An Sri Lanka o opisyal bilang Demokratikong Sosyalistang Republika nin Sri Lanka (Internasyunal: Democratic Socialist Republic of Sri Lanka, ශ්රී ලංකා sa Sinhala / இலங்கை sa Tamil) (bisto sa pangaran Ceylon bago an taon 1972) sarong tropikal na islang banwa sa bandang habagatan na kosa kan subkontinenteng Indyan.
Ini napapalibotan kan Dagat Indyano,kan Golpo nin Mannar asin kan Itiot nin Palk. Namomogtak na gayo ini harani sa Indya asin Maldive.
Kan antigong panahon ini midbid sa apod na Sinhale, Lanka, Lankadeepa (Sanskrit para sa "nagkikilyab na kadagaan"), Simoundou, Taprobane (hale sa Sanskrit Tāmaraparnī), Serendib (hale sa Sanskrit Sinhala-dweepa), asin Selan. Sa panahon nin kolonisasyon, nabantog an isla bilang Ceylon hale sa Selon sa tataramon na Portuges na Ceilão). An hitsura asin huli na gayod sa pagkarani kaini sa Indya, ini binabansagan na "luha nin Indya". Kan 2009, tinataya' na igwa ini nin populasyon na 20,238,000 katawo.
An Sri Lanka sarong republika asin unitaryong estado na an gobyerno semi-presidensyal; an saiyang sentro nin gobyerno yaon sa Sri Jayawardenapura-Kotte, an kabesera.
Gibo kan an lokasyon niya sa tahaw na gayo kan kasarapongan nin mga ruta sa dagat, an Sri Lanka sarong estratehikong takod sa pag'oltan kan Solnopan Asya asin Sur-subangan na Asya. Ini man an sentro kan relihiyon na Budismo asin kultura gikan pa sa mga lumang panahon. Masabi pa, ini an saro sa magkapira na sanang erokan kan Budismo sa Habagatan Asya kairiba an Ladakh, Bhutan asin an kadagaan nin Chittagong. An komunidad nin mga Sinhalese iyo an mayoria sa populasyon; an mga Tamil na natitipon na maray sa norte asin subangan kan kapuroan, iyo man an pinakadakulang minoriyang etniko. An iba pang mga etnikong grupo iyo an Moor, Burgher, Kaffir, Malayu asin an mga Vedda.
This article uses material from the Wikipedia Bikol article Sri Lanka, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bikol (DUHOCTRUNGQUOC.VN) is an independent company and has no affiliation with Wiki Foundation.