རྣམ་དབྱེ་བདུན་པ་གནས་གཞི་
རྣམ་དབྱེ་སྦྱར་སའི་གཞི་དེ་ལ་བྱ་བ་ཞིག་བྱས་པའམ་བྱེད་པ་དང་། གཞི་དེའི་ཆེད་དུ་བྱས་པ་དང་བྱེད་འགྱུར་གང་ཡང་མི་སྟོན་པར། གཞི་དེ་ལ་ཆོས་ཞིག་གནས་པར་ཙམ་སྟོན་པ་སྟེ། དཔེར་ན། རྩྭ་ལྷས་ན་རྟ་ཡོད་ཅེས་པས་གཞི་རྩྭ་ལྷས་སུ་རྟ་ཡོད་པ་ཙམ་ལས། གཞི་རྩྭ་ལྷས་ལ་བྱ་བ་ཞིག་བྱས་པའམ་བྱེད་པ་དང་། རྩྭ་ལྷས་ཀྱི་ཆེད་དུ་བྱས་པའམ་བྱེད་འགྱུར་ལྟ་བུ་གང་ཡང་མི་སྟོན། བར་གྱི་རྣམ་དབྱེ་མེད་ན་རྩྭ་ལྷས་རྟ་ཡོད་ཅེས་རྩྭ་ལྷས་དང་རྟ་གཉིས་སོ་སོར་ཡོད་པ་སྟོན་པ་ལས། རྩྭ་ལས་དེ་ཉིད་རྟ་གནས་སའི་གཞི་ཡིན་པར་གོ་མི་ནུས་སོ། ལ་དོན་བདུན་པ་གནས་གཞི་ལ་འཇུག་པ་དཔེར་ན། ཤར་ཕྱོགས་སུ་ཡོད། ལྷོ་ཕྱོགས་སུ་ཡོད། ནམ་མཁའ་རུ་ཉི་ཟླ་ཡོད། ལྷོ་རུ་རྒྱ་མཚོ་ཡོད། ནམ་མཁར་ཉི་ཟླ་ཡོད། ལྷོར་རྒྱ་མཚོ་ཡོད། ཐབ་ཏུ་མེ་ཡོད། ཁྲི་ཐོག་ཏུ་བཞུགས། ལག་ཏུ་སྨྱུ་གུ་ཡོད། བྱང་དུ་རླུང་ཆེ། ཞིང་དུ་མྱུ་གུ་སྐྱེས། ལྕགས་རི་ཚུན་ཆད་དུ་མི་ཁྱིམ་མང་། བར་ཤོད་དུ་མི་མང་། གཡོན་དུ་དཔེ་ཆ་ཡོད། མདུན་དུ་དཀར་ཡོལ་ཡོད། གནམ་དུ་འཇའ་ཚོད་བཀྲ། ལམ་དུ་མི་མང་། མཁར་དུ་བཟོ་ལས་ཡོད། ཤར་དུ་འཕྲུལ་འཁོར་མང་། བོད་ཡུལ་དུ་འབྱོར་པ་ཆེ། སྐྱེད་ཚལ་དུ་མེ་ཏོག་བཞད། ནམ་མཁའ་ན་ཉི་མ་ཤར། ས་གཞི་ན་རྩི་ཤིང་རྒྱས། རི་ན་རི་དྭགས་གནས། ཐབ་ན་མེ་ཡོད། སྤང་ན་མེ་ཏོག་བཞད། བྱང་ན་རླུང་ཆེ། བར་ཤོད་ན་མི་མང་། སྣོད་ན་དངོས་རྫས་མང་། མདུན་ན་དཀར་ཡོལ་མཛེས། གནམ་ན་འཇའ་ཚོན་བཀྲ། ལམ་ན་མི་ཡོད། མཁར་ན་བཟོ་གྲྭ་ཡོད། སྐྱེད་ཚལ་ན་རྨྱ་བྱ་ཡོད། ལྟ་བུའོ། ལ་ཡིག་ནི། ཤར་ཕྱོགས་ལ་ཡོད། ནམ་མཁའ་ལ་ཉི་ཟླ་ཡོད། ལྷོ་ལ་རྒྱ་མཚོ་ཡོད། བྱང་ལ་ལྷག་པ་ཆེ། ཁྲི་ཐོག་ལ་བཞུགས། རྒྱབ་ལ་ཡོད། ཐབ་ལ་མེ་འབར། ལྕགས་རི་ཚུན་ཆད་ལ་མི་ཁྱིམ་མང་། གཡོན་ལ་དཔེ་ཆ་ཡོད། མདུན་ལ་སྣག་བུམ་ཡོད། རྒྱལ་ཡོངས་ལ་མི་རིགས་མང་། གནམ་ལ་ཉི་ཟླ་སྐར་གསུམ་འཛོམས། མཁར་ལ་ཚོང་ཁྲོམ་ཆེ། རང་ཡུལ་ལ་བདེ་སྐྱིད་འཛོམས་ལྟ་བུའོ།
This article uses material from the Wikipedia བོད་སྐད article རྣམ་དབྱེ་བདུན་པ་གནས་གཞི་, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). དེ་མིན་གྱི་མཆན་འགྲེལ་ཡོད་ན་མ་གཏོགས། དྲ་བའི་ནང་དོན་ CC BY-SA 4.0 སྟེང་དུ་ཡོད། Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki བོད་སྐད (DUHOCTRUNGQUOC.VN) is an independent company and has no affiliation with Wiki Foundation.