Poreno Ñeñangarekóre

Oñeñe'ẽvo poreno ñeñangarekóre, he'ise opa umi mba'e oipytyvõva ani hag̃ua oñemosarambi umi mba'asy oñemosarambíva poreno rupive yvypórape, he'ise avei umi tembiaporape térã mba'ejepuru yvypóra oipuru ani hag̃ua oñepyrũ tyeguasu ojeipota'ỹva.

Ko ñeimo'ã "poreno ñeñangarekóre" rehegua oñepyrũ amo 1980 arýpe ombohovái hag̃ua SIDA mba'asy ñemosarambi pya'ea oiko heta tetãme, upéicha oñemotenonde va'erã poreno ñeñangarekóre porenogua tekombo'e rupive ani hag̃ua SIDA ha umi mba'asy ambuéva oñemosarambíva poreno rupive oñembohetave. Poreno ñeñangarekóre iporãite opavavépe, omombaretégui yvypóra reko resãi, techapyrãme ojeipurúvo mombaryryru, tapichakuéra ikatu ohapejoko mba'asykuéra, kuimba'e ha kuña ikatu ojoko tyeguasu ojeipota'ỹva avei.

Mba'éicha ikatu oiko ko "poreno ñeñangarekóre":

Tenondeitépe, ojeikuaa va'erã poreno iporã oikóramo mokõi (térã hetave) tapicháre ojohayhúva ha ojoipotáva, ha ikatúmava oiporavokuaa mba'épa oipota, upéicharõ oje'e poreno iporãha.

• Mombaryryru: Mba'e oñuvãva tembo ha ohapejoko mombary ani hag̃ua oike takópe térã tevikuápe. Tapichakuéra oipurúramo mombaryryru ikatu ojoko tyeguasu ojeipota'ỹva, oipytyvõ avei ani hag̃ua oñembohetave umi mba'asy vai oñemosarambíva poreno rupive. Mombaryryru ndahepýi, heta tetãme oñeme'ẽ hepy'ỹ tapichakuérape tasyópe. Ndahasýi avei ojeipuru hag̃ua, opaichagua ituichakue ha iñanambusukue, ipirekue pererĩete, nombyajúi jopyhýpe.
• Kuña mombaryryru: Mba'e ryru ipererĩva, ituichavemi kuimba'e mombaryryrúgui ha oñemoĩ takópe ani hag̃ua oike mombary, nombyajúi ha oiko porã avei kuimba'e mombaryryrúicha.
• Tasymombiaha: Pohã mba'asy opaichagua omombiáva ha ohapejokóva, umi mba'asy apytépe oĩ mba'asykuéra oñemosarambíva poreno rupive.

• Porenogua tekombo'e
• Mba'asy oñemosarambíva poreno rupive
• Memby'ỹrã