रजनीकांत केंकरे
रजनीकांत केंकरे हो एक सुटके झुजारी आशिल्लो.
जल्म आनी शिक्षण
रजनीकांत केंकरे हांचो जल्म 1931 वर्सा कुंकळ्ळी, सालसेत गांवांत जालो. तांणी मुळावें शिक्षण मराठींतल्यान घेतलें. ते ‘आझान गोमंतक दला’चे वांगडी आशिल्ले.‘आझाद गोमंतक दल’ ही कांय क्रांतिकारी विचारसरणीच्या तरणाट्यांनी 1947 वर्सा स्थापन केल्ली संघटना. सशस्त्र क्रांती करून भारत भुंय वयली पुर्तुगेज सत्ता नश्ट करप हें संघटनेचें ध्येय आशिल्लें.
वावर
सुभाषचंद्र बोस हांणी स्थापन केल्ली ‘आझाद हिंद सेना’ तांचो आदर्श आशिल्लो. सत्याग्रह मार्गान फॅसिस्ट पुर्तुगेज सत्ता नश्ट जावंची ना हें त्या तरणाट्यांनी पुरायेन वळखल्लें. म्हणून सशस्त्र आपवावुरप्यांची पलटण उबी करून पुर्तुगेजां कडेन हार हात करपाच्या नदरेन ‘आझाद गोमंतक दला’ची रचणूक जाल्ली. जिवाची पर्वा करिनासतना गोंय मुक्ती खातीर झुजपी आपवावुरपी हे संघटनेन तयार केल्लें. तांतूतलेच एक आपवावुरपी जावस आसले रजनीकांत केंकरें.1954 वर्सा तांणी नगर हवेलीचे सुटके चळवळींत वांटो घेतिल्लो. उपरांत जायते फावट तांणी पुर्तुगेजांच्या पुलीस ठाण्यार, मिनाखणींचेर (स्फोटकां, ग्रेनेडूस मेळोवप पासत) वेल्वेचेर (पयसो मेळोवपा खातीर) हत्यारबंद हल्ले करपांत वांटो घेतिल्लो. 10 जून 1955 दिसा सावडूडें ते कालें रेल्वे लायनीचेर आशिल्ल्या बोगदो नं. 10 हाका तांणी सुरींग घाल्लो. ते भायर 30 जून 1955 दिसा सावडूडें ते कालें रेल्वे लायनीचेर आशिल्ल्या सांकवाक, 2 जुलय 1955 दिसा कष्टीं-कुळें रेल्वे पुलाचेर स्फोट घडोवन हाडिल्लो. हातूंत तांणी वांटो घेतिल्लो. तांचे गैरहाजिरींत गोंयच्या प्रादेशीक लश्करी दंडाधिकाऱ्या मुखार (टेरिटोरियल मिलिटरी ट्रिब्युनल) तांची चवकशी जाली. तांकां इकरा वर्सां खर बंदखणीची ख्यास्त फर्मायली. ते भायर वीस वर्सां खातीर तांचे राजकी हक्क काडून घेतले. रजनीकांताच्यो पुर्तुगेज सत्तेक गोंयांतल्यान धांवडावचे पसत सतत दहशतवादी कार्यावळी चालूच आसल्यो. घटमूट आनी धिप्पाड आंगलोट आशिल्ले रजनीकांत आर्म चलोवपाक फिशाल आसले. चार वर्यांच्या, थोड्याश्या काळांत तांणी कितलींशींच धाडशी कर्तुबां बेडर वृत्तीन करून दाखयल्ली. 8 फेब्रुवारी 1956 दिसा तळावले मिनाखणीचे स्फोट घडोवन हाडपांत ते आशिल्ले. 2 मार्च 1956 ह्या दिसा तांणी करंजाळे रेल्वे गाडयेचेर हल्लो केलो आनी पंदरा हजार रूपये हस्तगत केले. 13 ऑगस्ट 1956 दिसा तांणी कुळें ते सोनावली रेल्वे लायनीचेर बॉम्च स्फोट घडोवन हाडलो. 12 ऑक्टोबर 1956 दिसा शिरोड्यां आनी 14 मे 1957 दिसा सोनावली वाठारांत जे घातकी हल्ले जाल्ले तातूंत तांणी वांटो घेतिल्लो. आपल्या दुश्ट वृत्तीची भूक भागोवचे खातीर ज्या कॅरोज नांवाच्या पुलिस अधिकाऱ्यानस्वताच्या हातांनी मशीनगन चलोवन निशस्त्र सत्याग्रहींक मारुन उडयल्ले. तांकां तेच पद्दतीन मारुन उडोवपाचें धिटायेचें काम रजनीकांतानी केल्लें. कालें दूदसागराच्या रेल्वे गाडयेर हल्लो करून दिसा-धवळ्या गाडयेंतल्यान दुश्ट कॅरोजाक भायर ओडून काडून तांणी मारुन उडयल्लो. तांच्या ह्या आनी दहशतवादी कारवायां खातीर रजनीकांत पुर्तृगेज सरकारान जिवो जाय आशिल्लो. तांकां धरचे सशस्त्र पुलीस दीस-रात तेळणी करीत आशिल्ले आनी एक दीस अचकीत तांची गांठ पुर्तृगज पुलिसांकडेन पडली,जैन्ना ते लिपून रानांतल्यान वताले.
मरण
4 जून 1957 दिसा निरंकाल-दाभाळ वाठारांत अकस्मात 20 सैनिकांनी तांचेर आनी तांच्या वांगड्यांचेर हल्लो केलो. ह्या हल्ल्यांत तांकां आनी तांच्या वांगड्यांक मरण आयलें. गोंय मुक्ततेचो ध्यास घेतिल्ले रजनीकांताची पिराय अवघी 26 वर्सांची आशिल्ली. 18 जून 1983 दिसा गोंय सरपारान तांच्या सुटके झुजांतल्या वावराचो मरणोत्तर भोवमान केलो.
संदर्भ
This article uses material from the Wikipedia गोंयची कोंकणी / Gõychi Konknni article रजनीकांत केंकरे, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). हातूंतलो मजकूर CC BY-SA 4.0च्या अंतर्गत उपलब्ध आसा जे मेरेन हेर नोंदी करूक नात. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki गोंयची कोंकणी / Gõychi Konknni (DUHOCTRUNGQUOC.VN) is an independent company and has no affiliation with Wiki Foundation.