Sardiens

Laes hie wie v'r mit de versjillende saorte Limburgs ómgaon.

't Sardiens of Sardisch (Sa limba sarda) is 'n Roemaanse taol die op 't Italiaans eilaand Sardinië gesproke weurt. Aofhaankelik vaan wat me es Sardiens en wat es Corsicaans zuut, weurt de taol door zoe 1 miljoen tot 1.300.000 minse gesproke; alles bijein sprèk 80% vaan de eilaand bevolking de streiktaol nog. In 't stedsje Algheria weurt vaanajds Catalaans gesproke, allewel tot 't Sardisch en 't Italiaans hei wel terrein winne. 't Sardisch is sins 1997 door de regionaal euverheid en sins 1999 door de Italiaanse regering erkind es officieel taol. Evels levert 't oontbreke vaan 'n staanderdtaol en -spelling heimèt wel probleme op.

't Sardiens maak miervoude op -s, wie de Wes-Roemaanse taole; daorum allein al kin 't Sardiens koelik es dialek vaan 't Italiaans gezeen weure. De bestumde artikele zien su, sa, sos en sas, boe-in de taol 't Roemeens volg.

Aanders es alle aander Roemaanse taole heet 't Sardiens de Latiense k (gesjrieve c) euveral bewoerd. Zoe is 't Latiense woord centum ("hoonderd") in 't Sardiens trökgekoume es kentu, tegeneuver 't Italiaans tsiento (gesjrieve cento) en 't Fraans sã (gesjrieve cent). Op Sardinië moot oets 'n Hamitische of Semitische taol gesproeke zien, vermoje weitesjappers, umtot 't Sardiens palataal klanke kint.

• De Sardiense Wiki
• Sardu.net, Sardienstaolege site euver 't Sardiens.