjung sabagai pangulu Nagari Pauah IX jo manyematan gala Datuak Rajo Bandaro Basa pado 13 Februari 2005.

Irwan manjalani pandidikan manangah di Padang jo mulai bakacimpuang di organisasi sajak SMA, manjalani duo kali kapenguruihan OSIS pado taun kaduo jo katigo di SMA Negeri 3 Padang. Salamo di SMA, liau maraiah juaro partamo di kelasnyo jo salalu dipicayoan sabagai katua kelas. Irwan sempat bakainginan malanjuikan kuliah ka ITB basamo jo kawan-kawannyo. Tapi, dek mampunyoi masalah mato, liau mangaliahan piliahan ka Universitas Indonesia. Sasudah tamaik pado 1982, liau mandaftar ka Fakultas Psikologi Universitas Indonesia. Salamo kuliah, salain manyibukan diri jo babagai kagiatan kamahasiswaan, liau banyak mahabisan wakatu di lua kampus untuak badakwah, maaja di babarapo SMA swasta, jo manjadi konselor di bimbingan baraja Nurul Fikri. Iko mangakibatan kuliahnyo indak lancar. Tapi, manuruiknyo nan liau cari dalam pandidikan indaklah nilai samato, tapi pangambangan diri.

Wakatu mulai masuak paguruan tinggi, liau aktif dalam diskusi-diskusi dakwah jo pahimpunan mahasiswa. liau panah bagabuang jo Himpunan Mahasiswa Islam (HMI) Jakarta. Salamo katerlibatannyo jo HMI, liau marasoan gaya represif pamarentahan Soeharto tahadok pagerakan Islam. Pado 1984, liau naiak sabagai Katua HMI Komisariat Fakultas Psikologi UI. Tapi, sairiang intervensi pamarentah nan mamasoan panerapan Pancasila sabagai asas tungga, HMI mangganti asasnyo jo Pancasila pado taun 1986 jo basamoan jo itu Irwan kalua dari kaanggotaan HMI. Baliau maikuiki pagerakan Islam dalam skala nan labiah ketek, baraliah ka musajik di kampus-kampus lewaik kalompok-kalompok tarbiah nan labiah baorientasi pado pambinaan aqidah jo akhlaq. Aktivitas tarbiah bapusek di musajik-musajik kampus sarupo Musajik Arif Rahman Hakim, UI; Musajik Salman, ITB; jo Musajik Al-Ghifari, IPB.

Basamo kawan-kawannyo, Irwan ilia-mudiak maikuiki kagiatan halaqah atau lingkaran dakwah di Musajik Salaman. Pola latiahan dimulai jo pambentuakan kalompok ketek jo bimbiangan surang mentor sabagai panyampai tantang ajaran Islam. Pola iko dipakenalan dek sajumlah ustad jo paraja Indonesia lulusan Timua Tangah, marujuak pado garakan Ikhwanul Muslimin. Sasudah duo kali patamuan Forum Silaturahmi Lembaga Dakwah Kampus, liau talibat dalam sosialisasi patunjuak pajuangan LDK atau khittah, bakaliliang ka kota-kota di Sumatera Barat. Baliau bakenalan jo mandapeki mubalig mudo sarupo Mahyeldi Ansharullah, Marfendi, jo Rafdinal nan isuak talibat dalam kapenguruihan Partai Keadilan Sejahtera (PKS).

Pado taun 1985, dalam umua 22 taun, Irwan manikah jo Nevi Zuairina, mahasiswi UI nan ditamuinyo wakatu manjalani kuliah semester tigo. Basamo bininyo, Irwan manunaian dakwah jo aktif dalam kagiatan sosial kamasyarakatan. Baliau mangakhiri kuliahnyo sasudah anam taun jo IPK randah 2,02 karano harus mamuntuak wakatunyo untuak mancari napakah. Satamat kuliah, aktivitas dakwah mareka balanjuik jo mangambangan kagiatan dakwah di kampus Universitas Andalas jo IKIP Padang (kini Universitas Negeri Padang).

Berkas:Adzkia Padang.jpg

 

Kompleks paguruan Adzkia di Kuranji, Padang

Karano IPK randah, Irwan mamiliah indak malamar karajo di Jakarta. Baliau mamutuihan pulang ka Padang untuak badakwah jo malanjuikan maaja kursus. Sabalun maakhiri kuliahnyo, liau alah bapikia baa marintih yayasan nan bagerak di bidang pendidikan. Samulo, Irwan marintih kursus bimbiangan baraja Adzkia di Lolong pado 1987. Salain dirinyo, babarapo pandiri Adzkia adolah sakaligus guru di antaronyo Syukri Arief jo Mahyeldi Ansharullah. Pado 1988, kelas kursus bapindah ka Komplek PGAI, Jati. Bamulo dari kursus bimbiangan baraja, Irwan mambantuak Yayasan Pendidikan Adzkia nan sacaro batahap mawadahi taman kanak-kanak hinggo paguruan tinggi. Sacaro batahap sajak 1994, Adzkia mambukak janjang paguruan tinggi, salain taman kanak-kanak, sakolah dasar, sekolah manangah, dan sekolah kajuruan. Dalam pambinaan anak didiak, liau mancurahan ilmu psikologi nan ditimbonyo di bangku kuliah.

