I soraps (a voltis ancje sorps) a son un grop uman de Gjermanie orientâl, che al fevele il sorap, une lenghe sclave ocidentâl, che e je dongje al cec, al slovac, al polac e al kashubian.
La storie dai soraps in Gjermanie e scomence al inizi dal VI secul cun lis invasions barbarichis. La recession de lenghe e scomence dal XII secul, cuant che a rivarin contadins gjemanics des Flandris, de Turingjie e de Franconie, e intant la popolazion locâl vignive decimade des variis vueris e incursions.
I soraps a jerin cun di plui intune posizion di sotanance rispiet ai todescs, come che si pues viodi intal Sachsenspiegel e in altris documents. Plui indevant al fo ancje proibît l'ûs de lenghe sorabe: intal 1293 un tribunâl al proibî di doprâlu a Bernburg (Saale), tal 1327 a Altenburg, Zwickau e Lipsie, intal 1424 a Meissen. Intant l'acès a tantis corporazions di citâts di chê aree al jere reservât dome a int di origjin todescje/gjermaniche.
I nuclis dai Milzener e Lusizer (lusazians), dôs des plui o mancul 20 tribùs sorabis che a ocupavin il teritori de atuâl Lusazie, a forin relativementri pôc tocjâts de imigrazion todescje e des proibizions. Di conseguence, la lenghe e fo puartade indevant e il numar di fevelants al rivà fintremai 300.000 intal XVII secul.
Il test sorap plui antic che al è rivât fin ai timps modernis al è il Budissiner Bürgereid (jurament de citadinance di Bautzen/Budysin), che al fo scrit inte prime metât dal XVI secul.
La bandiere dai sclâfs di Gjermanie e fo doprade pe prime volte intal 1842 cuant che e fo tirade su inte citât di Lohsa (todesc Hoyerswerda, intal distret de Lusazie superiôr o Oberlausitz), ancje se l'ordin atuâl dai colôrs al fo stabilît definitivamentri dome ai 23 di Març dal 1848, tal congrès pansclâf di Praghe.
Ai 1 di Zenâr dal 1919 e fo proclamade la republiche Sorabe-Lusazie, che e doprave la bandiere nazionâl sorabe, ma che e fo prest sconfite e eliminade.
La bandiere e fo doprade cence regolis fintremai il 1935, cuant che fo proibide dal regjim. E fo alçade di gnûf ai 17 di Mai dal 1945, cuant che i rus a ocuparin la Gjermanie. Cun la creazion intal 1948 de Republiche Democratiche Todescje, la minorance sorabe e fo ricognossude, e ancje se la bandiere no fo nomenade inte legjislazion statâl, e fo acetade uficialmentri intai distrets (Bezirke) di Cottbus e Dresde inte regjon de Lusazie (e in cheste ultime il sorap e jere ancje lenghe uficiâl). Intal 1990, cun la riunificazion todescje, la bandiere sorabe e fo includude intes costituzions dai gnûfs stâts federâi dal Brandeburc e de Sassonie; in cheste ultime al è ancje regolât il scût nazionâl sorap.
Vuê i soraps a son plui o mancul 40 mil soraps inte Sassonie e 20 mil intal Brandeburc (clamâts ancje wenden); di chescj, plui o mancul la metât e fevele il sorap, rispetivementri obersorbisch o alt sorap e nierdersorbisch o bas sorap o wenden, che a voltis a son consideradis lenghis difarentis.
I soraps a àn la lôr culture, lenghe, stampe, scuelis e organizazions politichis. La principâl organizazion si clame Domowina (ven a stâi "Il nestri paîs" par sorap), ative inte Lusazie (Lausitz); i soraps a clamin il lôr paîs Serbska (Paîs dai sorabs), di no confondi cun Serpska (Paîs dai serps).
This article uses material from the Wikipedia Furlan article Soraps, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contignût al è disponibil sot de licence CC BY-SA 4.0 se nol è specificât in altre maniere Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Furlan (DUHOCTRUNGQUOC.VN) is an independent company and has no affiliation with Wiki Foundation.