Statistik isch d Leer vo Methode zum Umgang mit kwantitative Informazione (Daate).
Si isch äi Mögligkäit, zum e süstematischi Verbindig zwüsche dr Erfaarig (Empirii) und dr Theorii z mache und fasst bestimmti Methode zämme, zum empirischi Daate z analysiere.
D Statistik wird uf dr äinte Site as äigeständigi mathematischi Disziplin aagluegt, wo Daate sammlet, analysiert, interpretiert oder presentiert, uf dr andere Site as Däilgebiet vo dr Mathematik, bsundrigs vo dr Stochastik.
Si wird in die drei Däilberiich iidäilt:
Die deskriptivi Statistik (oder beschriibendi Statistik oder empirischi Statistik): Daate wärde uf geigneti Art beschriibe, bearbäitet und zämmegfasst. Mit iire Methode verdichtet mä kwantitativi Daate zu Dabälle, grafische Daarstellige und Kennzaale. Es git Instituzione wie die amtligi Statistik oder s «sozio-ökonomische Panel» (SOEP), wo sonigi Statistike mache as Hauptufgoob häi.
Die induktivi Statistik (au mathematischi Statistik, Inferänzstatistik): In dr induktive Statistik läitet mä us de Daate von ere Stichbroob Äigeschafte von ere Grundgsamthäit ab. D Woorschinligkäitstheorii liiferet d Grundlaage für d Schetzigs- und Testverfaare, wo brucht wärde.
Die explorativi Statistik (au Statistik, wo Hüpothese generiert, analytischi Statistik oder Data-Mining) isch methodisch e Zwüscheform vo de bäide andere Däilberiich, het aber immer mee äigeständigi Bedütig. Mit deskriptive Verfaare und induktive Testmethode suecht si süstematisch möögligi Zämmehäng (oder Underschiid) zwüsche Daate in vorhandene Daatebeständ und will sä gliichzitig bewärte, wie stark si si und wie sicher iiri Resultaat. D Ergääbniss, wo mä eso bechunnt, si Hüpothese, wo mä erst as statistisch gsicheret cha aaluege, wenn si vo induktive Testverfaare mit entsprächende (prospektive) Versuechsblaanige, wo druf ufbaut si, bestäätigt wärde.
This article uses material from the Wikipedia Alemannisch article Statistik, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Dr Inhalt isch verfiegbar unter CC BY-SA 4.0, wänn nyt andersch aagee isch. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki Alemannisch (DUHOCTRUNGQUOC.VN) is an independent company and has no affiliation with Wiki Foundation.