Ni Leandro Bassano (Hunio 10, 1557 – Abril 15, 1622), ammo pay a kas ni Leandro dal Ponte, ket maysa idi nga Italiano nga artista manipud idiay Bassano del Grappa, ti ub-ubing a kabsat a lalaki ni Francesco Bassano ti Ub-ubing ken ti maikatlo nga anak a lalaki ni Jacopo Bassano, a nangala iti naganda manipud iti ilida iti Bassano del Grappa.
Ni Leandro ket nagadal a kakuyogna ti kabsatna a lalaki idiay lugar a pagobraan iti amada, ngem inmatonanda ti estudio idi nanglukat ni Francesco iti lugar a pagobraan idiay Benesia. Ni Leandro ket sinurotna iti tradision dagiti relihioso nga obra ti amana, ngem nagbalin pay a nadayeg a kas pintor iti retrato.
Babaen idi agarup a 1575, ni Leandro ket nagbalinen nga importante a katakunaynay iti amana, ken ti kabsatna a lalaki ket immalis idiay Benesia. Kinaykayat ti amana a ni Leandro ket imatonanna ti estudio idiay Bassano del Grappa. Ngem kalapsan idi pimmusay ti amana, nagpakamatay ti kabsatna a lalaki a ni Francesco ken ni Leandro ket isun ti nangimaton ti estudio idiay Benesia. Isu idiay ket nagbalin a naballigi a retratista, ken asideg a nagob-obra iti impluensial nga estilo ti Benesiano nga apo a ni Tintoretto.
Nakaparang-ay met ni Leandro iti bukodna nga estilo, nangala iti Benesiano nga impluensia, ken nagpasayaat met iti nasayaat nga estilona iti panag-drawing. Ti argina iti panagpinta ket magiddiat iti amana iti panagusar iti "napino nga obra iti brutsa, agraman iti nalamiis, dagiti naraniag a maris, nalinis a naipakat kadagiti nasayaat a naipalawag a lugar, a saan a kas ti amana, a nagpinta kadagiti napusek ken nalangpaw a kawad dagiti brutsa."
Simmayaat iti panagballigina idiay Benesia, ken nakaala pay iti pannakaikabaliero manipud iti Dogo ti Benesia a ni Marino Grimani idi agarup a 1595, ken naggigian iti amin a paset iti panagbiagna idiay siudad. Iti daytoy, nangrugrugi ni Leandro a nagpirma iti naganna iti pammadayaw nga “Eques.” Kaaduan kadagiti obrana ket saan a nalawag a napetsado ken dagiti obrana ket sagpaminsan a maiyal-allilaw kadagiti sabali nga artista. Kasta a kaso daytoy iti obrana iti Retrato ti Lakay a Lalaki idiay Museo dagiti Napino nga Arte, Budapest, a naipagpagarup idi nga obra ni Tintoretto.
Iti pay maipatinayon kadagiti adu retrato ken relihioso a pedaso, ni Leandro ket nagpinta iti sekular, dagiti obra a kas henero, kas iti obrana iti Konsierto, nga itan ket adda idiay Galeria ti Uffizi ken ti obrana iti Senario ti Kusina a naibitin idiay Museo ti Arte ti Unibersidad ti Indiana.
Dagiti midia a mainaig ken ni Leandro Bassano iti Wiki Commons
This article uses material from the Wikipedia Ilokano article Leandro Bassano, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ti linaon ket magun-od babaen ti CC BY-SA 4.0 malaksid no adda sabali a naibaga. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Ilokano (DUHOCTRUNGQUOC.VN) is an independent company and has no affiliation with Wiki Foundation.