أحمد حرزني

كان معتاقل سياسي ف لفترة ديال سنوات لقرطاس، و شد لمنصب ديال رئيس د لمجلس لإستشاري د حقوق لإنسان، مور دريس بنزكري. كان شد تا منصب ديال سفير متجول د لمملكة.

أحمد حرزني
معلومات عامة
زيادة	1948 ڭرسيف
لموت	13 نونبر 2023 (74/75 عام) الرباط
لجنسية	لمغريب
لحرفة	سياسي و ناشط حقوقي
لّوغات لي كيعرف	عربية، لفرانساوية و نڭليزية

أحمد حرزني واخد دوكتورا ف الصوسيولوجيا و لأنطروپولوجيا من جامعة كينتاكي ف لميريكان، و ديپلوم ف الدراسات لمتعمقة ف الصوسيولوجيا من كلية لأداب و لعولوم لإنسانية التابعة ل جامعة محمد لخامس ف الرباط. كان ؤستاد د لكوليج ف لبدية د لكاريير ديالو ف السبعينات، و باحت متخصص ف شؤون لعالم لقروي. خدا من بعد منصب ديال مدير د لبحت ف لمعهد لوطني د لبحت الزراعي ف سطات. و كان كيلقي محاضرات ف جامعة لأخوين ف إفران ف 1995 و 1996.

أحمد حرزني كان من لقادا ديال مونضامة "لنخدم الشعب" (أجيو نخدمو الشعب) ليسارية الراديكالية، و دوّز 15 عام د لحبس ف سنوات لقرطاس، ف ملف قضائي لي تّعرف ب "أحمد حرزني و لي معاه". ف التمانينات، أسس دورية ب عنوان "الصاحب" معا لموناضيل ليساري محمد تيريدا، لي خرجو منها غير جوج نماري، و موراها بدا كيصدر مجلة متخصصة عنوانها "المزارع".

حرزني كان عضو ف لمجلس لأعلى د التعليم، و تعيّن سيكريتير عام ديالو ف 2006. ف 31 ماي 2007، عيّنو لماليك محمد السادس رئيس ديال لمجلس لإستشاري د حقوق لإنسان. ف 2016، تعيّن سفير متجول ديال لمملكة مكلّف ب لملفات لحقوقية. كان مستشار وطني و دولي ف لقضايا لمتعلقة ب لفلاحة و التنمية لقروية و تدبير لموارد الطبيعية و د لبيئية و التكوين لمهني. زيادة على هادشي، كان عضو ف اللجنة لإدارية و التنفيذية التابعة ل لمجموعة الدولية ديال لعامال الجماعي و حقوق لملكية، عضو ف الريزو لمغاربي ديال لخوبارا ف الصوسيولوجيا و لمنتدى لمغاربي د الدراسات الصوسيولوجية و اللجنة لعلمية د معالجة نتايج لإحصاء لعام د السكان و السكنة. كيما كان عضو ف اللجنة لعلمية ديال "تقرير 50 سنة من التنمية البشرية في المغرب". كان شاد منصب ديال لكاتب لوطني د جمعية "نداء المواطنة" و منسق د لمرصد لوطني ديال لإنتقال الديموقراطي و كان مؤسس د لمجموعة لوطنية د لبحت حول الديموقراطية لمحلية.

• "ثوري في غرابة الإصلاح".
• "قراءة في السير السياسي لماركس".
• "اليسار، الإسلام والديمقراطية".
• Un Maroc décanté.

• لحركة د 23 مارس
• سنوات لقرطاس
• لهيئة د لإنصاف و لمصالحة