Rèvelyon De La Sant-Savétro: Môda qu’est de fétar l’arrevâ du Novél An

Cél articllo est ècrit en arpetan supradialèctâl / ORB lârge.

Lo rèvelyon de la Sant-Savétro (le réveillon de la Saint-Sylvestre en francês) ou ben la velyê de doux ans (la vigilia di Capodanno en étalien) ou ben la nuet de la Sant-Savétro (la notte di San Silvestro en étalien, la nit de Cap d’any en catalan) est na môda qu’est de fétar l’arrevâ du Novél An, en velyent tant qu’à mié-nuet la nuet du 31 de dècembro, dèrriér jorn de l’an du calendriér grègorien.

Dens la plepârt des payis, contrèrament u rèvelyon de Chalendes que sè féte en famelye, celi du jorn de l’An sè féte g·ènèralament avouéc des amis. Arriér-més, o est pas lo câs dens tôs los payis, notament u J·apon, en Colombia, en Argentina et pués en Urugoay, yô que lo rèvelyon du Novél An sè féte tradicionalament en famelye. En Russia et dens les ôtres vielyes rèpubliques soviètiques, lo rèvelyon de la Sant-Savétro est fétâ en rèunéssent la famelye et los amis prôchos.

A côsa du dècalâjo horèro, les Iles de la Legne (la partia de Kiribati u cuchient de la legne entèrnacionâla de changement de dâta) et les iles Samoa (celes que sont endèpendentes) sont los premiérs endrêts a fétar lo Novél An et pués passar dens lo novél an pendent que les Samoa amèriquènes sont lo dèrriér endrêt a lo fâre.

Enqu’houé, la Sant-Savétro est fétâye dens quâsi tôs los payis du mondo. Y at doux-três èxcèpcions coment l’Arabia saoudita yô que la police religiosa fât rèspèctar lo calendriér islamico. Dens quârques payis, l’an civilo comence lo 1^ér de janviér mas la populacion âme mielx fétar lo Novél An tradicionâl coment en Ch·ina continentâla ou ben en Enda.

Articllos liyês

• lo jorn de l’An ;
• Sant Savétro.

Notes

Vocabulèro

Rèferences