Genocidio Ærminnio

O termine genoçidio o l'è associao sorvettutto a-o segondo epizodio, ch'o vegne commemorao da-i Ærminni o 24 d'arvî.

Int'o mæximo periodo storico l'Impeo Ottoman o l'aiva conduto (ò aomanco tollerao) di atacchi scimmili contra di âtre etnie (comme i Asciri e i Greghi), e pe questo di studioxi creddan che ghe foise un progetto de sterminnio.

In sce-o cian internaçionâ, 29 stati han za ófiçialmente riconosciúo un genocidio inti eventi descriti.

 

Into 1890 inte l'Impeo Ottoman se contava circa 2 mioin d'Ærminni, in maggiorança crestien-ortodosci monofixiti (no aveivan parteçipao a-o Concilio de Calcedonia e no aveivan aderio a-a profescion de fe' ch'a riconosce ascì a piña umanitæ de Gexo insemme a-a so piña divinitæ, e quindi conscideran Gexo comme entitæ unicamente diviña). I Ærminni ean sostegnui da-a Ruscia inta so lotta pe l'indipendença, percose a Ruscia a l'aspiava a indebolî l'impeo ottoman pe annettine di teritoi e eventualmente appropriâse de Costantinoppoli. Pe reprimme o movimento aotonomista ærminnio, o Governo ottoman o l'incoraggì fra i Curdi, co-i quæ o condivideiva o teritoio inte l'Ærminnia storica, di sentimenti de oddio anti-ærminni.

L'oprescion che dovettan subî da-i Curdi e l'aomento de tasce imposto da-o governo turco ezasperon i Ærminni fin a-a rivotta, a-a quæ l'ezerçito ottoman, asciancao da de miliççie irregolæ curde, o rispoze assascinando de miggiæa de Ærminni e bruxandone i villaggi (1894).

Doi anni doppo, foscia pe ótegnî vixibilitæ internaçionâ, di rivoluçionai ærminni ocupon a banca ottomaña a Istanbul. A reaçion a fu un pogrom anti-ærminnio da parte di Turchi ottomen in to quæ perdette a vitta 50.000 Ærminni.

 

Into periodo precedente a Primma guæra mondiâ a l'impeo ottoman l'ea succedúo o governo di «Zoeni Turchi». Questi temeivan che i Ærminni poesan alliâse co-i Rusci, di quæ ean nemixi.

O 1909 o registrò un eccidio de aomanco 30.000 persoñe inta region da Çiliçia.

Into 1915 di battagioin ærminni de l'ezerçito russo començon a reclutâ fra e so fie di Ærminni che in precedença aveivan militao inte l'ezerçito ottoman. Intanto l'ezerçito françeize o finançiava e armava a so votta i Ærminni, inçitandoli a-a rivotta contra o nascente poei repubbrican.

Inta nœutte tra o 23 e o 24 arvî 1915 vègnan eseguii i primmi arresti tra l'élite ærminnia de Costantinopoli. L'opiaçion a proseguì l'undeman e inti giorni seguenti. Inte 'n solo meize, ciu de mille intellettuæ ærminni, tra i quæ di giornalisti, scritoî, poeti e sciña di delegæ a-o Parlamento fun deportæ verso l'interno de l'Anatolia e massacræ longo a stradda.

Arresti e deportaçioin fun compie in mascima parte da-i «Zoeni Turchi». Inte "marce da morte", che ingugettan 1.200.000 persoñe, de çentanæa de miggiæa moin pe famme, maotia ò sfinimento. Di âtre çentanæa de miggiæa fun massacræ da-a miliççia curda e da l'ezerçito turco.

E fotografie de Armin T. Wegner son a testimoniança de quelli fæti.

Un ampia bandeeta de analisti a concorda into qualificâ questo accadimento comme o primmo genocidio moderno.

 

A ciu gran parte di storichi a tende a consciderâ e motivaçioin addute da-i Zoeni Turchi comme propaganda, e a sottoliniane o progetto politico amiante a-a creaçion in Anatolia de un stato turco etnicamente omogennio.

Di âtri studioxi, sostegnindo l'inexistença de un progetto de genocidio, reciamman l'attençion in sce-o fæto che no tutti i numeroxi Ærminni d'Istanbul fun ingugeiti into massacro e che no fu approntao un cian scistematico de eliminaçion paragonabile a quello misso in pratica da-i nazisti contra i Ebrei durante a Segonda guæra mondiâ.

