Abū Nuwās al-Ḥasan ibn Hāniʾ al-Ḥakamī, cunnisciutu com'è Abu Nuwas (in arabu: ابو نواس, in persianu: ابونواس, in latinu: Abu Novas; Ahvaz, 756 - Baghdad, 814), fù un pueta arabu vissutu in u VIII seculu.
Natu in tarritoriu iranicu di mamma persiana è di babbu arabu, fù cunduttu ziteddu à Bàssora, è ci crisciti è furmò a so educazioni puetica probbia. Dopu à un sughjornu à Kufa, si stabilì à Baghdad, induva vissi - eccittuata una brevi parentesi in Egittu - par tuttu u restu di a so vita di libertinu raffinatu.
A so fama in u mondu arabu fù grandissima, com'è tistimunieghja a so prisenza stessa, accantu à u califfu Harun à u-Rashid, in i Milla è una notti; altrettantu grandi fù a so influenza nantu à a pustiriori puisia araba, di a quali custituì unu di i mudeddi più imitati.
L'opara di Abū Nuwās (littiralamenti quiddu di u ciuffu, sopranomu sceltu da u stessu pueta, chì in rialità si chjamava al-Hasan ibn Hāni') si culloca in u quatru di u vastu muvimentu di rinnuvamentu di a puisia araba iniziatu dighjà in ità omayyade, ma ghjuntu à maturazioni sottu i primi califfi abbasidi. Di tali rinnuvamentu - chì cuncipia a puisia com'è libara, immediata sprissioni è micca più com'è ripitizioni di schemi è moduli linguistichi di a classica puisia di u disertu - Abū Nuwās fù u maiori attori.
I temi principali di a so vasta opara, racolta in un canzuneri (dīwān) di u quali manca sempri un'edizioni critica cumpletta, sò privalintamenti quiddi erotichi è bacchichi, trattati à quandu incù diddicata è ancu malinconica sinsibulità, à quandu incù sprighjudicatu rialisimu, à quandu incù taglianti irunia, inoltri abbondani sceni di caccia incù discrizzioni di animali; ma ùn mancani micca qasida à a vechja manera araba, satiri, panigerichi è tuttu à fattu, à a fini di a racolta, puisii ascetichi.
In onori di Abū Nuwās hè statu battizatu u crateru Abu Nuwas, annantu à u pianeta Mercuriu.
'Ss'articulu pruveni in parti o in tutalità da l'articulu currispundenti di a wikipedia taliana.
This article uses material from the Wikipedia Corsu article Abu Nuwas, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Corsu (DUHOCTRUNGQUOC.VN) is an independent company and has no affiliation with Wiki Foundation.