ཁ་ཆེ་ཕ་ལུ།: ཁ་ཆེ་ལུ

ཆོས་ཀྱི་འབྱུང་ཁུངས་རྡོ་རྗེའི་ཁྲི་ཡི་ཐོག རྒྱབ་ཏུ་ཆོས་ཀྱི་བྲག་རི་དབུ་འཕང་མཐོ། མདུན་དུ་སྙིང་རྗེའི་མཚོ་མོ་འོད་ཀྱི་ཁེངས། དབྱར་དགུན་མེད་པ་ཉིན་མཚན་རིང་ཐུང་སྙོམས། དབྱར་ཁ་དྲོ་རྒྱུ་དགུན་ཁ་གྲང་རྒྱུ་མེད། དབྱར་དགུན་རིང་ཐུང་དྲོ་གྲང་ལྡན་པའི་ས། ཉི་མ་ནམ་མཁའི་དགུང་དུ་སླེབས་པའི་དུས། ཁང་ཁྱིམ་མུན་པ་གྲིབ་སོ་འཁོར་རྒྱུ་མེད། དེ་ཚོ་འཛམ་གླིང་ལྟེ་བའི་བརྟག་དཔྱད་ཡིན། ལྟེ་བ་དེ་ནས་ལྟེ་བའི་འགྲོ་བའི་ལམ། ལྟེ་བའི་ལྟེ་བ་དེ་ལ་ཕྱག་འཚལ་ལོ། བོད་ཀྱི་སྐད་དུ་དཀོན་མཆོག་རིན་པོ་ཆེ། རང་རེའི་སྐད་དུ་གོ་བརྡྭ་ཕྱག་འཚལ་ལོ། རྒྱ་གར་འཕགས་པའི་ཡུལ་དུ་འགྲོ་འདོད་ན། སེམས་པའི་ཡུལ་ན་གཏི་མུག་ཤུལ་མེད་བཟོས། འདོད་ཆགས་ནག་པོ་རྒྱ་མཚོའི་གཏིང་ལ་བསྐུར། ཆགས་སྡང་ཞེ་སྡང་དམར་པོའི་མེ་ལ་སྤོར། གཅིག་ལ་གཉིས་ཀྱི་འབྲེལ་སོ་མེད་ཟེར་ན། ཆོས་ལ་འགྲོ་ཆས་སྒྲིགས་ཤིག་ཕ་ཡི་བུ། འགྲོ་གིན་འགྲོ་གིན་ལྟད་མོ་མཐོང་མྱོང་ཡོང་ངོ་། བྱས་ཚད་ཆོས་དང་བཏང་ཚད་ལམ་ལ་འགྲོ། བསམ་ཚད་ཐོག་དང་དགོས་ཚད་ལག་ཏུ་ཐེབས། ལབ་ཚད་གཏམ་དང་དགོས་ཚད་འབེན་ལ་ཕོག དེ་འདྲའི་ས་རུ་འགྲོ་འདོད་ཡོད་ཟེར་ན། དགོས་རྒྱུའི་སྙིང་པོ་དོན་གྱི་རྡོ་ཁ་གསུམ། དང་པོ་སེམས་དཔའ་མེ་ལོང་བཞིན་དུ་དྭངས་གཅིག་དགོས། གཉིས་པ་དམ་ཚིག་གཙང་ཆུ་བཞིན་དུ་གཙང་གཅིག་དགོས། གསུམ་པ་ལ་རྒྱ་སེངྒེ་བཞིན་དུ་ཆེ་གཅིག་དགོས། དེ་གསུམ་འཛོམས་ན་དེ་རུ་སླེབས་པ་རེད། དེ་འདྲའི་སུ་རུ་སླེབས་པའི་ཕོ་གཞོན་ཚོ། རང་ལ་རང་གི་གོ་བ་མ་བསྐོན་ན། འཇིག་རྟེན་འདི་ཡི་འཁོར་དུ་ཐིམ་ཡོང་ངོ་། སང་སང་གནངས་གནངས་ཟེར་གྱིན་འགྱངས་ཡོང་ངོ་། དེ་དུས་འགྱོད་པའི་གླིང་ལ་བརྒྱབ་ཡོང་ངོ་། ཁ་སུར་སྡོང་པོ་སྐམ་པའི་རྡོ་ལ་སྐྱེས། ཡལ་ག་ལོ་འདབ་དེ་མ་ཐག་ཏུ་རྒྱས། འདབ་ལོ་རེ་རེའི་ཐོག་ཏུ་མཚན་རེ་འཁྲུངས། མཁས་པ་ཡོངས་ཀྱི་རིག་པ་མི་ཉམས་པ། ལྟེ་བའི་སྙན་ཞུ་ལྟེ་བའི་དྲུང་དུ་ཕུལ། བཀའ་ཤོག་རྒྱབ་དང་དམ་ཕྲུག་སྐུ་རྒྱབ་ཏུ། གཙུག་གི་ནོར་བུ་དོན་གྱི་རྡོ་ཁའི་ཚིག སྡིག་ཆེན་བད་དང་འཁོར་བའི་སེམས་ཅན་སོང་། ཆོས་ཀྱི་ལམ་སྣ་ཟིན་པའི་སྙན་ཞུ་དང་། འདི་དང་ཕྱི་མ་གཉིས་ཀྱི་རེ་ས་དང་། བློ་དང་སེམས་པ་གཉིས་ཀྱི་བཞག་ས་ལ། འབྲལ་བ་མེད་པར་ཐུགས་རྗེས་རྒྱང་ནས་གཟིགས། ཡེ་ཤེས་སྤྱན་གྱིས་གཟིགས་ནས་ཐུགས་ལ་ཞོག བྱམས་དང་བརྩེ་བས་བསྐྱངས་ནས་ལམ་སྣ་དྲོངས། སྐར་ཆེན་འོད་ཀྱི་གླིང་ལ་ཞལ་གཟིགས་ནས། སྐར་ཆུང་ཚིག་བརྒྱ་ལྔ་བཅུ་ང་གཉིས་བར། སྨྱུ་གུའི་བཤད་པ་སྨྱུ་གུས་གོ་སོང་ངོ་། ནག་པོའི་རི་མོ་དཀར་པོའི་ཚིག་གིས་ཁེངས། ཁ་ཆེ་ཕ་ལུའི་བསྙེལ་སོ་དྲན་བོས་ཕུལ། །

ཆོས་དང་འཇིག་རྟེན་ཁག་ཁག་སོ་སོ་རེད། སེམས་དང་ལུས་པོ་རང་རང་སོ་སོ་རེད། སེམས་པས་དཀའ་བ་སྤྱད་ནས་འགྲོ་འདོད་ཀྱང་། ལུས་པ་ཞིམ་པོ་བཟས་ནས་སྡོད་འདོད་ཆེ། ལུས་པོ་སྐྱིད་པོ་སྡོད་པ་ཞག་སུམ་དང་། སེམས་པ་སྡུག་པ་ཕུགས་ནས་ཕུགས་སུ་སྡུག སེམས་སྐྱིད་འདོད་ན་ལུས་ཀྱིས་དཀའ་བ་སྤྱོད། ལུས་པོ་བསམས་ན་སེམས་པ་སྡུག་ལ་སྦྱོར། ང་ལ་ཉན་ན་ལུས་སེམས་དབྱེ་བ་ཆོད། གསེར་དང་རག་རྒན་བརྗེ་མི་སྨྱོན་པ་རེད། གཡུ་དང་དོ་ལོ་ནོར་ན་ལྐུགས་པ་རེད། འདི་དང་ཕྱི་མའི་ཁེ་གྱོང་མི་ཤེས་ན། འཇིག་རྟེན་འཁོར་བའི་མི་ཚེ་འཁྱོལ་འགྲོ་ཟེར། ལོ་གཅིག་ལོ་གཉིས་མི་དགོས་བརྒྱ་ཡི་བར། ཐ་མ་ས་རྡོའི་ཕུང་པོ་ས་ལ་ཐིམ། རྒྱལ་པོ་གསེར་ཁྲིའི་སྟེང་དུ་བཞུགས་པ་དང་། སྤྲང་ཕྲུག་བེན་པོའི་འོག་ཏུ་སྡོད་པ་གཉིས། མི་རྟག་འཆི་བ་བྱུང་དུས་འདྲ་འདྲ་རེད། ཟས་ཀྱི་ཞིམ་མངར་ལྕེ་ནས་མིད་པའི་བར། འཁོར་བའི་སྐྱིད་སྡུག་ཞག་གསུམ་འདི་ཡི་རིང་། སྤྲང་པོ་སྡུག་ཀྱང་མི་ཚེ་འཁྱོལ་འགྲོ་ལོ། རྒྱལ་པོ་སྐྱིད་ཀྱང་ཐ་མ་ཤི་འགྲོ་ལོ། དེ་སྔ་སོང་བའི་གྲངས་ཀ་མི་ཤེས་འདུག