Pakambangan Yayasan Pendidikan Adzkia bapangaruah pado kamapanan hiduiknyo, mandorongnyo untuak malanjuikan pendidikan. Pado taun 1995, Irwan maambiak kuliah di Selangor, Malaysia sambia mambao sarato bini jo anaknyo. Tapi, karano IPK randah, lamarannyo sempat babarapo kali ditolak. Kawan sasamo aktivis dakwah di Selangor mampatamuannyo jo Pambantu Rektor UPM. Kapado Hasyim Hamzah, Irwan manyatoan kasanggupan manyalasaian studi dalam tigo semester. Baliau maambiak kuliah S-2 bidang pangambangan SDM (Human Resource Development) di Universitas Putra Malaysia (UPM), Selangor. Tamaik satu satangah taun labiah awal dari wakatu normal tigo taun pado 1996, liau malanjuikan kuliah S-3 di kampus nan samo.

Sahari-hari di Selangor, liau harus bakerja kareh maurus kaluarga. Maso itu, liau alah mamiliki limo anak. Jo bini, liau bauntuak tugas karano ndak ado pambantu. Irwan mangaku, di antari kagiatannyo, dirinyo hanyo mangalokasikan sakitar 10 sampai 20 parsen untuak kuliah. Kagiatan dakwahnyo tatap balanjuik, Bahkan, ia manunaian dakwah sampai ka London, Inggris jo harus mangarajoan tugas-tugas pakuliahan dalam pajalanan di dalam oto, pasawat, atau kareta api.

Wakatu dicalonan dek Partai Keadilan sabagai anggota legislatif DPR, Irwan tangah manyiapan ujian akhia S-3. Meski turun kampanye untuak daerah pamiliahan Kabupaten Tanah Datar pado pamiliahan umum legislatif Indonesia 1999, liau dapek marampuangkan kuliahnyo untuak gala Ph.D. jo IPK cumlaude 3,97 pado taun 2000. Baliak ka Indonesia, liau bauntuak tugas di legislatif jo kagiatannyo di bidang akademisi. Sajak taun 2003, liau maaja program pasca-sarjana di Universitas Muhammadiyah Jakarta jo dikukuahan sbagai guru basa pado 1 September 2008. Sampai liau manjadi Gubernur Sumatera Barat sajak 2010, liau masih manyempatan maaja 12 kali dalam ciek semester.

 

Dewan Pawakiaan Rakyaik

Malalui pasingguangannyo jo pagarakan tarbiah, liau manunjuakan paratiannyo dalam politik. Katiko pangukuahan pandirian Partai Keadilan padi 20 Juli 1998, Irwan ditunjuak sabagai Katua Pawakilan PK di Malaysia. Baliau dimintai kasediaan untuak dicalonan sabagai anggota legislatif dek PK mawakili daerah pamiliahan Tanah Datar. Hasia pamiliahan umum legislatif Indonesia 1999, PK hanyo mamparoleh 1,4 juta suaro atau 1,7% dari total pamiliah. PK manduduakan tujuah kader di DPR, tamasuak dirinyo. Basamo Partai Amanat Nasional nan mangumpuan 37 kurisi DPR, kaduo partai bagabuang mambantuak Fraksi Reformasi jo Hatta Rajasa sabagai katua jo Irwan Prayitno sabagai wakia. Fraksi maanta namo Irwan sabagai Katua Komisi VIII. Baliau mamimpin Komisi VIII nan di antaronyo mambidangi masalah energi jo sumber dayo mineral. Salama barado di DPR, Hatta mangaku fraksi liau adolah fraksi nan militan. AM Fatwa manyabuik Irwan satu-satunyo pimpinan komisi di DPR nan ndak tagantian salamo limo taun.

Manjalang 1 April 2000, pamarentah ampia mambalakuan kanaiakan tarif BBM. Susilo Bambang Yudhoyono nan wakatu tu manjabaik Mantari Patambangan, malam ari sabalun pangumuman kanaiakan BBM sempat manalepon Irwan, mananyoan tentang kasiapan kanaiakan BBM. "Ambo kecekan, kami di DPR alunbsiap ateh kanaiakan tu," tutua Irwan. Pado ari pangumuman 31 Maret 2000, Presiden Abdurrahman Wahid mamutuihan manundo rencana manaiakan harago BBM. Sasudah pambahasan jo DPR, pamarentah rasmi mambalakuan kanaiakan tarif BBM pado 1 Oktober 2000.

Wakatu pamarentah taruih mangurangi subsidi BBM sajak Oktober 2000, Irwan mausulan panggunoan energi paneh bumi sabagai energi alternatif jo mamulai pambahasan rancangan undang-undang malalui Komisi VIII. Manuruiknyo, pamakaian energi paneh bumi akan turuik mambantu pamarentah mandorong kamandirian panyadioan energi, tautamo malalui pambangkik listrik. "Panggunoan energi paneh bumi mamungkinan pamarentah indak tababani dek mato pitih asiang cando halnyo panyadioan BBM jo mahindari katagantuangan minyak dalam jangko panjang." Tapi, RUU samulo indak diliriak dek pamarentah, karano energi panehnbumi dianggap maha. Baliau taruih malobi eksekutif untuak maluluihan RUU, sampai akhianyo pamarentah mansahannyo manjadi UU Panas Bumi Nomor 27 taun 2003. Wakatu tu, undang-undang ko alun ditindaklanjuiki jo Paraturan Pamarentah.

