لموعتاقال د أوشڤيتس ؤلا لموعتاقال د أوشڤيتس د لإبادة (ب لألمانية Auschwitz Konzentrationslager، ب ختيصار KL Auschwitz) هوّا حبس ؤ موعتاقال د لإبادة كان مديور من طاراف نّازيين فاش حتلو پولونيا ف لحرب لعالمية جّاوجة.
كيتكوّن هاد لحبس من مجموعة د لموركابات لحبسية، أهمها أوشڤيتس 1 لي تدار ف مدينة ؤشڤيتسيم لپولونية (ب لألمانية Auschwitz، ب لپولونية Oświęcim) أوشڤيتس 2 بيركيناو لي كانو فيه شّومبرات د لإعدام ب لڭاز، ؤ أوشڤيتس 3 مونوڤيتس، لي كان موعتاقال د لخدمة لقسرية تابع ل شركة إي ڭي فاربن ديال لمواد لكيماوية. كاينين عشرات د لموعتاقالات صّغار خرين تابعين ليه تاهوما.
لموعتاقال د أوشڤيتس | ||
معلومات عامة | ||
نوع | معسكرات الاعتقال النازية، متحف، معسكر إبادة و architectural ensemble | |
لبلاد | پولونيا | |
لموضع | Oświęcim County | |
تاريخ د لبني | 20 ماي 1940 | |
تحل فـ | 20 ماي 1940 | |
تصنيف تراتي | موقع تراث عالمي و معلم غير منقول | |
معلومات إضافية | ||
auschwitz.org |
هاد لموعتاقال كان أهم موضع فين طبّقو نّازيين ما سمّاوه لحل لّخراني ديال لقضية د ليهود. أوشڤيتس 1 كان ف لأصل مركز د لبوليس لپولوني، ؤ ف أبريل 1940، حوّلوه قوات لأمن لخاصة د ألمانيا نّازية، لمعروفين ب شوتسشطافل (ب لألمانية Schutzstaffel)، ؤلا بختيصار SS، ل موعسكار فين كيتشدو لمحابسيا د لحرب. ف لعاماين لّولة ديالو، أغلبية د لمحابسيا كانو پولونيين.
ف ماي 1940، تعيّنو موجرمين ألمانيين كا موضّافين باش يسيرو لموعتاقال، ؤ من هنا غادي تبدا سّمعة ديالو كا موضع ديال لقسوة ؤ تّعديب. لمحابسيا كانو كيتعرّضو ل ضّرب، تّعديب ؤ لإعدام ل أتفه لأسباب. ف غشت 1941، تدارو أول إعدامات ب لڭاز ل محابسيا پولونيين ؤ سوڤييت. و ف شّهر لي موراه بدا لبني ديال طّرف تّاني د لموعتاقال، أوشڤيتس 2 بيركيناو. مابين 1942 و لّخر د 1944، بداو نّازيين كيجيبو ليهود من جميع لمناطق لي سيطرات عليهوم ألمانيا.
كتر من 1,3 مليون شخص دازو من هاد لموعتاقال، منهوم 1,1 مليون تقتلو تماك. ضّحايا ديالو فيهوم 960.000 يهودي من جنسيات مختالفين (منهوم 865.000 تعدمو فيساع ب لڭاز معا لوصول ديالهوم ل لموعتاقال)، 74.000 پولوني، 21.000 من شعب رّوما، 15.000 ديال سّوڤييتيين، ؤ 15.000 ؤروپي من بلدان خرين. دوك لي ماتعدموش ب لڭاز، ماتو ب تّجويع، لعيا، لمرض، لإعدامات لفردية، ؤلا لعصا. كاينين لي ماتو تا ب تّجارب طّبية لي كانو كيديرو طّبا نّازيين.
ف تّاريخ لقصير ديال لموعتاقال، طراو فيه مجموعة د لأحدات بحال تورات ؤ محاولات د لهروب. من 802 محابسي لي حاولو يهربو يلّاه 144 لي صدقات ليهوم. يلاه 789 د لموضافين ديال لموعتاقال لي دازو من لمحكمة (15% من لمجموع)، ؤ شي وحدين منهوم تّحكم عليهوم ب لإعدام، بحال لكوماندان نّازي رودولف هوس. عدم سّتيجابة د لحولافا ف لحرب لعالمية جّاوجة، ب أنهوم يقصفو لموعتاقال ؤ سّكاكي د تّران لي كيدّيو ليه بعدما كانو لأخبار على شنو كان طاري فيه رايجين ف داك لوقت، باقي كيتّعتابر علامة ستيفهام كبيرة.
ملي قرّب لجيش لحمر سّوڤييتي ل لموعتاقال ف يناير 1945، بداو نّازيين كيزربو ف إعدام لمحابسيا ديال لموعتاقالات، ؤ تدمير لوتايق لي كاتّبت لجرائم لي طراو تماك. ف 27 يناير دخلو لعساكريا سّوڤييت ل أوشڤيتس، ؤ هاد نّهار كيتّعتابر دابا ليوم لعالمي ديال الدكرى د لهولوكوسط. ف لعقود لي تلاو لحرب، بزاف د نّاس لي نجاو من أوشڤيتس كتبو مودكرات ديالهوم على شنو طرا ليهوم تماك، ؤ كيفاش قدرو يتعايشو معا لحياة ديك سّاع ؤ موراها، بحال ڤيكطور فرانكل، پريمو ليڤي، و إلي ڤيزل. لموعتاقال د أوشڤيتس ولّا كيتّعتابر رمز ديال لهولوكوسط.
ف 1947، پولونيا أسّسات لمتحف لوطني ديال أوشڤيتس بيركيناو ف لموضع ديال أوشڤيتس 1 ؤ أوشڤيتس 2 بيركيناو، ؤ ف 1979 دخل ل لّيستة د ليونيسكو ديال تّرات لعالمي.
This article uses material from the Wikipedia داريجة article لموعتاقال د أوشڤيتس, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.