ད་དུང་འགྲོ་རྒྱུའི་གདེང་ཚོད་སུ་ཡིས་ཤེས། ཡོང་གིན་ཡོང་གིན་འགྲོ་གིན་འགྲོ་གིན་འདུག དོན་དུ་ཡོང་མི་ཚང་མ་འགྲོ་མི་རེད། འཁོར་བ་འདི་ལ་རྟག་པ་གཅིག་ཀྱང་མེད། རྟག་པ་མེད་པ་བདེན་པ་སུ་ལ་ཡོད། རྟག་པ་བརྟན་པ་མེད་པའི་མི་ཚེ་འདི། ལ་འགོའི་ཁ་ཡི་ཁྲི་གདུགས་ཉི་མ་འདྲ། བྱོན་ན་མ་གཏོགས་བཞུགས་རྒྱུ་ཡོང་མདོག་མེད། ད་དུང་ཕྲུ་གུའི་སྣང་བས་མ་ཡེངས་པར། མཁས་པ་ཡིན་ན་དོན་གྱི་རྡོ་ཁ་སྒྲིལ། དོན་རྩ་བསྒྲིལ་ན་དཔའ་བོའི་ཡང་རྩེ་རེད། འཇིག་རྟེན་འཁོར་བའི་ལས་ལ་སྙིང་པོ་མེད། འཁོར་བ་གཏན་དུ་སྡོད་པའི་ས་མ་རེད། འགྲུལ་པ་ཞག་གསུམ་གནས་ཚང་གནས་མགྲོན་རེད། སོ་སོའི་བསམ་བློ་སོ་སོས་བཏང་བ་དགའ། འགྲུལ་པ་འགྲོ་ཆས་སྔོན་ནས་མ་བསྒྲིགས་ན། གནས་ཚང་རྒྱབ་ཏུ་ཁྱེར་ནས་འགྲོ་རྒྱུ་མེད། གནས་མོ་རོཊ་ལ་ཁྲིད་རྒྱུ་ཡོད་མདོག་མེད། རང་ནོར་རང་ལ་བདག་དུས་བསམ་བློ་ཐོངས། ལྡེ་མིག་མི་ལ་ཤོར་དུས་ འགྱོད་པའི་རྒྱུ། ཕ་མཤི་བ་མང་པོ་བྱུང་ཡོད་འགྲོ། ཕྲུ་གུ་བསྡད་པ་མང་པོ་མཐོང་ཡོད་འགྲོ། ཨ་མའི་རྗེས་སུ་ཨོ་ལོ་འགྲོ་མདོག་མེད། ཨ་མའི་མཇུག་ལ་བུ་མོ་འགྲོ་མདོག་མེད། སོ་སོའི་ནམ་དུས་སོ་སོས་བསྐྱལ་ནས་འགྲོ། ཁྱོད་རང་ཁྱོད་རའི་བསམ་བློ་ཁྱོད་རས་ཐོངས། གཅིག་པུར་འགྲོ་བའི་ལམ་གྱི་ལམ་ཆས་འདི། སྔོན་སྔོན་སྔོན་ནས་སྤྲང་པོའི་ལག་སྐུར། ནོར་གྱི་རྟ་ལ་འགྲོ་བའི་བང་འགྲོས་སློབས། ཕྱི་མ་འགྲོ་བའི་ལམ་ལ་ཐོན་ཆོག་གྱིས། ཕ་རོལ་ཕྱུག་པོ་ལོངས་སྤྱོད་དགོས་འདོད་ན། འདི་རུ་སྤྲང་པོའི་སྐྱིད་སྡུག་བལྟས་པ་བཟང་། ས་ཡི་འོག་ཏུ་ཁམ་བུ་ཟ་འདོད་ན། ས་སྟེང་འདི་རུ་ཁམ་སྡོང་བཙུགས་པ་བཟང་། ཀུན་ལ་བདེ་བའི་རྩ་བ་བཙུགས་པ་བཟང་། ཆོས་ཀྱི་རྩ་བ་མི་སེམས་འཛིན་རྒྱུ་མེད། ཆོས་ཀྱི་སྙིང་པོ་གཞན་དོན་འགྲིག་ལེ་རེད། ཁྱོད་རང་ཁྱོད་རའི་འདོད་པ་ཟིན་འདོད་ན། ཆང་དང་ཨ་རག་དེ་ལས་ལྷག་པ་མེད། ང་ང་ང་རྒྱལ་ཟེར་བའི་བང་རྒྱས་ཅན། གསེར་དངུལ་ཟངས་དང་གཏམ་དོན་ང་ཟེར་ཞིང་། ཞིམ་པོ་ང་དང་འཇམ་པོ་ང་ཟེར་གྱི། ལེགས་པོ་ང་དང་མཛེས་པོ་ང་ཟེར་གྱི་ གནས་བཟང་བསྐོར་ཀྱང་རྐང་ཆུང་ན་རོགས་རེད། རི་ཁྲོད་འགྲིམས་ཀྱང་རྣ་ཅོག་ཚ་རོགས་རེད། རླུང་ལ་གཅུས་བསྐོར་མཐོང་ཡང་སྟོང་པ་རེད། རྡེའུ་བཅུད་ལེན་རང་སྡུག་རང་གིས་ཉོས། བྱ་ལུགས་བྱེད་ལུགས་ལྡན་པའི་ཕ་རྒན་ཚོ། འདོད་པ་ཅན་གྱི་ཆོས་པ་བརྒྱ་ལས་ལྷག རང་འདོད་ཅན་གྱི་མི་ལ་ངོ་ཚ་མེད། ངོ་ཚ་མེད་པའི་མི་དེ་དུད་འགྲོའི་རྒྱུད། བུ་མོ་རྒྱན་དང་གོས་ཀྱིས་སྤུད་གྱུར་ཀྱང་། ནོར་བཟང་རྒྱ་ལུའི་བཙུན་མོར་ཉར་མདོག་མེད། སེམས་གོས་མ་ཆོད་ལྷ་ཆོས་བྱས་གྱུར་ཀྱང་། མེ་ལོང་མུན་པའི་གླིང་དུ་གསལ་མདོག་མེད། ཆུ་འཐག་གླང་གི་མིག་དེ་ཡོལ་བས་བསྒྲིབས། ཉིན་གང་སོང་ཡང་དགོང་མོ་ས་དེར་ལུས། འདོད་པའི་ཞགས་ཐག་རྐང་ནས་མ་ཁྲོལ་ན། ལྷ་ཆོས་བྱས་སོང་ཟེར་ཡང་སྟོང་པ་རེད། གཤོག་སྒྲོ་དར་གྱི་སྐུད་པས་བསྡམས་པ་ན། རྒོད་པོ་ཡིན་ཀྱང་ནམ་འཕང་གཅོད་མདོག་མེད། དམ་ཚིག་སེམས་དང་བརྩོན་འགྲུས་སྙིང་ནས་དགོས། ཐུག་རྒྱུ་གང་ཡོད་ཅི་ཡོད་སེམས་ལ་ཐུག ལམ་བུ་འདི་ནི་སེམས་པ་དྲུང་གི་ལམ། སེམས་ལ་གད་བདར་ཡང་ནས་ཡང་དུ་རྒྱོབ། ཚང་མ་སྨོན་རྒྱུ་ཨེ་ཡོང་ལྟོས་ཤིག་ཨང་། གཏམ་བཟང་ཁྱེར་རྒྱུ་ཨེ་ཡོང་ལྟོས་ཤིག་ཨང་། སྲོལ་བཟང་ཞོག་རྒྱུ་ཨེ་ཡོང་ལྟོས་ཤིག་ཨང་། དེ་གསུང་འཛོམས་ན་དང་པོའི་དང་པོ་རེད། ཁ་ཆེ་ཕ་ལུའི་སྙིང་གཏམ་བཤད་ཡོད་དོ། ཉན་དང་མི་ཉན་སོ་སོའི་བསམ་བློ་རེད། ཡིན་ཀྱང་རྒྱ་ཤོག་རི་མོས་འཁེང་སོང་ངོ་། རྒྱ་སྨྱུག་སེར་པོའི་བླ་ཁ་རྫོགས་སོང་ངོ་། །

