I Leonardo di ser Piero da Vinci (pronunciation (help·info)), April 15, 1452 - May 2, 1519), Italianu yang w:polymath; metung yang sientista, matematiku, inieru, imbentor, anatomist, pintor, eskultor, arkitektu, botanist, mosiku ampong talasulat.
Anak ne king kilual ning metung a notariung i Piero da Vinci, ampo ning metung a babaing ibat king pamiliang ortelanu, i Caterina, at mibait ya king Vinci a atiu king labuad ning Florence, i Leonardo. Megaral ya king studio ning pikabaluan a pintor ibat king Florence, i Verrocchio. Aniang bayu ya pamung magobra, magsilbi ya kang Ludovico il Moro king Milan. Kaibat, megobra ya king Roma, Bologna ampong Venecia. Aniang tauli nang banua ning kayang bie, menuknangan ya ketang baleng binie na kaya ning Aring François I.
Leonardo da Vinci | |
Sariling larawan king malutung atisa (red chalk), manga 1512 to 1515. [a] | |
Lagyu kebaitan | Leonardo di Ser Piero |
Mibait | Abril 15 1452 |
Died | Mayu 2 1519 (maki edad a 67) Amboise, Indre-et-Loire, king Francia ngeni |
Bangsa | Italianu |
Larangan | Dakal a miyayaliwang dake ding alit ampong siensia |
Kilusan | High Renaissance |
Bantug a obra | Mona Lisa, The Last Supper, The Vitruvian Man |
Maralas, tuturing deng modelu ning "Renaissance man" o taung biasa kareng dakal a bage i Leonardo. Bukud mung ing kayang kagiwan king pamaglalang o pamanimbentu ing papante ketang kayang pangamapaniuri o antimong alang anggang kapagnasan a manigaral (infinite curiosity). Dakal a sasabing ya ing metung kareng mapiang diling pintor king sablang panaun, ampo ing taung pekamatenakan kareng dakal diling bage a mebie.
Nanupata, pikabaluan yang dili antimong pintor i Leonardo. Ala lang kapante deng adua kareng obra na, ing Mona Lisa ampo ing Ing Tauling Apunan (The Last Supper), anting pekataniag, at maralas diling kokopian ampong pakiapusan anting kapitutulan (parodied) a pininturang larawan ning tau (portrait), ampong larawan a relihiyosu (religious painting). Bukud mung ing Pamaglalang kang Adan (Creation of Adam) nang Michelangelo ing malapit kareti. Kilala de murin deng malda ing ginulis nang Leonardo, ing Vitruvian Man. Manga labi lang lima deng mitatagan kareng kayang pinintura. Ditak la mu deng mitagan uli ning kayang alang patugut (at keraklan makasirang) pamag-eksperimentu, ampo ing ugali nang pálambatan no reti (procrastination).[b] Nanupata, basi kareng obrang deta, ampo reng kayang kuadernu (notebook) a maki ginulis (drawing), krokis a sientipiku (scientific diagram), ampong pamalak tungkul king pamamintura, bukud mung ing kayang kasingidad a i Michelangelo ing kayang kasalipit o karibal ketang kayang pamanang inambag kareng talalalang (artist) a katuki na, angga king panaun tamu.
Antimong metung a inieru, malaut la king kayang panaun deng idea nang Leonardo. Mikudta yang helicopter, tangking panggera, calculator, bapor a double hull ampong makinang manipun king enerhia ning aldo, at miglalang yang mumunang teoria ning plate tectonics. Ditak la mu kareng kayang aisip deng melaus, o agiu ra mang papaliari, aniang panaun a mabie ya,[c] dapot e mepansin a megamit la kareng pabrika deng mapilan kareng mangalati nang inimbentu, alimbawa ing otomatikung pandurut kalinias o bobina (automatic bobbin winder), o ing makinang paniubuk king tibe ning kawad (machine for testing the tensile strength of wire).[d] Anting metung a sientista, pepasulung na ing beluan tamung kareng larangan ning anatomy, civil engineering, optics, ampong hydrodynamics.
Persondata | |
---|---|
LAGYU | Leonardo da Vinci |
ALIWANG LAGYU | Leonardo di ser Piero da Vinci (full name) |
MAKUYAD A PAMILARAWAN | Italianung pintor ampong polymath |
ALDO KEBAITAN | Abril 15 1452 |
LUGAL KEBAITAN | Anchiano malapit king Vincia, Italia |
ALDO KEMATIAN | Mayu 2 1519 |
LUGAL KEMATIAN | Clos Lucé, Francia |
This article uses material from the Wikipedia Kapampangan article Leonardo da Vinci, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Kapampangan (DUHOCTRUNGQUOC.VN) is an independent company and has no affiliation with Wiki Foundation.