الشرق لأوسط: منطقة جغرافية و سياسية كاتشمل إيران، غرب آسيا و مصر

هاد لمصطلح تنتاشر و خدا لبلاصة ديال الشرق لقريب Near East (لي كان لموقابيل ديال الشرق لبعيد Far East) ف لبدية د لقرن 20. لمصطلح د "الشرق لأوسط" كيخلق إلتباس بسباب لإختلافات ف لمعنى ديالو، و كاين لي كيعتابرو ؤروصونطري (مبني على منضور كيعتابر ؤروپا و لبلدان لغربية بشكل عام لمركز د لعالم).

أغلبية د لبلدان الشرق أوسطية (13 من بين 18) كينتاميو ل لعالم لعربي. لبلدان لي عندهوم أكبر عدد د السكان هوما مصر، تركيا و إيران. السعودية هي أكبر بلاد مجيهت لمساحة. التاريخ د الشرق لأوسط كيرجع ل لفترة التاريخية لقديمة، و لأهمية الجيوسياسية ديالها كانت معروفة ل ألاف لعوام. بزاف د لأديان لكبار بانو ف هاد لمنطقة، بحال ليهودية، لمسيحية و لإسلام. لعرب كيتّعتابرو لمكوّن لإتني لأساسي تماك، تابعينهوم التواركا، لفرس، لأكراد، لأزيريين، لأقباط، ليهود، لأشوريين، لعراقيين التركمان، ليزيديين، و لقبرصيين ليونان.

الشرق لأوسط بشكل عام عندو كليما سخون و ناشف، سيرتو ف لڭزيرة لعربية و مصر. كاين عدد ديال لويدان لي كيعاونو ف السقي و لفلاحة ف مناطق محدودة، بحال النيل ف مصر، و دجلة و لفورات ف ميزوپوطاميا (بلاد بين لويدان) و واد لأردن ف الشام. هاد لمناطق مجموعين كيتسماو لهلال لخصيب، و كيشملو لبلايص لي التوارخيا ل وقت طويل كانو كيسمّيو مهد لحضارة (هاد لمصطلح دابا مخدّم على شحال من موضع ف لعالم). ب لموقابيل، الساحل د الشام و أغلبية د تركيا عندهوم كليما معتادل لي كانلقاو عادةً ف مناطق لبحر الدخلاني، لي كيتميّز ب صيوفا ناشفين و شتوات فازڭين. أغلبية د لبلدان لي كيطلو على لخليج لفارسي عندهوم مخزون كبير ديال لپيطرول. بسباب لكليما الناشف و لإعتماد لكبير على الصناعة د لپيطرول، الشرق لأوسط من أكتر لمناطق ف لأرض لي كاتساهم ف التبدال د لكليما، و ف نفس لوقت متوقّع بلي غادي تكون من أكتر لمناطق لي غادي تتأتر بشكل سلبي ب التوابع ديالو.

كاينين مصطلحات خرين لي كيعممو لمفهوم ديال الشرق لأوسط، بحال الشرق لأوسط و شمال إفريقيا (مينا) لي كاتشمل شمال إفريقيا ؤلا لمغرب لكبير و السودان، الشرق لأوسط لكبير لي كيشمل شرق إفريقيا، موريطانيا، أفغانستان، و پاكيستان، و شي مرات تا جنوب لقوقاز و أسيا لوسطانية.