Cebu (Sugbo e cebuano, Cebú e spagnoleg) zo un enezenn hag ur broviñs eus Filipinez, en enezeg Visayas, etre Negros ha Leyte.
Un enezenn hir eo Cebu, p’en em astenn war-hed 200 kilometr eus an norzh d’ar su ha war-hed un daou-ugent kilometr bennak eus ar c’hornôg d’ar reter, d’ar muiañ. En he c’hreiz ez eus menezioù a dizh 1 108 metr e menez Cabalasan. Trovanel eo an hinad. En-dro dezhi ez eus e-leizh a enezennoùigoù, evel Mactan, Bantayan, Daanbantayan... Kêr Cebu eo ar gêr-benn, hag unan eus porzhioù bras Filipinez eo, gant tost da 700 000 a annezidi.
Emañ Cebu etre inizi Negros er c’hornôg ha Leyte er reter. Un aerborzh etrebroadel zo en enezenn, e-kichen kêr Cebu.
Ergerzhet e voe ar vro gant ar Portugalad Fernão de Magalhães e 1521. War enezenn Mactan, e-kichen Cebu, e voe lazhet Magalhães d’ar 27 a viz Ebrel er bloavezh-se.
En enez Cebu e komzer unan eus yezhoù pouezusañ Filipinez, ar sinugboanon (cebuano). Komzet e vez ar yezh-se ivez bremañ e lodennoù zo eus Mindanao, e reter enez Negros, e kornôg hag e su enez Leyte, e Bohol hag e Samar.
Katoliged eo an darn vrasañ eus annezidi Cebu, met bez’ ez eus ivez muzulmiz, deuet eus Mindanao.
This article uses material from the Wikipedia Brezhoneg article Cebu, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Danvez a c'haller implijout dindan CC BY-SA 4.0 nemet ha notet e vefe ar c'hontrol. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Brezhoneg (DUHOCTRUNGQUOC.VN) is an independent company and has no affiliation with Wiki Foundation.