Poliploidia zelula edo organismo batek kromosoma kopuru normalaren ordez kopuru horren multiploa den kromosoma-hornidura duenean gertatzen den mutazioa da.
Esaterako, kromosoma-hornidura diploide normala 2n bada (eta zelula haploidea: n), zelula edo organismo poliploide batek hiru aldiz kromosoma gehiago (3n) izan ditzake, edo lau aldiz (4n) gehiago. Ohiko kromosoma-hornidura (2n) handitzen da, eta kopuru poliploidea zenbaki haploidearen multiplo bat da (3n, 4n, 5n...).
Poliploidia meiosirik ezaren ondorioz gertatu ohi da. Hori dela eta, gametoek ez dute n kromosoma, 2n baizik. Gameto anormal batek (2n) gameto normala (n) ernaltzen badu sortutako zigotoa triploidea izango da (3n); ernalketa hori bi gameto anormalen (2n) artean gertatzen bada, sortutako zelula tetraploidea (4n) izanen da.
Poliploidia ez da urria bizidunen artean, askoz ohikoagoa izanik landareetan animaliengan baino. Landare poliploideek nekazaritza errendimendu handiagoa dutenez, modu artifizialean eragiten da sarritan poliploidia. Era horretan zereal, tomate eta fruta poliploide ugari lortu dira, ohikoak baino etekin handiagokoak.
Bi poliploide mota daude: autopoliploideak (poliploidea sortuko duten bi gametoak espezie berekoak direnean) eta alopoliploideak (gameto horiek espezie ezberdinetakoak direnean)
Poliploidia ez da oso ohikoa animalien artean: igelak, hainbat intsektu, zizareak eta arrain batzuk poliploideak izan daitezke.
This article uses material from the Wikipedia Euskara article Poliploidia, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Eduki guztia CC BY-SA 4.0(r)en babespean dago, ez bada kontrakoa esaten. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Euskara (DUHOCTRUNGQUOC.VN) is an independent company and has no affiliation with Wiki Foundation.