རྒྱལ་པོ་ཆེན་པོ་ཡུལ་གྱི་རྒྱན་ཆ་རེད། ཁྲིམས་དང་མཐུན་ན་རྒྱལ་གཞིས་མངའ་ཐང་ལྡན། ཁྲིམས་འགོ་ནོན་ན་བསམ་དོན་ལྷུན་གྱིས་གྲུབ། ཁྲིམས་གཞུང་ལྡན་ན་བདེ་སྐྱིད་ཕུན་སུམ་ཚོགས། མཚོ་མོ་འཁྱོམས་ན་ཉ་མོ་ལས་ཀྱིས་འཁྱོམས། ལུང་པ་དབུལ་ན་རྒྱལ་པོ་ལས་ཀྱིས་དབུལ། རྗེ་དཔོན་དར་ཞིང་རྒྱལ་པོའི་ས་སྡེ་འཕྲུལ། ཡུལ་སྡེ་མེད་པའི་རྗེ་དཔོན་དགོད་རེ་བྲོ། དཔོན་འབངས་མེད་ནད་པ་ཨེམ་རྗེའི་དཔེ་བཞིན་དུ། གཙག་བུ་བཙུགས་པའི་ཤུལ་ལ་རྨ་སྨན་ཐོབས། བཀའ་བཀྱོན་དགོངས་འཚོམས་གཞུག་ལ་བྱམས་སྐྱོངས་མཛོད། དང་པོ་ཉེས་པ་བཅའ་ཡང་ཕེབས་དང་བསྟུན། གཉིས་པ་ཉེས་པའི་ཐོག་ཏུ་ཉེས་རྡུང་ཐོངས། གསུམ་པ་མི་ངན་རྩ་མེད་བཟོས་ཀྱང་རུང་། དེ་འདྲའི་མི་ལ་སྙིང་རྗེ་ལྟ་དགོས་མེད། ལུ་གུ་མ་འཁྱེར་གོང་ལ་སྤྱང་ཀི་སྲུངས། ཡུལ་བདེ་མ་འཁྱོམས་གོང་ལ་མི་ངན་ཕུད། རྒྱལ་པོ་ཞོ་ལྟར་ཆགས་ནས་ཉལ་བསྡད་ན། ཡུལ་སྡེ་ཁྲག་ལྟར་འཁྲུགས་པ་མི་ཤེས་སོ། ལུག་རྫི་ཇ་ཆང་གཉིས་ལ་མགོ་འཁོར་ན། ལུ་གུ་སྤྱང་ཀིས་འཁྱེར་བ་དངོས་བདེན་རེད། གང་ལ་མཁས་པའི་མི་དེ་ལས་ལ་མངགས། ཤིང་བཟོ་མཁས་ཀྱང་ལྷ་བྲིས་ཡོང་མདོག་མེད། སྤྱང་ཀི་དགའ་ཡང་ལུག་རྫིས་ཉན་མདོག་མེད། ལས་འབྲས་ཅན་ལ་མི་ཡི་རྗེ་དཔོན་སྐོས། ལུ་གུ་སྤྱང་ཀའི་ཁ་ལ་བཅུག་ཡོང་ངོ་། ཡོན་ཏན་ཅན་ལ་དོན་གྱི་རྡོ་ཁ་སྒྲིལ། ནོར་བུ་དགོས་ན་རྒྱ་མཚོའི་གཏིང་ལ་ཡོད། དམ་ཚིག་གཙང་མའི་མི་ལ་བློ་གཏད་བཅོལ། རྡོ་རྗེ་བྲག་ལ་འགྱུར་བ་ཅི་ལ་སྲིད། ཉིན་མཚན་མེད་པར་མཁས་པའི་མི་དང་བསྟུན། ཚ་ཁའི་ཁྱི་རོ་མཐའ་མ་ཚ་ལ་འགྲོ། ཤ་ཚ་ཅན་ལ་སྐྱོང་མཐར་རིམ་པ་སྤྲོད། བྱས་རྗེས་དྲུད་ཤུལ་བྱུང་ན་བློ་ཁ་རྫོགས། བྱས་པ་ཅན་གྱི་སེམས་པ་ཕམ་མ་འཇུག བྱེད་རྒྱུ་མདུན་དུ་ཡོད་དུས་བྱེད་མཁན་མང་། བློ་གཏད་བཅོལ་མི་རྣམས་ཚོ་མཐའ་ནས་བསྐོར། འཛམ་བུའི་གླིང་འདིར་གཏམ་བཟང་སྐད་ཀྱིས་ཁེངས། དཔའ་རྩལ་ཅན་ལ་དལ་དུས་བདག་པོ་སྤྲོད། འགག་རྩར་ཐུག་དུས་དགོས་པའི་དུས་ཤིག་ཡོང་། རྒྱུན་དུ་བང་མཛོད་ནོར་གྱིས་རྒྱོང་རྒྱུ་གྱིས། རྐྱེན་རྩ་ལྷག་ཡོང་དགྲ་བོ་མཆོངས་ཡོང་ངོ་། དགྲ་མགོ་འདུལ་བར་དགོས་རྒྱུའི་དགོས་ཆ་གཉིས། ནོར་དང་དཔུང་གིས་དགྲ་བོ་ཆམ་ལ་འབེབས། ནོར་རྫས་མེད་པར་དཔུང་རོགས་ཡོང་ཐབས་མེད། དཔུང་རོགས་འཚོལ་བར་ནོར་རྫས་མེད་ཐབས་མེད། དེ་གཉིས་འཛོམས་ན་དགྲ་བོ་ལས་ཀྱིས་འཇོམས། ནོར་ལ་ཕ་མས་བུ་ཚ་གསོ་གསོ་མཛོད། ལོ་མང་སོང་བའི་རྒད་པའི་ཁ་ལ་ཉོན། སྐྱིད་སྡུག་མང་པོ་མྱོང་བའི་མི་རྒན་རེད། ལྕགས་ཀྱི་ལྕགས་རིའི་མཚམས་སུ་སླེབས་པའི་དུས། གཞོན་པའི་ཤེད་ལས་རྒད་པའི་ཇུས་བྱ་བཟང་། དགྲ་བོ་འཕྲལ་གང་འཕྲལ་ལ་འདུལ་འདོད་ན། སྐབས་ཐོགས་གྲོགས་ལ་བཀུག་ནས་བསྡད་པ་བཟང་། ཐབས་ཀྱི་སྒོ་ནས་དོན་རྩ་ལེན་ཟེར་ན། མདའ་གྲི་མདུང་གསུམ་འཕྱར་རྒྱུ་སྨྱོན་པའི་ལས། མི་ཐུབ་དགྲ་དང་འཛིང་འཛིང་བཞག་པ་དགའ། འཛོག་རུམ་གཙག་བུའི་སྟེང་དུ་རྒྱག་མདོག་མེད། འདན་མ་མི་དགོས་དེ་སར་དངོས་ཡིན་ཀྱང་། འགྲིག་ཙམ་བྱུང་ན་འགྲིགས་པ་གཙོ་དོན་ཆེ། གདོང་བསུ་དཔའ་བོ་རྒྱལ་ཁམས་ཉེས་སུ་ཁག ཐབས་རྣམས་འཕྲུལ་གྱི་མེ་མདའ་རྒྱང་ནས་འཕེན། དང་པོ་ཐབས་རྣམས་དགུ་བཅུ་གོ་དགུ་གཏོད། རྒྱ་ལ་འཁྲུག་དགོས་བྱུང་ཡང་བྱ་ཐབས་མེད། གོ་བོ་མེད་པའི་མི་དེ་ཁྱི་ལས་ལོད། ཁྱི་ངན་བྱུང་ན་བེར་ག་རྣ་ལ་དཀྲི། ཕྱིན་ཐོངས་ཟེར་ན་ཕྱིན་རྒྱུའི་ལམ་བུ་ཐོངས། འཛིང་ཐོངས་ཟེར་ན་གོམ་གསུམ་སྔོན་ལ་སྤོས། འཛོམ་རེ་ཁོང་ཁྲོ་སློང་དུས་མ་དྲན་ན། རྗེས་སུ་དྲན་ན་རང་གི་ཁ་ལ་རྒྱོབ། དོན་རྩ་འཇམ་པོའི་སྒོ་ནས་ལོན་ཟེར་ན། ང་རྒྱལ་ཁོང་ཁྲོ་དོན་མེད་སྟོང་པ་རེད། ཁོང་ཁྲོ་དབང་དུ་འདུས་ན་མཁས་པའི་རྟགས། ཁོང་ཁྲོའི་རྗེས་ལ་འགྲོ་མི་གླེན་པ་རེད། བསམ་བློ་སྔོན་ལ་ཐོངས་ན་མཁས་པ་ཡིན། རྐྱེན་རྩ་མདུན་དུ་ལྷག་པ་སུས་ཀྱང་མཐོང་། དུང་དཀར་གཡས་འཁྱིལ་གཅོག་པ་སུས་ཀྱང་མཐོང་། ཆག་པ་སྒྲིག་དགོས་བྱུང་ན་ཉ་སྒྲིག་ཡོང་། དགྲ་བོ་མགོ་བོ་བསྒུར་ནས་སླེབས་བྱུང་ན་། སྙིང་གི་ཁོང་ཁྲོ་སེམས་ཀྱི་གཏིང་ནས་ཐོན། མགོ་བོ་བསྒུར་བའི་དགྲ་བོ་ཕམ་མ་འཇུག