Questa texi a lè sostegnua, tra i âtri, da Guenter Lewy. A questo propoxito o studiozo ærminnio Boghos Levon Zekiyan o spiega che a persecuçion di Ærminni de Istanbul a fu solo o punto de partença de miliççie turche, destinao a corpî escluxivamente i intellettuæ, e mente pensante: l'obiettivo da deportaçion o resguardava no tanto i Ærminni in quante componente etnica, ma ciutosto i Ærminni comme componente territoriâ de l'Anatolia, into quaddro do progetto dîto da Grande Turchia (ò do panturchismo). Boghos Levon Zekiyan o sottolinnia che "i Ærminni rescidenti inta capitâ ean estranei a-a lezze de deportaçion, ovviamente pe un riguardo a-e miscioin diplomatiche strangee" mentre in Anatolia "un'opiaçion coscì ampia a l'ea façilitâ inte l'esecuçion da-o stato de guæra into quæ a se trovava impegnâ tutta l'Œüropa"

O governo turco o continnoa scin-a ancœu a refiâ de riconosce o genocidio di Ærminni e questa a l'è uña de caoze de tenscion tra Union Œüropea e Turchia. Una recente lezze françeize a punisce co-a prexon a negaçion do genocidio ærminnio. Pe converso, za da tempo a magistratua turca a punisce co l'arresto e a recluxon scin a trei anni o nominâ in pubbrico l'existença do genocidio di Ærminni in quante gesto anti-patriottico. In tâ denonçia, comunque retiâ, l'è incappao o scritô turco Orhan Pamuk, a prœuvo a un'intervista a un giornâ sviççero inta quæ o l'accennava a-o fenommeno. O governo turco attuâ o l'è a prœuvo a favoî l'avertua a-o riconoscimento de questa pagina de stoia, comme dimostrao ascì da-a riavertua de arcuñe gexe ærminnie into sud-est do paize (a zona curda) a Van e a Diyarbakır, in sce iniçiativa do scindico do BDP Osman Baydemir. I socialdemocrateghi do Partio Repubbrican e i naçionalisti tuttavia se ópoñan tenaxemente a questi cangiamenti.

L'ezatto numero de morti o l'è controverso. E fonte turche tendan a minimizzâ a cifra, quelle ærminnie a insciâla.

Into 1896 o governo ottoman o registrava in 1.440.000 i Ærminni rescidenti in Anatolia. Segondo o Patriarcato ærminnio de Costantinopoli, into 1914 i Ærminni anatolichi andavan da un minimo de 1.845.000 a un mascimo de 2.100.000. E stimme varian da un minnimo de 950.000 segondo e fonte scrite turche scin a 3.500.000 segondo e ipottexi di Ærminni.

O storico Arnold J. Toynbee, ch'o fu ófiçiâ de l'intelligence britannega in Anatolia inta primma guæra mondiâ, o stimma in 1.800.000 o nummero complescivo di Ærminni de quello paize. L'Enciclopedia britannica a l'indica comme probabile o numero de 1.750.000..

E fonte turche stimman o numero di Ærminni morti in 200.000, mentre quelle ærminnie arrivan a 2.500.000. Talat Pasha, Gran Visir into 1917-1918 e importante Zoeno Turco, o stimma a ziffra in 300.000 morti.

Toynbee o ritegne che i morti fun 1.200.000, McCarthy 600.000 . I storichi stimman che a cifra a varrie fra i 500.000 e 2.000.000 de morti, ma o totâ de 1.200.000/1.300.000 o l'è quello ciu diffuzo e comunemente açetao.

• Ravished Armenia, de Oscar Apfel (1919)
• Mayrig, de Henri Verneuil (1991)
• Quella stradda ciammâ paradizo, de Henri Verneuil (1992), seguito do precedente
• Ararat, de Atom Egoyan (2002)
• Screamers de Carla Garapedian (2006), documentaio
• Memories de Avedis Ohanian (2006), documentaio
• A massaja de lódoe, de Paolo e Vittoio Taviani (2007), bazao in sce-o romanço omonnimo de Antogna Arslan
• Stoie sença stoia, de Paolo Facco e Federigo Rorato, (2008), documentaio

•   Wiki Commons a contêgne di files in sce Genocidio armen