Mamasuaki taun 2003, pamarentah maumuman kanaiakan TDL, tarif talepon, jo BBM sacaro sarantak. Fraksi Reformasi manyatoan dasakan pambatalan tigo agenda ko. Irwan bahkan mangancam akan kalua dari DPR basamo anam urang anggota Partai Keadilan lainnyo jiko kanaiakan tarif sarantak tatap dibalakuan. "Maingek masyarakaik indak mampu manangguang baban akibaik krisis, mako alternatif pambatalan adolah nan paliang tapek," tutua Irwan. Dalam wawancaro jo Republika, Irwan manyatoan kakecewaannyo ateh tanggapan pamarentah nan mangasanan saolah-olah pambalakuan kanaiakan alah disatujui dewan. "Indakkan manyatujuinyo, mambahasnyo se indak. Kito ndak panah diajak mambahas tantang kanaiakan harago BBM jo bilo kaputusan kanaiakan tu bisa ditarapan. Jaleh masyarakaik didutoi," ujanyo. Walaupun PK indak manarik anggotanyo dari parlemen, pamarentah marespon jo indak jadi manaiakan TDL jo tarif talepon. Takaik ancamannyo, Irwan manyabuiknyo sabagai pambarajaan untuak politisi sakaligus kader. "Apobilo kito alah indak sanggup lai untuak manjago amanah jo aspirasi rakyaik lah ndak dapek didanga lai mako alah sapantasnyolah kito kalua dari DPR."

Pado pamiliahan umum legislatif April 2004, liau diusaung partai nan alah baganti namo PKS sabagai calon anggota legislatif DPR. Daerah pamiliahan Sumatera Barat mangiriman duo wakia ka DPR dari PKS, dirinyo jo Refrizal. Pado periode keduonyo di DPR, liau baliak mangatuai komisi nan samo sampai 2005 sabalun bapindah komisi jo diangkek sabagai Katua Komisi X sajak 2007. Sasudah mamimpin komisi nan mambidangi masalah pendidikan, liau bahadapan jo pamarentah dalam evaluasi palaksanaan UN. Baliau mangkritik palaksanaan UN bilo sabatas syaraik panantu kaluluihan siswa, bapandapek baso hasia UN mustinya dapek digunoan untuak masuak paguruan tinggi. Baliau mausulan palaksanaan SPMB untuak manjariang mahasiswa bebas biayo. Irwan panah bapandapek palaksanaan panarimoan mahasiswa harus ditangani otonom dek tiok-tiok paguruan tinggi.

Dalam pamiliahan umum 2009, Irwan jo Refrizal tapilaih baliak mawakili Sumatera Barat. Irwan ndak manyalasaian periode katigonyo sasudah maju sabagai Gubernur Sumatera Barat; Sidi Hermanto maisi PAW.

Partai Keadilan Sejahtera

Sasudah Megawati Soekarnoputri dilantiak sabagai presiden, PK mamintak kasadioan Hamzah Haz dicalonan sabagai wakia presiden, mandaului sikap rasmi PPP. Dalam upayo mamparoleh dukuangan dari parlemen untuak mendukuang Hamzah, Irwan makobi tokoh-tokoh kunci dari fraksinya saperti Amien Rais, AM Fatwa, jo Hatta Rajasa. Irwan bahkan maancam akan kalua dari fraksi jiko fraksi indak mandukuang Hamzah Haz. Basamoan jo naiaknyo Hamzah Haz, Megawati mangangkek babarapo anggota lintas fraksi sabagai mantari. Baliau ditawari jabatan Manristek, tapi ateh patimbangan partai liau menolak. Jabatan ko dialiahan ka Hatta Rajasa, rakan safraksi jo sakomisi Irwan.

Manjalang pamiliahan umum Presiden Indonesia 2004, Irwan nan sajak awa maarahan dukuangannya ka Amien Rais ditunjuak dek partai untuak manjalin mitra koalisi jo Amien. Irwan sakaligus mangemban misi mamanangan Amien Rais di Sumatera Barat. Amien mandapek dukuangan mayoritas di Sumatera Barat, tapi sacaro nasional kalah parolehan suaro jo gagal masuak ka pamiliahan presiden putaan kaduo. Manjalang pamiliahan presiden putaan kaduo, Irwan mayakinan PKS untuak mandukuang Susilo Bambang Yudhoyono. Dalam pamarentahan, Irwan jo SBY alah manjalin hubuangan dalam kapasitas Irwan sabagai Katua Komisi VIII jo SBY sabagai Mantamben. Hasia rekapitulasi suaro, SBY mandapek dukuangan bulek 84,4% dari Sumatera Barat. Wakia presiden tapiliah Jusuf Kalla manutuan, SBY sempat maarokan Irwan turuik mampakuek kabinet satlah pamiliahan umum Presiden Indonesia 2004, tapi liau labiah mamiliah bakonsentrasi di DPR.