ཡིན་ཀྱང་ཁྲམ་དང་གཡོ་སྒྱུར་དོགས་ཟོ་དགོས། གཙང་པོ་མཁར་གྱི་དཀྱིལ་ཞབས་རྒྱུགས་པ་དེ། རགས་རྒྱག་མ་བྱུང་མཐའ་མར་མཁར་ལ་གཤེད། ངན་པ་བསྐྱངས་ན་བཟང་པོ་བརྡུངས་པ་འདྲ། རྐུན་པོ་གསོས་ནཆོས་པ་བསོད་པ་འདྲ། དུག་སྦྲུལ་བཞག་ན་མགོ་ནག་མི་ལ་གནོད། སྤྱང་ཀི་བཞག་ན་གཡང་དཀར་ལུག་ལ་ངན། ཁྱི་ཡིས་མི་ལ་རྨུགས་པ་ཡིན་མི་ཞུ། ཁྱི་ངན་བདག་འཛིན་བྱེད་མཁན་མི་ངན་རེད། དགྲ་མགོ་འདུལ་མཁན་གཉེན་མགོ་སྐྱོང་མཁན་དགོས། འཇམ་རང་དྲགས་ན་དགྲ་བོ་གཉའ་རེངས་ཡོང་། གྱོང་རང་དྲགས་ན་འགག་ལ་ཐུག་པའི་ཉེན། འཇམ་རྩུབ་བསྲེས་ནས་ཀུན་ལ་འདུལ་ལུགས་མཛོད། དགྲ་གཉེན་ཚང་མ་ཐབས་ཀྱིས་གྲོགས་སུ་ཁུགས། འཕྲལ་དང་ཕུགས་ཀྱི་རྒྱལ་ས་འཛིན་འདོད་ན། ཉི་རིང་མེད་པར་གསེར་ཁྲིའི་ཐོག་ནས་དྲོངས། ཡུལ་བདེ་མི་བདེ་ཡོང་བའི་དགོངས་པ་དང་། དགོང་མོ་ས་ལ་བབས་ཚེ་ཆོས་ལ་འབུངས། ལུས་ངག་ཡིད་གསུམ་ཕྱག་འཚལ་སྨོན་ལམ་ཐོབས། གཏན་གྱི་རེ་ད་དཀོན་མཆོག་གསུམ་ལ་ཞུ། རིན་ཆེན་སྐར་མའི་བདག་པོའི་བཀའ་དང་བསྟུན། འདི་ཕྱི་གཉིས་ཀྱི་དབུ་འཕང་མཐོ་དགོས་ན། མི་རྟག་འཆི་བ་མ་བརྗེད་ཐུགས་ལ་ཞོག འདོད་འདོད་ཁ་ཆེ་ཕ་ལུའི་གྲོས་གྲོས་ཀྱི། དོན་གྱི་སྙན་ཞུ་མུ་ཏིག་དར་ལ་བརྒྱུས། ཁམས་གསུམ་དབང་འདུས་དྲུང་དུ་ཕུལ་ཡོད་དོ། རིན་ཐང་སྐོར་དུས་བརྒྱ་སྟར་གྲངས་སུ་ཚུད། །

འཇིག་རྟེན་འདི་རུ་སྒང་གཤོངས་མང་ཞིག་འདུག སྐྱིད་སྡུག་རིང་ཐུང་སྦོམ་ཕྲ་གྲངས་མེད་རེད། འདྲ་འདྲ་གཅིག་ཀྱང་མེད་པ་མཐོང་གསལ་རེད། འདི་ལ་ཆོག་ཤེས་རང་གིས་བྱས་པ་དགའ། ཐོད་པའི་རི་མོ་བསུབས་ཀྱང་ཟུབ་རྒྱུ་མེད། དེ་ལས་རི་མོའི་འགྲོ་ལུགས་བསྟུན་པ་དགའ། ལྕོག་རོང་བོང་བུ་སྡུག་ཀྱང་རང་སྡུག་རེད། སྒལ་པའི་རྒྱབ་ཁུར་མ་འཁྱེར་ཀ་མེད་རེད། སེམས་གོས་ཆོད་ན་ནོར་ལ་མང་ཉུང་མེད། ཆོག་ཤེས་མེད་པའི་རྒྱལ་པོ་སྤྲང་པོ་དང་། སེམས་གོས་ཆོད་ན་སྤྲང་པོ་དེ་ལས་ལྷག རྒྱལ་པོ་རྒྱལ་གཞིས་ཟོས་ནས་ལྟོགས་ལྷང་ལྷང་། སྤྲང་ཕྲུག་ཐང་རྐྱལ་ཁེངས་ནས་སྤོ་དགྱེ་དགྱེད། བཀོད་པའི་ལས་ལ་ཆོག་ཤེས་མ་བྱས་ན། རང་སྡུག་རང་གིས་ཉོ་བ་དོན་མེད་རེད། ཆོག་ཤེས་ལྡན་ན་ཕྱུག་དང་མ་ཕྱུག་མེད། ལས་ལ་བཀོད་ན་དགྲ་ནོར་རང་གི་ནོར། མ་བཀོད་ཕ་ནོར་བུ་ལ་བདག་པ་དཀའ། ལྗང་པ་རྡོ་ཡི་སྟེང་དུ་སྐྱེ་མདོག་མེད། སྦག་སྦག་སིག་སིག་བྱས་པ་ཅི་ལ་ཕན། སེམས་པ་ཤོར་ན་ཕ་བཟང་བུ་ལ་ཤོར། ཆོག་ཤེས་བྱས་ན་ལུས་སེམས་བདེ་ལ་འཇོག ལག་ལེན་ངན་པའི་རིགས་ལ་སྤང་བྱ་གྱིས། ཕ་བདེ་བུ་སྐྱིད་ཡོང་བའི་བསམ་བློ་ཐོངས། འདི་ཕྱི་གཉིས་ཀྱི་གཏམ་དོན་ལག་པའི་མཐིལ། ཁ་ཆེ་ཕ་ལུའི་སྙིང་གཏམ་ཁ་ནས་ལུས། སྙིང་གི་བུ་ཚོ་སྙིང་ནས་རྣ་བ་ཉོན། གོ་བ་ཡོད་ན་གོ་རྒྱུ་བཤད་ཡོད་དོ། མང་པོ་མེད་ཀྱང་བྲོ་བ་བཅུད་དང་ལྡན། །

དབྱར་ཁ་ལྕགས་དང་དགུན་ཁ་རྫ་ལ་ལྟོས། དབྱར་དགུན་མེད་པར་དམར་པོའི་ལྕེ་ལ་ལྟོས། སྙིང་གཏམ་སྙིང་གི་གྲོགས་ལ་ཤོད་ཚོད་གྱིས། སྔ་གྲོགས་དགོང་དགྲར་སོང་བ་མང་པོ་ཡོད། གསེར་དངུལ་མི་ལ་བཅོལ་དགོས་བྱུང་ཡང་ཆོལ། བཅོལ་པོ་བརླག་ཀྱང་བཙལ་ནས་རྙེད་པ་རེད། སྙིང་གཏམ་མི་ལ་བཅོལ་བཅོལ་མང་དྲགས་ན། ལག་མགོ་ཁ་ལ་བཅུག་ནས་སྡོད་དགོས་ཡོང་། གཏམ་གྱི་བདུད་པོ་སྙིང་གི་དོང་དུ་ཚུད། ཁ་ལ་ལྕགས་དང་ལྕེ་ལ་སྒོ་ལྕགས་རྒྱོབ། བདུད་པོ་དོང་ནས་ཤོར་ན་མི་ཕོ་གསོད། འ་རྫི་བྱས་པ་ཙམ་གྱིས་ཅི་ལ་ཕན། མི་ཤོད་དགུ་ཤོད་ཤོད་རྒྱུ་མང་དྲགས་ན། མི་ལ་མ་ཤོད་ཟེར་གིན་སྡོད་དགོས་ཡོང་། ནར་ནར་ལྕེ་ལ་བདག་པོ་མ་བརྒྱབ་ན། རིལ་རིལ་དབུ་ལ་འོ་རྒྱལ་བཟོས་ཡོང་ངོ་