Гісторыя Майго Жыцьця: песьня беларускага гурту Naviband

Аўтарам песьні ёсьць саліст гурту Арцём Лук’яненка. 30 лістапада 2016 року быў зьняты кліп на песьню, 7 сакавіка 2017 року гуказапісная студыя MediaCube Music выпусьціла сынґл для спампаваньня з Інтэрнэту. Гэтая песьня стала першаю песьняю, выкананаю на «Эўрабачаньні» беларускаю моваю.

Асноўны артыкул: Беларусь на конкурсе песьні Эўрабачаньне-2017

Гурт Naviband падаў сваю заяву на ўдзел у беларускім нацыянальным адборы 26 лістапада 2016 року, і 30 лістапада гурт улучылі ў лік 13 фіналістаў нацыянальнага адбору зь песьняю «Гісторыя майго жыцьця». Фінал прайшоў 20 студзеня 2017 року, і гурт выйграў нацыянальны адбор: ён заняў 1-е месца па выніках галасаваньня журы і 5-е месца па выніках галасаваньня гледачоў, стаўшы ўдзельнікам «Эўрабачаньня» ад Беларусі. Упершыню ў гісторыі «Эўрабачаньня» песьня была выкананая на беларускай мове — раней па-беларуску выступалі толькі ўдзельнікі «Дзіцячага Эўрабачаньня». Беларусь выступіла ў другім паўфінале конкурсу 11 траўня 2017 року. З гэтаю песьняю Naviband трапілі ў фінал конкурсу, дзе затым занялі 17-е месца.