كمال الودغيري

	كمال الودغيري
	معلومات عامة
زيادة	1968 (55/56 عام); فاس
لجنسية	لمغريب
لحرفة	موهنديس
لّوغات لي كيعرف	لفرانساوية، عربية و نڭليزية
لجوايز	(30 يوليوز 2012) وسام العرش من درجة ضابط; NASA Exceptional Public Service Medal; جائزة ناسا للإنجاز الجماعي;

كمال الودغيري (تزاد عام 1968 ف فاس) هو موهنديس تيصالات، عالم و باحت مغريبي خدام ف وكالة لفضاء لميريكانية نازا، أصلو من مدينة فيݣيݣ، كان هو لمسؤول على لهبوط ديال جوج مركبات، (سپيريت Spirit و أوپورتيونيتي Opportunity) على سطح د لمريخ، و شارك ف عملية إنزال لّابو د علوم لمريخ Mars Science Laboratory، و تكلف حتا ب لمهمة ديال تتبع لإشارات لي كايصدرها الروبو كيريوسيتي Curiosity فوق سّطح د لمريخ.

حياتو

صغرو و قرايتو

تزاد كمال الودغيري ف مدينة فاس عام 1968، بقا فيها حتى ولات عندو 10 سنين عاد رحل مع عائلتو لدار لبيضا و تما فين بقا حتى خدا لباك، و من بعد غايمشي يكمل قرايتو ف لوس أنجيليس ف ميريكان. كان كمال كيعجبو داكشي ديال لفضاء من صغرو، ملي كان كايمشي معا عائلتو ل لبحر ف لمحمدية كان كايبقا متكي ليل كلو كايشوف ف سما. من بعد ما سافر ل ميريكان كمل قرايتو ف جاميعة كاليفورنيا لجانوبية، تخرج منها ب ديپلوم موهنديس د تيصالات لفضائية.

قبولو ف نازا

من بعد ما خدا ديپلوم ديالو ف وسط تسعينات، دفع كمال ل لكونكور د نازا لي كان فيه 1000 مترشح غايتهزو منهوم 3 ولا 4، كمال كان عندو زّهر حيت ف لمتيحان تحط ليهوم موضوع لي كان ديجا خادمو و قدر ينجح هو و 30 وحدين أخرين باش يدوزو متيحان شفوي. ف هاد لمتيحان شّفوي سولوه علاش بغيتي تخدم ف نازا، و جاوبهوم بلي قطع لبحر على قبل هاد لهدف و لي عاونو بزاف هو بلي كان كايخدم بزاف معا لفراقي لعلمية ف لجاميعة و حتى من بعد ما خدا ديپلوم.

لكاريير ديالو

كمال الودغيري مشارك ف بزاف د لمشاريع معا نازا، ؤ عندو عاداد د لأبحات لعلمية لمنشورة. لأبحات ديالو كاتركّز على لمزايا ديال الجو د لكواكب و الصيونص د الجابدية.

هوّ دابا رئيس لپروجي د اللابو د الدرة لباردة Cold Atom Lab، ؤ لمشرف على لپروجي د الصيونص د الرادار و الراديو د لكواكب Planetary Radar & Radio Sciences، لي بجوج تابعين ل لابوراطوار د دّفيع تّفاعولي.

لمشاريع لي شارك فيهوم

كمال لودغيري شارك ف عاداد كبير د لمهام معا نّازا، من بينها:

لابوراطوار د دّفيع تّفاعولي Jet Propulsion Laboratory
پيرسيڤيرينس Perseverence
سپيريت Spirit
ؤپورتيونيتي Oppoortunity
كيريوسيتي Curiosity
إنسايت لاندر InSight Lander
لوربيتور ديال لستيكشاف د لمريخ The Mars Reconnaissance Orbiter
ميڤن MAVEN
مارس كيوب وان Mars Cube One

جوايز

2012 : وسام لعرش من درجة ضابط
2017 : جايزة لقيادة د ناس (نازا)
2019 : ميدالية لخدمة لمتميزة (نازا)

شوف تا

أسماء بوجيبار

عيون لكلام

مزاود

أبحات ديال كمال الودغيري ف arXiv

This article uses material from the Wikipedia داريجة article كمال الودغيري, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.