། མ་བཤད་གཏམ་དེ་ག་དུས་བཤད་བཤད་རེད། བཤད་ནས་འགྱོད་དགོས་བྱུང་ན་ཐ་མའི་ལས། མ་བཤད་བར་དུ་གཏམ་ལ་རང་དབང་ཐོབ། བཤད་ནས་གཏམ་གྱི་དབང་དུ་ཤོད་མཁན་ཚུད། བཟང་པོ་ཡོངས་ལ་ངན་པ་ལབ་ཉེན་ཆེ། བཟང་པོའི་བསླབ་བྱ་ངན་པའི་དགྲ་ལ་འགྲོ། དེ་ལས་བཟང་ངན་ཚང་མ་བཟང་པོས་སྐྱོངས། བཟང་པོ་དགྲ་མགོ་ངན་པོས་བཟློག་པས་བསྟུན། གཏམ་ལ་དྲང་བའི་མི་དེ་སེམས་ནས་དྲང་། སེམས་པ་དྲང་ན་ཆོས་ཀྱི་ལམ་སྣ་ཟིན། ད་ལྟ་དེ་ལས་ཕུགས་ཡུལ་སྐྱིད་ཀྱང་སྐྱིད། འདི་ཕྱི་གཉིས་ཀྱི་བསམ་དོན་ལྷུན་གྱིས་འགྲུབ། ཁ་ཆེ་ཕ་ལུའི་འདོད་དང་སྣག་སྨྱུག་ཐུག དཀར་པོའི་ཐོག་ཏུ་ནག་པོའི་བྲིས་ཆ་གསལ། བྲིས་མི་ས་འོག་བྲིས་ཆ་ས་ཡི་ཐོག འཛམ་གླིང་མ་བསྙེལ་བསམ་བློའི་དྲན་གསོ་མཛོད།

འཛམ་གླིང་མེ་ལོང་ཕར་བལྟ་ཚུར་བལྟ་རེད། འཁོར་བ་བྲག་རི་བཞིན་དུ་ཁ་ལན་སློག རང་གིས་གར་བལྟས་མེ་ལོང་ནང་དུ་གསལ། རང་གིས་གང་ལབ་བྲག་རིས་ཁ་ལན་སློག བཟང་ན་བཟང་དང་ངན་ན་ངན་གྱི་ལན། འདི་ནི་ཡོང་རྒྱུ་འཇིག་རྟེན་འཁོར་བའི་ལས། ཚང་མ་སྨོན་པའི་འདོད་པ་མེད་ཟེར་ན། གཞན་ལ་མ་ལབ་རང་ལ་དྭོགས་ཟོན་གྱིས། ཚང་མ་རང་གི་མདོག་དང་མཐུན་ཡོང་ངོ་། གང་བྱས་ལག་པའི་མཐིལ་དུ་གསལ་ཡོང་ངོ་། གཞན་ལ་དགའ་ཚོད་ཁྱེད་རང་དགའ་མེད་ཡིན། གང་ལྟར་བཟང་ལ་ངཟང་དང་ངན་ལ་ངན། དུག་ཤིང་སྡོང་པོས་ཁམ་བུ་སྟེར་མདོག་མེད། ཁམ་བུ་དགོས་ན་ཁམ་སྡོང་འགྲམ་ལ་སོང་། རིན་ཆེན་གསེར་གྱི་འདོད་པ་ཡོད་ཟེར་ན། དོན་མེད་མུན་པའི་གླིང་དུ་མ་སོང་ཞིག གཞན་ནས་ལགས་ལགས་ལུགས་ལུགས་དགོས་ཟེར་ན། རང་ལ་ལགས་ལགས་ལུགས་ལུགས་མང་ཉུང་དགོས། ཆེ་འདོད་ཅན་ལ་ཆེ་བ་ཡོང་ང་དཀའ། དེ་ཡི་ཐབས་ལ་ཆེ་འདོད་བཞག་པ་དགའ། བྱམས་པོ་བྱས་ན་དགྲ་ཡང་གཉེན་ལ་འགྲོ། རྩུབ་ཚོད་མ་ཟིན་བུ་ཡང་ཞེན་པ་ལོག ཐོད་པའི་རི་མོ་གྱེན་ལ་ཡོད་པའི་མི། སོ་དཀར་འཛུམ་ལེགས་མི་སེམས་འཛིན་པར་མཁས། ལས་བཟང་བྱས་ནས་ཐར་པའི་ལམ་བུ་ལ། གཏམ་བཟང་ཁྱེར་ནས་སོང་ཞིག་ཕ་ཡི་བུ། རི་མི་ཐུར་ལ་ཡོད་པའི་མི་ངན་ལ། དུག་སྦྲུལ་ཁྱི་སྨྱོན་གཉིས་ཀྱི་བརྟག་དཔྱད་ཚང་། ཉིན་མཚན་མེད་པར་རྨུག་རྒྱུ་ཁོ་ལས་མེད། ལག་ལེན་ངན་པའི་ཐལ་བ་བསླངས་ནས་འགྲོ། བཟང་པོ་འོངས་པའི་རྗེས་ལ་གཏམ་བཟང་ཡོད། བཟང་པོའི་ལོ་ལ་བཟང་པོའི་འབྲས་བུ་སྨིན། ངན་པའི་འབྲས་བུ་ངན་པའི་སྐེ་ལ་འཁྲིལ། ངན་པའི་རྗེས་ལ་ལྟས་ངན་གཏམ་ངན་ཡོད། རྒྱ་སྨྱུག་སེར་པོའི་ཁ་ནས་ཚིགས་གསུམ་ལུས། རྒྱ་ཤོགས་དཀར་པོའི་སེམས་ལ་གསལ་ཡོང་ངོ་། རྒྱ་སྐད་བོད་ཀྱི་སྐད་ལ་འགྱུར་ཡོང་ངོ་། ཁ་ཆེ་ཕ་ལུའི་བློ་ཐག་ཆོད་སོང་ངོ་།

དམའ་ས་བཟུང་ནས་གང་ཅིར་བཟོད་པ་བསྒོམས། དོན་གྱི་རྡོ་ཁ་རང་གྱི་སྙིང་དུ་ཞོག མི་སེམས་འཛིན་པའི་སྐད་ཆ་ཤོད་ཀྱིན་སོང། རང་འདོན་སྒྲིག་པའི་ཇུས་ཆ་གཏོང་གིན་སོང། སྟོང་པ་ཁ་ཡིས་ཁེངས་པའི་དོན་རྩ་ལོངས། དེ་འདྲའི་ཐབས་ལ་དམའ་ས་བཟུང་བ་དགའ། དམའ་ས་བཟུང་བའི་མི་ལ་དགའ་མཁན་མང་། དེ་འདྲའི་མི་ལ་ཡིད་ནས་ཕན་མཁན་མང་། མི་ཚེ་ཇ་ཆང་ལོངས་སྤྱོད་ངང་དུ་འགྲོ། འདིར་བཞུགས་འདིར་འབྱོན་ཟེར་མཁན་མང་པོ་ཡོང་། འདོད་པའི་རྟ་རྒོད་ཚོད་ཀྱི་སྲབ་ཁ་འཐེན། གང་ས་ཅི་ཐད་རང་ཚོད་རང་གིས་ཟུངས། འགྲོ་ཚོད་སྡོད་ཚོད་ཤོད་ཚོད་བྱེད་ཚོད་དང་། སྐྱིད་པོ་བྱེད་ཚོད་སྡུག་པའི་འཁུར་ཚོད་དང་། ཞིམ་པོའི་ཟ་ཚོད་འཇམ་པོའི་གྱོན་ཚོད་རྣམས། མི་ལ་ཚང་ན་མཁས་པའི་ཡང་རྩེ་ཡིན། དེ་འདྲའི་མི་ལ་སྐར་མའི་བདག་པོ་རྙེད། ད་ལྟ་དེ་ལས་ཕུགས་ཡུལ་ལས་འབྲས་ཡང་། འདོད་པ་ཚོད་ཀྱི་ཕྱི་ལ་ཤོར་དང་གཅིག