Nasjonaal Park It Drintsk-Fryske Wâld

It mear as 6100 hektare grutte Nasjonale Park bestiet út bosk, heide en stosân.

Nasjonaal Park It Drintsk-Fryske Wâld Nationaal Park Het Drents-Friese Wold
It Doldersummerfjild fan 'e útsjochtoer ôf (2004).
lokaasje
lân	Nederlân
provinsjes	Drinte Fryslân
gemeenten	Eaststellingwerf Midden-Drinte Westerfjild
koördinaten	52°55′ N 6°20′ E
oare ynformaasje
status	nasjonaal park
oerflak	61 km²
stifting	2000
behear	Steatsboskbehear Natoermonuminten It Drintske Lânskip Maatskippij fan Woldiedichheid
webside	www.nationaalpark-drents-friese-wold.nl
kaart
Lokaasje yn Nederlân.

Belangrike plakken oan de rânen fan it park binne de doarpen Appelskea yn Súdeast-Fryslân en Doldersum, Diever, Hoogersmilde, Wapse en Vledder yn Drinte.

It Drintsk-Fryske Wâld krige yn 2000 de status fan nasjonaal park.

Op 7 augustus, yn 'e koarkdrûge simmer fan 2018, wie der in grutte natoerbrân yn it Drintske diel fan it park, wêrby't 75 ha feanlânskip yn 'e jiske lein waard. Brânwachtkorpsen út Drinte, Fryslân en Grinslân kamen mei sechstjin tankautospuiten en acht wettertankauto's yn aksje. Boeren út 'e omkriten fierden ekstra bluswetter oan yn jarretanks efter de trekker. De Keninklike Lânmacht sette in Chinook-helikopter yn. Wegen en fytspaden nei it gebiet fan 'e brân waarden troch de plysje ôfsletten, en fiif campings yn 'e omkriten waarden út foarsoarch ûntromme. Om 18.00 oere hie de brânwacht de brân ûnder kontrôle en koe it neiblussen begjinne. Yn totaal gie der 15.000 liter bluswetter trochhinne. Brânwacht en plysje hiene twa dagen nei de brân gjin oanwizings dat der sprake west hie fan brânstifting.

It karakter fan it gebiet is yn grutte mate beynfloede troch de esdoarpekultuer. Grutte dielen lykas it Doldersummerfjld, Aekingersân, Berkenheuvel en Wapserveld waarden iuwenlang troch de boeren út de omlizzende doarpen brûkt foar it beweidzjen troch skiep. Troch dy iuwenlange beweiding en it ôfplagjen fan seadden foar de potstâlkultuer, waarden mineralen ôffierd en ferskraalden grutte stikken fan de soere sângrûn. Op dy plakken ûntstienen heidefjilden en bytiden ek stosân. It Aekingersân by Appelskea hjit yn de folksmûle ek wol de 'Keale dunen'.

 

Benammen op dy stosânen ûntstiene lytse hichten of dúntsjes. Letter, yn de 19e iuw, nei de útfining fan keunstdong, waard de stosânen en heideterreinen (of woeste grûnen) beboske. Der waarden ynlânske soarten plante as iken en dinnen, mar ek útlânske soarten as Douglasspjirre, Amerikaanske iik of Japanske lariks.

De Vledder Aa nimt in bysûnder plak yn yn dit nasjonaal park. Dy beek is de ienige yn Nederlân dy't syn bopperin folslein yn in natuerlike omjouwing lizzen hat. In de jierren 2002 en 2003 is wurke oan it fannijs oanlizzen fan de natuerlike bopperin fan de beek.

Grutte stikken fan it gebiet spilen in wichtige rol yn de esdoarpekultuer. Mar der binne al folle âldere spoaren fan bewenning. By Diever leit in hunebêd oan de râne fan it park. Net fier fan Doldersum lizze in pear grêfhichten en op ferskate plakken binne spoaren fan bewenning út it Neolitikum (Lette Stientiid) en de izertiid fûn.

Midden yn it park, fiif kilometer fan Diever, leit in ûnderdûkershoale út de Twadde Wrâldoarloch.

 

Sa'n grut oaniensletten natoergebiet biedt romte oan ferskate soarten planten en bisten. Nijsgjirrich om te neamen binne:

Fauna

• beamotter
• stienmurd
• njirre
• ringslang
• glêde slang
• blynslang
• kaamsalamander
• libbenbernjende hagedis
• ree
• wâldspjocht
• houtspjocht
• eksterspjocht
• glee
• wapsebiter
• hauk

Floara

• stekende wolvepoat
• skieppeklokje
• miggefangerke
• feanheide

Foar in oersjoch fan de fûgels dy't yn it Drintsk-Fryske Wâld briede, sjoch

• Fûgelside fan it Drintsk-Fryske Wâld

Der binne fjouwer wichtige behearders fan dit Nasjonaal Park:

• Steatsboskbehear - hat 4150 hektare yn behear (benammen yn it noardeasten by Appelskea);
• Natuermonuminten - beheart 950 hektare by Diever (mei it gebiet Berkenheuvel);
• It Drintske Lânskip - beheart 450 hektare by Doldersum (Doldersummerfjild);
• De Maatskippij fan Weldadigheid - beheart 200 hektare bosk yn it westen fan it park (by Doldersum).

Yn it hiele park leit in wiidweidich stelsel fan asfaltearre fytspaden. In soad toeristen komme der dan ek om te fytsen. Steatsboskbehear hat foar mountainbikers aparte rûtes oanlein.

By Appelskea stiet it besikerssintrum Drintsk-Fryske Wâld , dêrnjonken is der in ynformaasjesintrum yn Diever.

• Site fan dit Nasjonaal Park
• Site oer natoer en aktiviteiten yn it Drintsk-Fryske Wâld
• Fakânsje yn en om it Drintsk-Fryske Wâld

Boarnen, noaten en/as referinsjes:

Commons    Ofbylden dy't by dit ûnderwerp hearre, binne te finen yn de kategory Drents-Friese Wold fan Wiki Commons.