Gielwangwrotmûs
De gielwangwrotmûs (Latynske namme: Microtus xanthognathus) is in sûchdier út it skift fan 'e kjifdieren (Rodentia), de famylje fan 'e wrotmûseftigen (Cricetidae), it skaai fan 'e fjildmûzen (Microtus) en it ûnderskaai fan 'e ûndergrûnske wrotmûzen fan 'e Nije Wrâld (Pitymys), dat foarkomt yn it noardwesten fan Noard-Amearika, yn Amerikaanske steat Alaska en de Kanadeeske gewesten Britsk-Kolumbia, de Yukon en de Noardwestlike Territoaria.
| gielwangwrotmûs | ||||||||||||
|---|---|---|---|---|---|---|---|---|---|---|---|---|
| taksonomy | ||||||||||||
| ||||||||||||
| soarte | ||||||||||||
| Microtus xanthognathus | ||||||||||||
| Leach, 1815 | ||||||||||||
| IUCN-status: net bedrige | ||||||||||||
| ferspriedingsgebiet | ||||||||||||
 |
Uterlike skaaimerken
De gielwangwrotmûs hat trochinoar in kop-romplingte fan 18 sm, mei in sturtlingte fan 5 sm en in gewicht fan 120 g. Hy liket tige op 'e gielnoaswrotmûs (Microtus chrotorrhinus), mar is justjes grutter. Gielwangwrotmûzen hawwe koarte earkes en in net al te lange sturt. De pels is op 'e rêch brún, mar skaait nei de bealch ta grizich út, en de snút is gielich of roastbrún.
Biotoop en hâlden en dragen
Gielwangwrotmûzen libje yn in biotoop fan fochtich nullewâld, deunby streamend wetter of sompen. Se lizze mûzerillen oan troch de boaiemfegetaasje en grave ûndergrûnske hoalen. Dêrby libje se almeast yn koloanjes. As der ûnrie driget, uterje se in piipjend of fluitsjend lûd om koloanjegenoaten te warskôgjen. De gielwangwrotmûs libbet fierhinne fan gerzen, koarstmoassen en beien. Hy hâldt gjin wintersliep, mar is it hiele jier rûn aktyf, meastal by tsjuster en yn 'e skimer. Hjerstmis leit er yn syn hoale itensfoarrieden oan foar de winter. De wyfkes bringe nêsten fan 7-10 jongen te wrâld. De populaasjetichtheid kin fan jier oant jier tige fariëarje.
| Boarnen, noaten en/as referinsjes: |
| Foar boarnen en oare literatuer, sjoch ûnder: References, op dizze side. |
This article uses material from the Wikipedia Frysk article Gielwangwrotmûs, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ynhâld is beskikber ûnder CC BY-SA 4.0, at net oars neamd wurdt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Frysk (DUHOCTRUNGQUOC.VN) is an independent company and has no affiliation with Wiki Foundation.