Dalam pamiliahan pimpinan MPR, Irwan Prayitno baparan manaiakan Hidayat Nur Wahid manjadi Katuo MPR. Namo Irwan labiah dulu mangapuang sabagai calon Katua MPR, tapi Irwan manulak pancalonannyo. Baliau talibat dalam panyusunan paraturan tato tartib MPR, mausulan calon nan tampil indak sacaro individu tapi sacaro paket jo komposisi 2-2, duo dari DPR jo duo dari DPD. Koalisi tampek PK bagabuang rasmi mausulan paket Hidayat didampingi tigo urang calon wakia katua, iyolah AM Fatwa, Aksa Mahmud, dan Mooryati Soedibyo. Wakatu itu, liau ditunjuak untuak meamimpin lobi ka kasado partai untuak mandukuang Hidayat. Hidayat tapiliah sasudah mandapek 326 suara, babeda duo angko jo paket dari koalisi nan mangusuan Sutjipto.

Pencalonan gubernur

 

Irwan Prayitno panah maju sabagai calon Gubernur Sumatera Barat pado pamiliahan umum Gubernur Sumatera Barat 2005. Sairiang jo pancalonannyo, liau maninggaan jabatan kapartaian. Irwan maju didampiangi Ikasuma Hamid jo dukuangan parlemen dari PKS jo Partai Bintang Reformasi. Ikasuma Hamid adolah mantan Bupati Tanah Datar duo periode. Irwan nan katiko tu baumua 41 taun basaiang jo Jeffrie Geovanie nan labiah mudo ampek taun jo Gamawan Fauzi nan baumua 46 taun. Dalam pamiliahan nan diikuiki limo kandidat calon, Irwan basamo pasangannyo tacatat mamparoleh 25,11% suaro. Hasia rekapitulasi suaro manunjuakan kamanangan Gamawan Fauzi, Irwan Prayitno di uruikan kaduo, jo Jeffrie Geovanie di uruikan katigo.

Meski mamparoleh suara di bawah gubernur tapiliah Gamawan Fauzi, Irwan samulo indak barencana maju baliak dalam pamiliahan umum Gubernur Sumatera Barat 2010. Inyo mendadak dimintai DPP PKS untuak maju, duo hari sabalun hari tarakhia pendaftaran. Irwan mangaku sempat berang karano sabalunnyo PKS alah manyiapan kadernyo nan Wakil Ketua DPRD Sumatera Barat Trinda Farhan Satria. Sasudah babarapo kali panolakan, DPW PKS Sumatera Barat tibo mamintak langsuang pado Irwan ka Jakarta. "Tetap ambo tolak, karano partai wakatu tu hanyo mamarentahan ambo manjadi dubes. Ambo pindah ka Komisi I wakatu tu untuak pasiapan dubes," sabuik Irwan sangkek kalua barito KlikSumbar.

Sabalunnyo, PKS barencana mausuang Trinda Farhan Satria jo alah gencar manyosialisasian sabagai calon wakia gubernur, tapi uruang karano ndak kunjuang mandapekan mitra koalisi. Irwan akhianyo manyatoaan maju dalam pamiliahan sabagai calon Gubernur Sumatera Barat sasudah DPP PKS mamintak kasadioannyo dicalonan baliak. Jo dukuangan PKS, PBR, jo Hanura, Irwan maju basamo pasangannyo Muslim Kasim nan mantan Bupati Padang Pariaman duo periode. Irwan nan tibo di Padang pado sore hari tarakhia pendaftaran, 8 April 2010, basamo Muslim mendaftar ka kantua Komisi Pemilihan Umum (KPU) Sumatera Barat, 50 minik jelang berakhirnya maso pendaftaran. Dalam pamiliahan umum 2010, Irwan basaiang basamo Dr. Ediwarman, M.Hum. jo Dr. H. Marlis Rahman, M.Sc. nan balata akademisi, Dr. Fauzi Bahar, MSi nan katiko tu Wali Kota Padang, jo surang ekonom Endang Irzal, MBA.

Irwan rasmi ditatapan sabagai gubernur tapiliah sasudah maraup 32,44% suaro. liau tacatat sabagai Gubernur Sumatera Barat patamo nan barasa dari partai politik. Basamo wakianya Muslim Kasim, Irwan dilantiak sabagai Gubernur Sumatera Barat pado Minggu, 15 Agustus 2010 dek Mantari Dalam Nagari Gamawan Fauzi ateh namo Presiden RI. Palantiakan balangsuang di bakeh ruangan garasi oto DPRD Sumatera Barat karano gaduang utamo rusak barek akibaik gampo.

Irwan dilantiak sabagai gubernur pado 15 Agustus 2010, kurang dari sabaleh bulan sasudah gampo bumi mangguncang Sumatera Barat. Palantiakan gubernur jo wakil gubernur tapiliah balangsuang di ruang garasi DPRD Sumatera Barat. Manjalani periode partamo, Irwan mamimpin panataan provinsi nan porak-porando pasca-bancano, mambangkikan baliak parekonomian Sumatera Barat nan patumbuahannyo hanyo ampek persen pado 2009.

