Willem Nolens

Laes hie wie v'r mit de versjillende saorte Limburgs ómgaon.

Willem Hubert Nolens (Venlo, 7 september 1860 - Den Haag, 27 augustus 1931) waas eine priester en politicus.

Mgr.Prof. Mr. Dr. Willem Hubert Nolens woort gebaore op op de Groeëte Baekstraot as zoon van eine laerloeëjer.

Nolens studeerde aan de 3-jäörige H.B.S. in Venlo. Aansloètend ging Nolens nao 't Bisschoppelik College in Wieërt. Vanaaf 1878 vervolg Nolens zien studie in Rolduc wao hae filosofie studeerde. In 1880 woort Nolens toegelaote op de Rièks Universiteit van Utrecht. Heej studeerde hae rechte. Nao aafsloèting van dees studie ging hae nao Remund um dao theologie te studere. Naevebeej deej hae zien doctoraal in de rechte (1884) en zien doctoraal staatsweitenschappe (1885).

Nolens volgde Herman Schaepman op es poletiek leijer van de roams-kathelieke in 't begin van de twintigste eëuw. Hae waas 'ne democratisch gezinde katheliek dae zich inzat veur de arbeidersjklasse en veur verbaetering van de sociaal wètgaeving wodoor hae, net es Schaepman, dèkser in conflict raakde mèt de euverwaegend conservatieve roams-kathelieke kamerclub. In 1910 woort hae fractieveurzitter van de roams-kathelieke Sjtaatspartiej wovan hae in 1904 medeoprichter waas; hae bleef fractieveurzitter pes aan ziene doad in 1931. Hae waas formateur van 't eësjte kabinèt Ruys de Beerenbrouck. Zelf koosj hae es preester zeende neet premier waere.
Nolens laog eindj jaore twintig ónger vuur van sómmige, later ummer meë nao extreem-rechs opsjuvende, jóng kathelieke intellectuele. 't Haekeldich De Dreuëm van Nolens van Gerard Wijdeveld zörgde in 1930 veur eine groate rel. Wijdeveld verweet de preester Nolens es politicus te wènnig op te kómme veur godsdeensvriejheid in Nederlandjs-Indië.

Nolens hèj eine groate invlood op de Nederlandjse poletiek van de jaore twintig en dertig van de twintigste eëuw. Hae waas biejzunjer geleef ónger de Limburgse mienwirkersj die väöl van hun verbaeterde laef- en arbeidsómsjtendigheje aan häöm te danke hèjje. De nach veur zien begrafenis ware in zien gebaortesjtad Venlo de sjtraotlantaeres aafgedèk; de begrafenis woort bezoch door tieëndoezende belangsjtèllende.

• 25 maart 1887 - Nolens wuuert tot priester gewiejd en wuuert lièraar op Rolduc.
• 13 november 1896 - Nolens duit zien intraej in de Twieëde Kamer veur de Rooms Katholieke Staats Partij (RKSP). Mgr. Nolens blief lid van de 2e Kamer wies aan zienen doeëd.
• Op 9 oktober 1909 - Nolens wuuert beneump tot hoeëglièraar aan de Universiteit van Amsterdam.
• 15 fibberwari 1910 - Nolens wuuert gekaoze tot veurzitter van de RKSP.
• 1923 - Beneuming tot Minister van Staat wies aan zienen doeëd.
• 26 augustus 1931 - Nolens störf nao ein krenkte in Den Haag.

• Oprichter van de Nederlandse Vereiniging veur Wettelike bescherming van de erbeiers
• Veurzitter van de Miènwerkersbónd
• Veurzitter van de Miènraod
• Redacteur Katholiek Sociaal Waekblaad
• Veurzitter Hoeëge Raod van Erbeid
• Veurzitter Internationale Arbeidsconferentie

Dees liès is wiedoet neet compleet.

In Mestreech is ein park nao um verneump, 't Mgr. Nolenspark. In Venlo zien ein plein en ein park nao um geneump, t.w. 't Mgr Nolensplein (ouk bekind as Gaasplein) en 't dao naeve gelaege Mgr. Nolenspark. In dit Venlose park steit ouk ein, in 1953 gemak, monument ter naogedachtenis. In Gelaen haat 't 'n Dr Nolenslaan, 'n Dr Nolensplein en 'n Dr Nolenshof. In Zitterd is 'n Dr Nolenslaan en in Limbricht en Tilburg 'n Dr Nolensstraat. In Waalwijk besteit de Mgr. Nolensstraat. In 1981 is eine kemissie-vergaderzaal van de Twieëde Kamer nao Mgr. Nolens geneump.

Mgr. Nolens is begrave op 't R.K. kerkhaof van Venlo.

Oetgebreide biografie van Willem Hubert Nolens
Nolens W.H. op Katholiek Nederland Gezètteknipsjels van 't Katholiek Documentatie Centrum