Cjastinâr

In Friûl cheste plante (de famee des Fagacee) e je presinte in forme slargjade massimementri tai boscs de mont mezane e basse.

• Non furlan :Cjastinâr, o ben Tistignâr o Moronâr

• Non sientific :Castanea sativa

Lis fueis, un grum seghetadis, a cressin cun disposizion cjadençade sui frandêi. I flôrs, presints sedi te forme masculine che feminîl, a dan adun dai particolârs gjatuts. I flôrs masculins a son in fat tirâts adun in çufs sul da pît dal gjatut, dulà che invezit chei feminîi si cjatin in grops di dôi o trê sul scomençâ dal stes.

Ognidun dai flôrs feminîi al è in prionte torcenât di une cupule cuvierte di spinis sutilis. Dilunc il svilup des pomis chestis cupulis si tramudin tai riçs che, a svilup complet, a cjapin dentri dôs o trê pomis (cjastinis), lustris e dal carateristic colôr moron.

Lis cjastinis a son dopradis in plusôrs ûs di cusine e ancje tramudadis in farine.

Il len di cjastinâr nol è cui sa ce ricercjât ma dut câs une vore fuart e resistent, tant che une volte lu si doprave par fâ fravadure di cuviert.