Pado 2011, Badan Nasional Pananggulangan Bancano (BNPB) maagiahan pangharagoan "tabaiak" ateh palaksanaan tanggap daruraik nan dilakuan pamarentah provinsi. Malalui kabijakan Irwan, rehabilitasi jo rekonstruksi tahadok rumah panduduak jo fasilitas publik mandapek prioritas dari pambangunan gaduang pamarentahan. Tigo taun sasudah bancano, sabanyak 197.636 rumah panduduak nan rusak alah direhabilitasi jo direkonstruksi sahinggo, BNPB pado 2013 maagiahan pangharagoan rehabilitasi jo rekonstruksi "tacapek" kapado pamarentah provinsi.

Salamo periode partamo kapamimpinannyo, Irwan manjadian rumah dinasnyo sabagai kantua. Irwan mangaku, pasca-gampo banyak SKPD bakantua samantaro di ruang darurat jo batumpuak pado ciek.ruangan. Wakatu kantua baru untuak gubernur siap ditampeki pado akhia 2013, Irwan mangaliahan panggunoannyo untuak SKPD nan masih basampik-sampikan bakantua di aula Gubernuran. Pambangunan gaduang pamarentahan baru dimulai pado 2013, samantaro paelokan kantua gubernur lamo manyusua pado akhia 2014. Wakatu mamasuki periode kaduo manjabaik gubernur, Irwan masih alun manampeki kantua rasmi, manunggu retrofit kantua gubernur lamo salasai.

Harian lokal Padang Ekspres dalam edisinyo 15 Agustus 2014 mandaftaran saketeknyo 137 pangharagoan nan diraiah ateh namo Pamarentah Provinsi Sumatera Barat ampek taun taakhia. Sajumlah pangharagoan untuak taun 2013 diagiahan tapisah sapanjang semester partamo 2014. Pado 13 Mei 2014, Sumatera Barat manarimo opini Wajar Tanpo Pangacualian (WTP) dari BPK tahadap Laporan Kauangan Pamarentah Daerah (LKPD) Sumatera Barat 2013. Iko adolah untuak kali kaduo sasudah LKPD taun sabalunnyo mandapek opini sarupo. Pado 24 Pebruari 2014, pamarentah manyarahan pangharagoan Tim Evaluasi jo Pangawasan Panyerapan Anggaran. Jo prediket mamuehan tigo, capaian realisasi kauangan Sumatera Barat manduduaki paringkek ka-6 nasional. Dalam palaksanaan APBD 2013, realisasi anggaran mancapai 98,92% dari target Rp3,182 triliun, samantaro serapan PAD malabiahi target, 102,42% iyolah Rp1,366 triliun dari target Rp1,334 triliun.

Dalam bidang infrstruktur, Mantari PU Djoko Kirmanto panah mangatoan infrastuktur di Sumatera Barat tabaiak dibandiangan provinsi lain di Indonesia. Data taun 2013 mangungkapan kamantapan jalan nasional manyantuah angko 95,32%, capaian layanan aia minum mancapai 62,52%, jo jangkauan layanan sanitasi pamukiman 45,58%. Dari Kamantarian Sosial, Sumatera Barat manarimo pangharagoan Piagam Kasatiokawanan Sosial ateh implementasi program panyalanggaroan kasajahteraan sosial pado 7 Maret 2014. Parsentase angko kamiskinan taruih turun sajak 2010 dari angko 9,5% manjadi 7,5% pado 2013. Angko Indeks Pambangunan Manusia provinsi adolah 74,70 atau manduduaki paringkek ka-9 nasional. Dari Kamantarian Parindustrian, pamarentah manyarahan pangharagoan paringkek kaduo nasional dalam paningkekan panggunaloan produksi dalam nagari pado Oktober 2014.

Pado 18 Juli 2014, Sumatera Barat mandapek predikat tabaiak nasional jo nilai tatinggi dalam kapatuahan taadok UU Nomor 25 taun 2009 tantang "Palayanan Publik" dari Ombudsman RI. Pangharagoan ditarimo Gubernur Irwan Prayitno dari Menko Polhukam Djoko Suyanto di Jakarta. Katua Ombudsman Danang Girindrawardana alah manyampaian hasia panilaian wakatu manamui Irwan di Gubernuran pado 15 Mei 2014. Irwan salaku kapalo daerah dinilai mamiliki respon jo komitmen mawujudkan kabutuahan jo sistem palayanan publik sasuai UU. Sabalunnyo, Badan Kapagawaian Nagaro mamasuakan Sumatera Barat sabagai provinsi tabaiak dalam palaksanaan panarimoan CPNS 2013 jo sistem Computer Assisted Test (CAT).

Dari Kamantarian Pariwisata, Sumatera Barat manarimo pangharagoan tatinggi di bidang kapariwisataan The Most Improved Travel Culb Tourism Award pado 20 Nopember 2014. Sabalunnyo, Sumatera Barat maraiah salah satu kategori pangharagoan National Procurement Award 2014 dari Kamantarian Parencanaan Pambangunan Nasional ateh paran LPSE provinsi. Pado 8 Desember 2014, Mantari Kabudayaan Pandidikan Dasa jo Manangah Anies Baswedan maagiahan pangharagoan Inklusif Award 2014 ateh implementasi pandidikan inklusif di daerah-daerah Sumatera Barat. Pado 10 Desember, Mantari Padagangan Rachmat Gobel manyarahan piagam pangharagoan ateh paran sarto Sumatera Barat dalam mandukuang kagiatan Pambantuakan Daerah Tertib Ukua jo Pasa Tertib Ukua.

 

Salaku gubernur, Irwan baperan maningkekan koordinasi antaro pamarentah daerah jo malobi pamarentah pusek untuak mandapekan dukuangan anggaran. Dalam rapek koordinasi kapalo daerah sa-Sumatera Barat pado 3 Maret 2014, mangapuang pamintaan anggaran Rp8,8 triliun kapado pamarentah pusek untuak palaksanaan pambangunan prioritas di Sumatera Barat. Sasudah rapek basamo Kamantarian PU pado 6 Mei 2014, Mantari PU Djoko Kirmanto manyetujui alokasi anggaran untuak pacapekan pambangunan infrastruktur. Malalui Kamantarian PU, pamarentah mangucuaan sagadang Rp3 triliun salamo tigo taun anggaran 2014–2016 untuak pacepekan pambangunan infrastruktur di Sumatera Barat.

Salain manarimo sajumlah pangharagoan untuak provinsi, Irwan mandapekan pangharagoan dek nagara salaku kapalo daerah. Pado 12 Oktober 2012, Irwan manarimo pangharagoan Prabawa dari Kamantarian Energi jo Sumber Dayo Mineral ateh paratian jo komitmennyo dalam pangambangan potensi EBT. Panah manangani masalah energi jo sumber dayo mineral sangkek di DPR, Irwan manaruah paratian tahadok pangambangan energi baru tabaruan sabagai sumber energi alternatif untuak pambangunan listrik di Sumatera Barat. Dalam upayo pacapekan pambadayoan energi paneh bumi, liau salaku kapalo daerah manjalin karajo samo jo babarapo nagara untuak mandatangan investor, mamfasilitasi inventarisasi potensi EBT, panalitian, jo promosi. Salain mengantar kabijakan pamanfatan EBT kapado legislatif Sumatera Barat, inyo mandorong kapalo daerah mangambangkan EBT sacaro otonom. Wakatu iko , Sumatera Barat mamiliki unit pelayanan terpadu satu pintu untuak mempermudah perizinan investasi. Berkaitan jo pengelolaan paneh bumi, Sumatera Barat mamiliki Perda Nomor 7 Taun 2012, diikuti payuang hukum penyediaan tenaga listrik dalam Perda Nomor 2 taun 2013.

Pado 29 November 2013, Irwan manarimo  Panghargaan Adhikarya Pangan Nusantara, penghargaan tatinggi dari Dewan  Katahanan Pangan Nasional. Dalam mancapai ketahanan pangan, babarapo program-program nan dijalankan Irwan diantaronyo peningkatkan jam kerja petani jo menambah cabang usaha. Keberagaman pangan Sumatera Barat mencatatkan skor Pola Pangan Harapan (PPH) nan mancapai 77,50. Dari Perpustakaan Nasional, Irwan maraiah penghargaan Nugra Jasadarma Pustaloka pado 29 Oktober 2013. Inyo dianggap mambarian porsi labiah tahadok minat baca, malalui upayanya mencarikan gedung pengganti perpustakaan daerah nan hancua pascagempa. Pado 27 November 2013, Irwan manarimo penghargaan dari Mantari Perdagangan Gita Wirjawan selaku kapalo daerah ateh paratian dan kapadulian tahadok palinduangan konsumen. Pado pengujung taun 2014, Kemantarian Pemberdayaan Perempuan dan Perlindungan menetapkan Anugerah Parahita Ekapraya (APE) 2014 kapado Gubernur Sumatera Barat. 

Gaya kapamimpinan

 

Irwan mamintak sia se untuak indak mamaso dirinyo barubah sasuai katantuan protokoler. "Jan paso ambo maubah style hiduik ambo, karano untuak ambo fasilitas jabatan apo pun adolah sunah, kawanangan justru suatu kawajiban untuak ambo," katonyo. Katimbang manggunoan anggaran nan tasadio, Irwan mangoptimalan panggunoan fasilitas nan alah ado. Baliau manulak masuakan untuak mambali oto dinas baru jo masih manampeki rumah dinas lamo. Kutiko disodori alasan manutuik malu kapado mantari atau pajabaik nagaro lainnyo nan tibo bakunjuang, Irwan labiah mamiliah manggunoan oto pribadinyo untuak dijadian oto pelat sirah . Wakatu rekonstruksi kantua pamarentahan nan rusak akibaik gampo bumi 30 September 2009, sempat dianggaran pambangunan kantua.baru untuak gubernur. Tapi, Irwan mangaliahan panggunoannyo untuak tigo SKPD nan kantuanyo rusak, mamiliah bakantua manampeki rumah dinas lamo di Jalan Sudirman.

Pado 22 Januari 2014, saurang mahasiswa jo pisau tahunus mamasuaki Kantua Gubernur Sumatera Barat, mangancam ka mambunuah gubernur. Lupuik dari panjagoan Satpol PP nan batugas, mahasiswa nan balakangan dikatahui lulusan ITB sempat naiak ka lantai duo gaduang sambia mamakiak-makiak sabalun kalua maninggaan laman gaduang jo mangandarai oto. Sasudah pamaresoan dek kapolisian saminggu barikuiknyo, palaku disarahan kapado kaluargo untuak pananganan medis karano tabukti maidok gangguan jiwa. Takaik kajadian iko, Irwan badaliah, "Pangawalan di kantua gubernur jo di rumah dinas gubernur memang sangajo ambo buek minimalis jo minim protokoler." Tapi, tujuah anggota Satpol PP nan batugas pado hari kajadian tatap diagiahan sanksi ateh kalalaian dalam manjalankan tugas. 

