Library Of Congress Control Number: Scistêma de numeraçión di eleménti catàloghæ inta Bibliotêca do Congrèsso

O no l'é corelòu a-o contegnûo de nisciùn lìbbro e o no dêve êse confûzo co-a Clasificaçión da Bibliotêca do Congrèsso (Library of Congress Classification, in sìgla LCC).

ZE	Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno

O scistêma de numeraçión LCCN o l'é stæto dêuviòu a partî da-o 1898, quànde l'acrònimo LCCN o voéiva ancón dî Library of Congress Card Number. O l'é stæto ciamòu, tra-i âtri nómmi, Library of Congress Catalog Card Number ascì. A Bibliotêca do Congrèsso a preparâva de schêde de informaçioîn bibliogràfiche pe-o pròpio catàlogo bibliotecâio e a vendéiva quélle duplicâte a-e âtre bibliotêche pe l'ûzo inti pròppi catàloghi. Scistêma, 'sto chi, ch'o l'é conosciûo cómme catalogaçión centralizâ. A ògni schêda o l'é stæto asegnòu 'n nùmero de série pe agiutâ inte l'identificaçión.

Scibén che a ciù pàrte de informaçioîn bibliogràfiche a l'é òua creâ, archiviâ e condivîza eletronicaménte co-e âtre bibliotêche, o l'é ancón necesâio identificâ ògni eleménto ùnico e l'LCCN o contìnoa a avéi quésta fonçión.

I bibliotecâi de tùtto o móndo dêuvian quésto identificatô univoco into procèsso de catalogaçión da ciù pàrte di lìbbri publichæ inti Stâti Unîi. Quésto o l'agiùtta i bibliotecâi a òtegnî i dæti de catalogaçión corètti, conosciûi cómme eleménti de catalogaçión, che a Bibliotêca do Congrèsso e tèrse pàrte méttan a dispoxiçión in sciâ Ræ e atravèrso âtri media.

Into frevâ 2008, a Bibliotêca do Congrèsso a l'à creòu o servìçio LCCN Permalink, dàndo 'n URL stàbile a ògni Library of Congress Control Number.

Inta ciù pàrte de sò fórme elementâri, o nùmero o l'inclùdde 'n ànno e 'n nùmero de série. L'ànno o l'à dôe cîfre se tra-o 1898 e o 2000 ò quàttro, a partî da-o 2001. I tréi ànni dùbi, ò sæ 1898, 1899 e 1900, són distìnti da-a dimensción do nùmero de série. A gh'é ànche de peculiaritæ inti nùmeri che incomensan co-in "7" aprêuvo a 'n esperiménto fæto tra-o 1969 e o 1972 ch'o l'à azónto 'na cîfra de contròllo.

I nùmeri de série són lónghi sêi cîfre e dêvan inclùdde i zêri iniçiâli. Quésti zêri, i quæ ìnpan o nùmero, són 'n'azónta ciù recénte a-o formâto e dónca tànti di travàggi ciù vêgi móstran di còdici mêno conplêti. O tratìn ch'o l'é de spésso mìsso a separâ l'ànno e o nùmero de série o l'é facoltatîvo ànche se, ciù de recénte, a Bibliotêca do Congrèsso a l'à indicòu a-i editoî de evitâ d'inclùdde o tratìn.

• (EN) Library of Congress Name Authority File (NAF), in sce id.loc.gov. URL consultòu o 7 novénbre 2021.
• (EN) Bibliographic Processing Cataloging Rules: Library of Congress Control Number (LCCN), in sce libraries.psu.edu. URL consultòu o 7 novénbre 2021 (archiviòu da l'url òriginâle o 13 màzzo 2016).