نجاة عتابو
نجاة عتابو (خلاقت ف 9 ماي 1960 ف لخميسات) موسيقية و مغنية وكاتبة وملحنة ومن أقوى الأصوات مغريبية ديال شّعبي لمغريبي، كاتغني ب دّاريجا و شّلحة د زايان و لفرانساوية و كاتعتابر من أهم لمغنيات ف تاريخ لموسيقا لمغريبية.
نجاة بدات لكاريير ديالها ف 1983 و غنات بزاف د لأغاني لّي نجحو بزاف بحال "جوني مار"، "شوفي غيرو" و "كدبة باينة" و لّي ولاو مخلدين ل درجة أن بزاف د لمغنيين عاودوهوم من بعد منها,وعندها مجموعة ديال الألقاب منها لبؤة الأطلس والديفا وملكة الأغنية الشعبية والأسطورة.
نجاة عتابو | ||
 | ||
| معلومات عامة | ||
| زيادة | 9 ماي 1960 (63 عام) لخميسات | |
| لجنسية | لمغريب | |
| لحرفة | موغنية مؤلفة، ملحّين و مغنية | |
| لّوغات لي كيعرف | عربية، لوغات أمازيغية و لفرانساوية | |
| معلومات خرى | ||
| ستيل | شعبي مغريبي | |
| سّيت رّسمي | http://www.najataatabou.com | |
      | ||
حياتها
نجاة عتابو بنت لخميسات و ب دّات من جماعة لغندور، قرات ف ليسي موسى بن نصير و كان عندها بزاف مع لغنا ف لحفلات لمدرسية و كانت نشيطة ف الألعاب المدرسية حيت كانت مزيانة ف لهونض. نجاة كانت مزيانة ف قرايتها و كانت كاتحلم تكون محامية.
كانت لمواهيب ديالها ف لغنا باينة من صغرها ب فضل صّوت لقوي لّي عندها و طريقة لغنا ديالها ب سّتيل ديال لعيوط د شّلوح د زايان.
نجاة بدات لغنا ف لعراسات د لمنطقة و كانت كاتغني عيوط زايانية و بانت لموهيبة ديالها تا قدرات تسجل أول كاسيطة ديالها، ب تّخبية، مع أوركسترا لمعروفي، و كانت أول سمية فنية ديالها هي "نجاة المعروفي" وكانت غنية "جوني مار" ف ديك لكاسيطة و تشهرات و نجحات بزاف. فاش وصلات خبار لكاسيطة ل دارهوم كعاو عليها حيت لعائلة ديالها كانو محافضين و ما كانوش قابلين باش بنتهوم تمشي ف لكار د لغنا.
نجاة خوات دارهوم و هربات منها فاش كانت عندها 17 لعام، و كانت هاد لهربة سباب أن لبوليس جاو عند دارهوم باش يتأكدو واش ب صّح قتلوها و دفنوها ف دّار حيت وصلاتهوم تبرݣيكة ف هاد لقضية.
لكاريير ديالها
مشات نجاة ل دّار لبيضا و تما تلونصات لكاريير ديالها و كان أول ألبوم ديالها عالمي خرجاتو ف فرانسا و باع 3 د لملاين د لكاسيطات. هنا كاتبان واحد لميزة لّي نفعات نجاة بزاف ف لكاريير ديالها حيت كانت كاتخدم و كاتدير لإنتاج ب طرقان حتيرافية و حاضية مع لقضية د حقوق لمؤلف و هو شّي لّي ما كانوش كايديروه أغلبية لمغنيين شّعبيين.
جّواج ديالها من حسن ديكوك زادها بزاف ف لكاريير ديالها حيت حسن كان من عائلة فنية و ملحن كبير و بجوج بيهوم كتبو و لحنو و نتجو أغاني نجحات مزيان.
غنات نجاة ف بزاف د لمهرجانات و لقاعات و لمسارح لعالمية و ب دّات ف لأولمبيا ف باريز و مسرح فلورنسا ف طّاليان و لميلينيوم پارك ف شيكاݣو.
ف لمجموع، غنات نجاة كتر من 500 غنية.
عيون لكلام
This article uses material from the Wikipedia داريجة article نجاة عتابو, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.