Dalam malakukan pajalanan ka lua provinsi, Irwan ndak panah mamiliah maskapai panabangan. Baliau salalu mamiliah jo maraso nyaman duduak di kelas ekonomi. Panyaia Taufiq Ismail, nan panah mandapeki Irwan sapesawat di kelas ekonomi, manilainyo sabagai hal istimewa jo sabuah kataladanan. Takaik panampilannyo nan sadarano, tanpo atribut jo minim protokoler, Irwan mangatoan liau ndak nio ado pambateh antaro dirinyo jo masyarakaik.

Yongki Salmeno nan dakek jo Irwan Prayitno, manulihan pangalamannyo basamo Irwan. Baliau mnadapeki karakter Irwan nan nio serba capek jo tapek wakatu. Satiok malakuan kunjunagan ka daerah, rombongan gubernur nyaris malaju jo kacapekan tinggi. Yongki mandapekan sajumlah SKPD bausaho mailak ikuik iring-iringan kandaroan gubernur karano ndak siap nyali. Irwan baprinsip, labiah rancak liau tibo duluan daripadi talambaek. Dalam kota, liau manulak manggunoan oto pangawalan, kscuali dalam kaadaan mandasak. "Sering bana pamiliak acaro masih manunggu-nunggu kadatangan gubernur jo msnyimak rauangan sirine oto pangawalan. Tanyato sirine tu nfak panah tadanga, gubernur alah tibo tapek wakatu tanpo pangawalan jo malah alah duduak basamo mareka," tulih Yongki. Atribut gubernur nan biaso dipasang di dado kida dek gubernur atau pajabat pado umumnyo nyaris ndak panah dipakainyo.

Irwan tatap manunaikan dakwah salamo manjabat sabagai gubernur. Duo kali sabulan satiok Jumat pagi, liau mengisi wirid mingguannan diikuiki jajaran pagawai Pemprov Sumatera Barat. Kagiatan wirid dipusekan di Musajik Rayo Sumatera Barat sajak awal taun 2012, walaupu wakatu itu panggunoan musajik alun dirasmian. Salamo Juni jo bulan Ramadhan 2014, liau maisi tausiah dalam kunjuangan ka instansi-instansi pamarintah.

Irwan mamanfaatan siso wakatunyo untuak kaluarga jo olahraga. Irwan adolah panyuko olahraga badminton, karate, jp trabas. Wakatu senggangnyo kadang liau manfaatan untuak bamain musik. Baliau mangaku dapek banyanyi sajak taun 2012. "Karano sabagai gubernur acok ditodong untuak manyanyi, akhianyo ambo baraja manyanyi." Pado Ramadhan 2013, liau manciptaan lagu bajudul "Kau Istriku" jo maunggahnyo malalui akun rasmi di YouTube. "Ambo mancaliak di Gubernuran banyak alat musik paninggalan gubernur sabalunnyo, akhianyo ambo manfaatan untuak cubo latiahan. Padahal, sabelunnyo ambo alun panah baraja not balok, tanggi nada jo sabagainyo," katonyo mangungkapan awal katertarikannyo bamain musik. Irwan alah mandaftarkan duo lagu ciptaannyo, ciek lai bajudul "kapado-Mu", ka Kanwil Kementrian Hukum jo HAM Sumatera Barat.

Kontroversi

 

Pado awal November 2010, Irwan salaku Gubernur Sumatera Barat mamanuahi undangan KBRI di Berlin untuak tampil sabagai pambicara memaparan potensi investasi Indonesia dalam forum paringatan hubungan bilateral kaduo nagara. Pado wakatu nan samo, maso tanggap darurat tsunami Mentawai masih balangsaung. Tsunami menarajang Kapulauan Mentawai mabyusua gampo bumi nan bapusek di lapeh pantai Sumatera Barat pado 25 Oktober 2010. Media nasional sagiro maangkek opini takaik kabarangkatan Irwan. Situs barito Kompas manurunan judul "Warganyo Kalaparan, Gubernur ka Jerman". Tempo mangutip pendapek pangamat politik Burhanuddin Muhtadi nan mangatoan Gubernur Sumatera Barat alah mati raso. Anggota DPR Budiman Sudjatmiko mangomentari, indak pas saurang kapalo daerah maninggaan daerahnyo nan sadang dilanda bancano.

Sabelun kabarangkatannyo, Irwan bolak-baliak ka Mentawai mamimpin pananggulangan bancano jo sempat bamalam tigo hari di pangungsian. Dalam lawatan satu satangah hari 4–5 November, Irwan manyempatan mananottangani kasapakatan karajo samo dalam bidang investasi, khususnyo di sektor pariwisata jo energi tabaruan jo Pemerintah Bavaria. Irwan baliak ka Mentawai hari nan samo sasudah mandaraik di Padang. Koran Tempo manurunan barito "Setelah Dikecam, Irwan Prayitno ka Mentawai". Anggota DPR lainnyo Nudirman Munir manilai pambaritoan ateh Irwan balabiahan. "Pak Gubernur tigo malam di Mentawai ndak disabuik-sabuik." Mananggapi kritik ateh dirinyo, Irwan mamintak maaf, mangatoan bahwa rancano lawatannya ka Jerman alah diasiapan jauah sabalun tsunami Mentawai.