ཚོད་ལ་སེམས་ཀྱི་བཀོད་པ་མེད་དང་གཉིས། དེ་འདྲའི་མི་དང་བསྡེབས་ནས་བསྡད་གཞན་འདྲ། དེ་འདྲའི་ཆག་སྒོ་ནང་ལ་འཁྲིད་ཡོང་ངོ་། ལས་ལ་ཚོད་མེད་ཐ་མ་ཕུང་བའི་གཞི། ཚོང་ལ་ཚོད་མེད་མཐའ་གཞུག་ཕམ་པའི་གཞི། ཁ་ལ་ཚོད་མེད་རྐུབ་ལ་ཉོ་བའི་གཞི། དགོད་ལ་ཚོད་མེད་མཐའ་གཞུག་ངུ་བའི་གཞི། འཁོར་ལ་གཡས་གཡོན་གཡང་དང་གད་པའི་གླིང་། ཟག་ན་ཟག་ཆོག་རིལ་ན་རིལ་ཆོག་རེད། དེ་འདྲའི་ལམ་དུ་འགྲོ་བཟོ་བསྡོད་མཁས་མཛོད། གདོང་དྲུག་འཁོར་བ་འབྲོག་པའི་ཤོ་དང་འདྲ། སྤ་ར་ལྕ་མོ་གང་ཐོན་ངེས་མེད་རེད། ཁེ་གྱོང་སྙིང་ལ་བཅངས་ནས་འགྲོ་ལུགས་མཛོད། ཁེ་ཡི་སྒོ་མོ་དབྱེ་རྒྱུའི་བྱུས་ལ་ལྟོས། གྱོང་གི་ལམ་བུ་དགག་རྒྱའི་བྱུས་ལ་ལྟོས། ཁེ་སྒྱོང་གཉིས་ལ་སྦོམ་ཕྲ་ཤོར་བའི་དུས། སྡུག་སྙིང་གནན་ནས་སྡུག་ཚོད་བཟུང་བ་དགའ། ཚོད་མེད་ཁ་ཆེ་ཕ་ལུའི་ཚོད་ནས་ཤོར། གཏམ་གྱི་ནོར་བུ་ཤོག་བུའི་ཐང་ལ་ཤོར། རིན་ཐང་བསྐོར་དུས་སྐོར་ཐང་མ་ལོག་མཛོད། ནོམ་པ་འཛིར་ནས་ཡོད་དོ་ཕ་ཡི་བུ། །

ཞིམ་ཚད་མ་ཟ་མཇམ་ཚད་མ་གྱོན་ཞིག ཁ་ལུས་གཉིས་ཀྱིས་སྡུག་ལ་སྦྱར་ཡོང་ངོ་། ཁོག་པའི་བོངས་ཚད་ཆེ་ཡང་དེ་ཐམས་ཅད། ཟ་མ་གཅིག་པའོ་སྡོད་ས་ཡིན་མདོག་མེད། མིག་དང་གྲོད་པ་གཉིས་པ་ཁེངས་རྒྱུ་མེད། ལྟ་ཚོད་ཟ་ཚོད་རང་གིས་བྱས་པ་དགའ། གྲོད་པ་ཐབ་ལ་འཚོད་འཚོད་མང་འདྲག་ན། སྡུག་རྩྭ་ཐུག་དུས་སྒྱིད་བུ་གྲང་བ་དགའ། མི་ལ་རེ་བའི་ཇ་ཆང་ལོངས་སྤྱོད་ལས། རང་གི་རྩྭ་རྐྱང་ཆུ་རྐྱང་བྲོ་བ་ཞིམ། ལས་ངན་ཤན་པའི་དྲེག་ཁུ་བཟའ་བ་ལས། དམར་དད་ལངས་ན་ཤིག་ཀྱང་ཟ་བ་དགའ། ཟ་རྒྱུ་ཉལ་རྒྱུ་བ་དང་བོང་བུའི་ལས། དེ་འདྲ་བྱས་ན་ཨེ་དགའ་ཕ་ཡུ་བུ། ཁྱི་དང་གྲོད་པ་ལག་ནས་ཤོར་སོང་ན། རྟ་རོ་བོང་རོ་ཐོག་ལ་ཤོར་ཉེན་ཆེ། གྲོད་པའི་སྒོ་ལ་བསྡམ་ཚོད་མ་བྱས་ན། གཏམ་གྱི་ནོར་བུ་རྐུ་ལ་ཤོར་བའི་ཉེན། གཏམ་གྱི་ཕུ་ཐུང་འཇོལ་འཇོལ་དགོས་འདོད་ན། གྲོད་པའི་ལག་མགོ་ཐུང་དུ་བཅུག་པ་དགའ། ཆུ་ནང་ཉ་མོ་སྤགས་ལ་དད་པས་ཕུང་། བྱི་བ་བྱིའུ་འཇོལ་པད་ཁ་ཟོས་པ་ལན། བྱི་བ་དམག་ཆུང་ལྟོགས་ལ་ཟ་འདོད་ཀྱིས། ས་མདའ་སྐེ་ལ་ཟུག་པ་ཟ་མའི་སྐྱོན། བྱང་ཐང་ཝ་མོ་རང་ཚོད་མ་ཟིན་ན། མགོ་ལྤགས་ཐང་ལ་བཤུ་བ་ཟ་མའི་སྐྱོན། སྟག་དམར་ངར་ཞིན་བུ་བཞིན་འཛིན་རྒྱུ་འདི། སྟག་རྒན་ལུག་ལ་ཁྱི་ལྟར་མཆོངས་པས་ཉེས། མཁས་པ་འདི་ཡིན་ཞུ་རྒྱུ་མེད་ལགས་ཀྱང་། དཀར་པོའི་ཐོག་དུ་ནག་པོའི་བྲིས་ཆ་གསལ། ཁ་ཆེ་ཕ་ལུ་ས་འོག་སོང་ན་ཡང་། རྒྱ་ཤོག་ལོགས་ཀྱི་སྣག་ཚའི་རི་མོ་འདི། ས་སྟེང་ཡུན་རིང་གནས་པའི་བཀྲ་ཤིས་ཤོག ཚང་མའི་ཡིད་དུ་འོང་པའི་བཀྲ་ཤིས་ཤོག །

འཇིག་རྟེན་ལྟ་ལུགས་གཅིག་ལ་མཐོང་ལུགས་གཉིས། ལྟ་ལུགས་གཅིག་ལ་རིག་ཀྱང་རིག་གཅིག་འདུག ཕ་ཡིས་བུ་དང་བུ་ཡིས་ཕ་བྱེད་པ། དེ་འདྲ་བསམ་ན་ཐུང་ཐུང་ག་ནས་ཡིན། མ་བསམས་གྱུར་ན་ཕ་བུའི་དམ་ཚིག་ཉམས། དམ་ཉམས་ལག་ལེན་སྡང་བའི་དགྲ་ལ་འགྱུར། ཕྲུ་གུ་ཕ་མ་མེད་པ་མི་སྲིད་ཀྱང་། ལག་ཐོག་སྟོན་རྒྱུ་ཡོད་པ་རེ་རེ་ཙམ། ཚེ་སྟོད་ཡོད་ཀྱང་ཚེ་སྨད་མེད་པ་མང་། ཕ་བུའི་དམ་ཚིག་བསྲུང་ནས་བསྲུངས་པ་དགའ། དུས་ཚོད་ཆུ་ཚོད་མ་འགྱངས་གྲོལ་ནས་འགྲོ། འཐུས་ཤོར་མེད་པར་བུ་ལ་ཡོན་ཏན་སློབས། ཡོན་ཏན་ཀུན་གྱི་རྩ་བ་ཡི་གི་དང་། ཡོན་ཏན་ཡོངས་ཀྱི་རྒྱལ་པོ་ཡི་གི་རེད། ཕྲུ་གུའི་ཡི་གི་གསེར་ཁྲིའི་སྟེང་དུ་སྐྱོལ། མི་ཕོའི་ཡི་གི་སྟག་གདན་སྟེང་དུ་འཇོག བླ་མའི་ཆོས་རར་ཡི་གི་མེ་ལོང་རེད། ཡིག་ཡོད་མིག་ཡོད་མཁས་པ་སྤྲུལ་པའི་རྒྱུད། ཡིག་ཡོད་མིག་ཡོད་ལོང་བ་ལྐུགས་པའི་རྒྱུད། ཀྱོག་ཀྱོག་ཡི་གི་གཞུ་ལྟར་འཁྱོག་གྱུར་ཀྱང་། དོན་རྩ་མདའ་ལས་འདྲོང་བ་དེ་རུ་ཚང་། ཡོན་ཏན་རིན་ཆེན་དགོས་འདོད་ཀུན་འབྱུང་རེད། དགོས་འདོད་རིན་ཆེན་དགོས་འདོད་ཀུན་འབྱུང་རེད། དགོས་འདོད་ཀུན་འབྱུང་དགོས་འདོད་ཐོགས་པ་མེད། དོན་དུ་མི་ལ་ཡོན་ཏན་ཚང་བ་དགོས། ནོར་རྫས་མཚམས་རེ་སོང་འགྲོ་མཚམས་རེ་ཡོང་། ནོར་ལ་བསྐྱུར་བརླག་རྐུན་མས་འཁྱེར་བའི་ཉེན། ཡོན་ཏན་རིན་ཆེན་འཛད་མེད་ཕུགས་ཀྱི་གཏེར། ན་སོ་གཞོན་དུས་བུ་ལ་སྦྱོང་ཐར་སློབས། ན་སོ་ལོངས་ནས་བསླབ་དགོས་མེད་པ་གྱིས། ལྕང་གསར་གཞོན་དུས་འདྲོངས་ན་འདྲོངས་པ་རེད། ལྕང་རྒན་སྲོང་སྲོང་མང་ན་ཆག་པའི་ཉེན། ངན་པའི་མི་དང་གྲོགས་ལ་བསྡོངས་པ་ན། དུག་དང་བསྡོངས་ན་དུག་གི་ཁ་རླངས་ཕོག