Salamo manjabat gubernur, Irwan berkantua di rumah dinas. Irwan mangaku, pambangunan rumah panduduak jo fasilitas publik labiah prioritas dari pambangunan gaduang pamarintahan. Pambangunan baliak kantua dinas provinsi nan rusak parah mulai dikarajoan pado 2013, samantaro retrofit kantua gubernur baru dimulai pado akhia 2014. Hal iko mandapek sorotan media manjalang pamiliahan gubernur 2015, mamunculan tajuk "Irwan ndak panah ngantor". Renovasi kantua gubernur surang baru dimulai pado akhia 2014.

Sampai taun 2013, Irwan alah marampuangan 34 judul buku jo saketeknyo 25 riset. Pado pangujuang taun, liau manerbitan buku bajudul Inspirasi Untuk Negeri. 116 labiah artikelnyo dipublikasian di babagai media massa. Mamiliki rekam jajak sabagai aktivis dakwah jo latar pandidikan psikologi, karya-karyanyo maliputi tema pamasalahan anak jo kaluarga, manajemen SDM, politik, jo dakwah. Karya-karyanyo banyak manjadi rujuakan aktivis pagerakan Islam di babagai paguruan tinggi umum Indonesia. Pado 11 November 2015, duo buku baisi kumpulan tulisan wartawan media lokal jo nasional tantang kapamimpinan Irwan diluncuran. Pado 12 Februari 2017, liau maluncuran ampek jilid buku batajuk Pantun Spontan baisi 8.288 pantun. Babarapo buku nan liau tulih sabalunnyo antaro lain:

• Inspirasi Untuk Negeri (2013)
• Pemikiran Menuju Masyarakat Madani (2005)
• Anakku Penyejuk Hatiku (2004)
• Pemuda Islam Generasi Penerus (2003)
• Wanita Islam Perubah Bangsa (2003)
• Kepribadian Muslim (2003)
• Mengkritisi Kebijakan Pemerintah (2003)
• Dai di Tengah Kegalauan Politik (2003)
• Dilema Kebijakan Energi (2003)
• Kepribadian Dai (2002)

Katarangan

Rujuakan

https://pemilu.tempo.co/read/1752763/eks-gubernur-sumbar-irwan-prayitno-maju-pileg-2024-lewat-dapil-iii-sumatera-utara

Sumber buku

• Hepi Andi Bastoni (2006). Penjaga Nurani Dewan. Pustaka al-Bustan. ISBN 979-25-3600-0
• Irwan Prayitno (2003). Dai di Tengah Kegalauan Politik. Jakarta: Pustaka Tarbiatuna. ISBN 979-3375-80-9.
• Irwan Prayitno (2003). Dilema Kebijakan Energi. Jakarta: Pustaka Tarbiatuna. ISBN 979-3375-80-9.

• Buku Seri Pandidikan Islam

1. Ma’na Asy-Syahaadatain
2. Ma’rifatullaah
3. Ma’rifah Ar-Rasuul
4. Ma’rifah Al-Islaam
5. Ma’rifah Al-Insaan
6. Ma’rifah Al-Qur’aan
7. Al-Ghazw Al-Fikri
8. Hizb Asy-Syaithaan
9. Qadhaayaa Ad-Da’wah/Al-Ummah
10. Al Haq Wa Al-Baathil
11. Takwiin Al-Ummah
12. At-Tarbiyah al-Islaamiyah Al-Harakiyah
13. Fiqh Ad-Da’wah
14. Membentuk Kepribadian Muslim
15. Kepribadian Muslim
16. Kepribadian Dai

• Buku Seri Pandidikan Anak

1. Ajaklah Anak Bicara
2. Maso Anak Marah
3. 24 Jam Bersama Anak
4. Membangun Potensi Anak
5. Tips Bergaul jo Anak
6. Anakku, Penyejuk Hatiku

• Buku Seri Pandidikan Masyarakaik

1. Pemuda Islam, Generasi Penerus
2. Wanita Islam Perubah Bangsa
3. Dilema Kebijakan Energi
4. Mengkritisi Kebijakan Pemerintah
5. Dai di Tangah Kegalauan Politik
6. Pemikiran Manuju Masyarakat Madani

• Buku Seri Manajemen SDM

1. Model Managemen Sumber Daya Manusia
2. Aktivitas Managemen Sumber Daya Manusia dan Aplikasi Asesmen
3. Asesmen Sumber Daya Manusia dalam Managemen Sumber Daya Manusia
4. Kajian Managemen Sumber Daya Manusia dan Asesmen Sumber Daya Manusia
5. Pembuatan Alat Asesmen Sumber Daya Manusia untuak Managemen Sumber Daya Manusia

• Irwan Prayitno di Twitter
• (Indonesia) Situs web resmi Irwan Prayitno