ངན་པའི་ཚོགས་དང་ནག་པོའི་སོལ་བ་འདྲ། ཚ་མོས་བསྲེག་ཉེན་གྲང་མོས་རྫས་ཉེན་ཆེ། ཁེ་དང་གྱོང་གྱི་བསྐོར་ཕྱོགས་གཏོང་གིན་སོང་། ཡག་དང་ཉེས་ཀྱི་སྐད་ཆ་ཤོད་ཀྱིན་སོང་། ཡག་ན་ཡག་པས་ངོ་བསྟོད་བདག་རྐྱེན་སྤྲོད། ཉེས་ན་ཉེས་སོང་ཟེར་བས་ཉེས་ཐགས་ཐོངས། ཨ་མའི་ཁ་ལ་སྒོ་ལྕགས་བརྒྱབ་དྲགས་ན། ཕྲུ་གུས་ཆག་སྒོའི་རྒྱལ་སྒོ་ཕྱེ་ཉེན་ཡོད། རྡོ་ལ་ཕྱི་བདར་ཐོན་ན་ནོར་བུ་དང་། ལྕགས་ལ་འཇམ་ཤ་ཐོན་ན་མེ་ལོང་ཡོང་། ཡོན་ཏན་ཕུན་སུམ་ཚོགས་ན་སྙིང་གི་བུ། བྱ་ལུགས་བྱེད་ལུགས་ངན་ན་དགྲ་ལས་ལོད། དེ་ཚོ་སེམས་པ་དཀར་བའི་སྐད་ཆ་རེད། བུ་ཡོད་ཕ་ཚོ་ཐུགས་ལ་དེ་ལྟར་ཞོག །

དེ་ནས་གསོན་དང་ཨ་མའི་སྙིང་ཉེ་ཚོ། བྱམས་དང་བརྩེ་བའི་ཅན་གྱི་དྲིན་ཆེན་མ། ཕྲུ་གུ་ཆུང་དུས་ཨ་མའི་མགོ་རུ་སྡོད། ལང་ལ་གཏོང་རང་གཏོང་ན་ཨ་མས་གཏོང་། ཁ་ལ་མི་སྟེར་དགུ་སྟེར་ཨ་མས་སྟེར། ལུས་ལ་མི་གཡོགས་དགུ་གཡོགས་ཨ་མས་གཡོགས། ཆུང་དུས་ཨ་མས་ལང་ལ་བཏང་བའི་བུ། ལང་ཤོར་ཐ་མ་ཨ་མ་དགའ་མི་ཁུག དེ་འདྲས་མི་གསོད་བྱས་ནས་ཕུང་བ་མང་། དེ་འདྲས་རྟ་འཁྱེར་བྱས་ནས་བྲོས་པ་མང་། ཨ་མས་སྡུག་སྙིང་མནན་ས་མ་བསྡད་ན། ཨ་མས་ཕྲུ་གུ་རླུང་ལ་བསྐུར་ཡོང་ངོ་། རྐུན་མ་རྐུ་དུས་ཐུག་ཐུག་རྡུང་བ་དགའ། ཧམ་གྱི་ཡོད་ན་གླེག་གླེག་སྟེར་བ་དགའ། སྒོ་ང་རྐུ་དུས་ཁྲིག་ཁྲིག་མ་བཟོས་ན། བྱ་མོ་ཁྱེར་བའི་རྗེས་ལ་རྟ་ཕོ་འཁྱེར། ཞིམ་པོ་སྟེར་སྟེར་འཇམ་པོ་གཡོགས་གཡོགས་ཞོག བྱ་ལུགས་མེད་ཀྱང་ཁ་ལ་ཟ་ལུགས་སློབས། ཐ་མ་དེ་འདྲའི་སྨྱོ་སྨྱོ་སུ་ཞིག་སྨྱོ། ཝ་ཕྲུག་ཐང་ནས་ཐང་ལ་ཟགས་རྒྱུ་མེད། རྒོད་ཕྲུག་གཡང་ལ་ཟགས་པ་ སྙིང་ཡང་རྗེ། སྤྲང་ཕྲུག་རྒྱལ་ཁམས་བསྐོར་བ་སྤྲང་པོའི་ལས། ཕྱུག་པོ་སྤྲང་ལ་འཁྱམས་པ་དགྲ་ལ་འགྱུར། ཉན་མཁན་ཡོད་ན་གོ་རྒྱུ་བཤད་ཡོད་དོ། ལྟ་མཁན་ཡོད་ན་མཐོང་རྒྱུ་བསྟན་ཡོད་དོ། སྨྱུ་གུའི་ཁ་ཡི་དོན་གྱི་རྡོ་ཁའི་ཚིག ཐུགས་ཀྱི་དཀྱིལ་དུ་ཞོག་མཛོད་ཨ་མའི་ཚོགས།

དེ་ནས་ཉོན་དང་ཨ་མའི་ཨོ་ལོ་ཚོ། སྟག་གཟིག་ནགས་ཀྱི་དཀྱིལ་ནས་ཐོན་འདྲ་རྣམས། ཕྲུ་གུ་མ་ཡི་ཁོག་ནས་ཐོན་པའི་དུས། ལྟེ་བ་མ་དང་འབྲེལ་ནས་ཡོང་བའི་དུས། རྩེར་རྩེར་ཟེར་བ་ཙམ་ལས་ཤ་རྡོག་གཅིག ནུ་ཞོ་ཁ་ལ་སྦྱར་ཀྱང་འཐུང་མི་ཤེས། རྐང་པ་ཡོད་ཀྱང་གོམ་པ་སྤོ་མི་ཤེས། རྣ་བ་ཡོད་ཀྱང་ཚིག་རྡ་སྤྲོད་མི་ཤེས། མིག་གཉིས་ཡོད་ཀྱང་བསམ་རྒྱུ་མ་ལ་མེད། སེམས་པ་ཡོད་ཀྱང་བསམ་རྒྱུ་མ་ལས་མེད། ངོ་ལ་འཁོར་བའི་སྦྲང་མ་དཀྲོག་མི་ཤེས། མིག་ལ་འཚངས་བའི་ཐལ་བ་འདོན་མི་ཤེས། གྲང་ངུ་འཁྱག་ངུ་ལྟོགས་ངུ་རྒྱག་པའི་དུས། ཕ་མ་གཉིས་པོའི་དགོང་མོའི་གཉིད་ཐེབས་བཅག སྐམ་པ་བུ་དང་རློན་པ་ཕ་མས་བྱེད། འཇམ་པ་བུ་དང་རྩུབ་པ་ཕ་མས་བྱེད། ད་ལྟའི་དེ་འདྲ་དེ་དུས་ཡིན་མདོག་མེད། ཕྲུ་གུ་ཆུང་སུས་ལྟེ་བ་ཕ་མས་སྒྲོལ། བྱ་ལུགས་བྱད་ལུགས་འགྲོ་ལུགས་སྡོད་ལུགས་སྦྱོངས། གང་བྱས་ཡོང་བའི་ཡོན་ཏན་ཕ་མའི་དྲིན། ཁ་ནས་ཕྲི་སྟེ་བསགས་ཚད་བུ་ཡི་དོན། ལས་འབྲས་རླུང་ལ་བསྐུར་རྒྱུ་བུ་ཡི་དོན། བསམས་རྒྱུུ་བུ་དང་དྲན་རྒྱུ་བུ་ལས་མེད། དགོས་རྒྱུ་བུ་དང་འདེམས་རྒྱུ་བུ་ལས་མེད། བཀའ་དྲིན་ཅན་གྱི་ཕ་མ་རྣམ་པ་གཉིས། ན་སོ་རྒས་པ་ད་ལྟ་ཨེ་ཤེས་ལ། དྲིན་ཅན་དྲིན་དུ་བསམས་པ་ཨེ་ཡོད་ལགས། ཁྲེལ་དང་ངོ་ཚ་དགོས་པ་འདི་རུ་རེད། ཚོགས་དང་བསོད་ནམས་གསོག་པའི་རྩ་བ་རེད། གོང་ན་གོ་བརྡྭ་གཤམ་ན་ཕ་མ་གཉིས། དེ་གསུམ་ལས་ལྷག་སུ་ཡང་ཡོད་པ་མིན། ཉིན་མཚན་མེད་པ་ཕ་མའི་བཀའ་དང་བསྟུན། སྔ་དགོང་མེད་པ་ཕ་མའི་ཞབས་ལ་བཅར། ཞིམ་པོ་ཕུལ་ནས་ཨེ་མཉེས་སེམས་ཀྱིས་ལྟོས། འཇམ་པོ་བསྒྲོན་ནས་ཨེ་མཉེས་ཡིད་ཀྱིས་ལྟོས། སྙན་པོ་ཞུས་ནས་ཐུགས་སེམས་ཨེ་སྤྲོ་ལྟོས། ཡག་པོ་ཞུས་ནས་དགོངས་པ་ཨེ་སྤྲོ་ལྟོས། ཕ་མ་མཉེས་ན་འདི་ཕྱི་གཉིས་ཡོད་རེད། ཕ་མ་མ་མཉེས་འདི་ཕྱི་གཉིས་མེད་རེད། ཕ་མ་ཡོད་དུས་བཀའ་དྲིན་མ་བསམས་པར། མེད་དུས་འགྱོད་པ་སྐྱེས་པ་ཐ་མའི་ཐ། འགྱོད་པ་དེ་ནི་ཕུགས་ནས་ཕུགས་སུ་འགྱོད། ད་ལྟ་ས་སྟེང་འགྱོད་པ་དེ་ལས་འགྱོད། དེ་ལྟར་ཕ་མ་འཛོམས་པའི་ཕྲུ་གུ་ཚོ། གཏམ་གྱི་ནོར་བུ་སྙིང་གི་སྒམ་དུ་ཆུགས། བུད་མེད་ཁྲམ་དང་གཡོ་སྒྱུ་གྱོད་ཀྱི་གཞི། བསླུ་བྱ་གཏེར་ནས་ཕ་བུ་འཕྲལ་ཡོང་ངོ་། དེ་འདྲ་དམྱལ་བའི་གཏིང་དུ་བསྐྱུར་ཡོང་ངོ་། ར་ཐང་གཡོགས་པ་རྣ་བས་ཐོས་ཡོད་འགྲོ། རྩ་མཆོག་ཟིལ་པས་སྐད་ཆ་གོ་ཚོད་འགྲོ། མི་རྒྱུད་མི་དགོས་ལྷ་རྒྱུད་ཡིན་གྱུར་ཀྱང་། བུད་མེད་ཡིན་ན་བདུད་ཀྱི་ཡན་ལག་རེད། དེ་འདྲའི་བཤད་ཚད་ཉན་ན་ཕུང་ལ་སྦྱོར། བྱས་ཚད་ལམ་ལ་བཏང་ན་རླུང་ལ་སྐུར། བདུད་དང་བསྡོངས་དུས་མི་ལ་དོགས་ཟོན་དགོས། འདྲེ་དང་གྲོགས་པོ་བྱེད་ན་བླ་མ་སྒོམས། གྱོན་པ་རྙིངས་ན་གསར་པ་བཟོས་པས་ཆོག མནའ་མ་མེད་ཀྱང་མནའ་མ་བསུས་པས་ཆོག འཚོལ་དགོས་བྱུང་ན་ཕ་མ་རྙེད་མདོག་མེད། ཕ་མ་གཉིས་དང་མནའ་མ་བརྗེ་མདོག་མེད། འདྲ་འདྲའི་ཁྲོད་དུ་སྡོད་པ་ངོ་ཡང་ཚ། འཇོན་མདོག་བྱས་ཀྱང་འཇོན་རྒྱུ་དེ་ག་རེད། ཕ་མ་མནའ་མའི་དབྱེ་འབྱེད་མ་ཤེས་ན། མི་ལུས་དེ་འདྲ་ཐོབ་ཀྱང་ཁྱི་ལས་ལོད། ཁྱི་ངན་སྨྱོ་ཡང་བདག་པོ་ངོས་ཀྱིས་འཛིན། ཁྱི་ལས་ལོད་པའི་མི་དེ་ཡ་ཡང་ང་། དེ་འདྲའི་ལུས་རྟེན་སྡང་བའི་དགྲ་ལ་འགྱུར། མི་ངན་གཅིག་གིས་མི་བརྒྱ་རླུང་ལ་སྐུར། མི་ལུས་ཡིན་ཀྱང་རྒྱ་མཚོའི་གཏིང་ལ་བསྐྱུར། ལམ་ངན་བཏོད་ནས་འཛམ་གླིང་འཕུང་ལ་སྦྱོར། ད་མོ་གཅིག་གིས་མི་ཡི་ཞིང་ཟོས་ནས། བ་མོ་ཡོངས་ཀྱི་འགྲོ་བའི་ལམ་བུ་བཀག ཅེས་པའི་དཔེ་ལྟར་སྤྱོད་ངན་འདོར་ཤེས་པ། རིག་པ་གནད་དུ་ཁོད་ཅིག་ཕ་ཡི་བུ། བསམ་བློ་འདྲོངས་ལ་ཐོངས་ཤིག་ཇོ་ཇོའི་སྙིང་། རེ་དང་འཇིགས་པས་དབྱར་ས་དགུན་ས་ནས། ཐར་པའི་གླིང་གི་ལས་སུ་སྐྱ་སེང་སེང་། བཟང་གི་རེ་དང་ངན་གྱི་ཉོས་ཡོད་ན། ལམ་བུ་དེ་ག་རེད་དོ་སྐལ་ལྡན་ཚོ། འཁོར་བ་མི་སྲིད་སྲིད་པའི་ཁྲོན་པ་རུ། ལས་ཉོན་མི་སྲིད་སྲིད་པའི་སྐུར་དུས་འདིར། དོན་རྩ་བསྒྲིལ་ནས་རྟོག་དོན་བྱེད་པའི་དུས། རེ་ས་ལྟ་ས་གོ་བརྡྭཁོང་ལ་ཞུས། ལས་འབྲས་སྙིང་ལ་བཅངས་ནས་འགྲོ་ལུགས་དང་། དཀར་ནག་སེམས་ལ་བཞག་ནས་བྱ་ལུགས་བཛོད། ལས་འབྲས་ཁ་ནས་ཤོད་མཁན་མང་པོ་ཡོང་། ལག་ལེན་ལག་ཏུ་ལོན་པ་གསེར་ལས་དཀོན། དེ་ལ་བལྟས་ན་འགྱོད་པ་སྙིང་ནས་བསྐྱེད། དེ་འདྲ་བསམས་ན་སྐྱོ་བ་གཏིང་ནས་བསྐྱེད། དེ་རིང་བྲིས་པའི་ཡི་གེ་ནག་ཆུང་འདི། ཁ་ཆེ་ཕ་ལུ་སྨྱོ་བའི་སྨྱོ་ལབ་རེད། གཏི་མུག་སྙིང་གི་དཀྱིལ་ལ་རྩོལ་རྩོལ་འདི། རང་གི་མི་ཤེས་མི་ལ་བཤད་ལེ་འདྲ། ཆག་པ་གས་པས་ཕྱོགས་ལ་ཧམ་ལེ་འདྲ། ང་ལ་བླ་མས་ཐུགས་རྗེ་རྒྱང་ནས་གཟིགས། ཁ་དང་ལག་ལེན་འགྲིག་པའི་ཕྲིན་ལས་མཛོད། མདོག་དང་བྲོ་བ་མཐུན་པའི་བཀྲ་ཤིས་ཤོག ཁ་ཆེ་ཕ་ལུའི་བསམ་བློའི་རྒྱ་མཚོ་ནས། བཏོན་པའི་ནོར་བུ་ཤོག་བུའི་ནང་དུ་བཏུམས། རྒྱལ་སྡེ་ཁྲོམ་པའི་དཀྱིལ་དུ་བཞག་ཡོད་དོ། རྨ་བྱའི་ལུས་ལ་ཁུ་བྱུག་གསུང་སྙན་འདི། སྐྱིད་སྐྱིད་ཟེར་བས་ཕྱོགས་ཀུན་ཁྱབ་པར་ཤོག ཁ་ཆེ་ཕ་ལུས་ཀུན་ལ་གདམས་པའོ། །

ཁ་ཆེ་ཕ་ལུའི་དྲ་ཚིགས། https://web.archive.org/web/20100104204006/http://kachepalu.googlepages.com/

སེང་རྡོར་དྲ་བ། http://www.sangdhor.com/pics_c.asp?id=868

ཤམ་བྷ་ལའི་ཕོ་ཉ། http://www.shambalapost.com/blog/viewpost/1389