美麗戰場

美麗戰場 The Beauty of War
類型	時裝商戰、人性鬥爭
編劇	葉念琛
編導	葉念琛
助理編導	第一副導演：吳嘉培 第二副導演：袁恬怡
主演	陳　瀅、陳山聰、朱晨麗、劉佩玥、 蔣家旻、方力申、陳曉華、姜大衛、 丁子朗、何依婷、林盛斌、張馳豪 特別演出： 唐詩詠
集數	20
主題曲	美麗戰場
作曲	劉易昇
填詞	楊　熙
主唱	JW王灝兒
插曲	沒法等你
作曲	張馳豪
填詞	楊　熙
主唱	張馳豪
製作
拍攝／製作年份	2022年5月－8月
製作統籌	蔡家傑
監製	葉念琛
編審	葉念琛
拍攝地	香港
製作公司	香港電視廣播有限公司
無綫電視翡翠台首播
播出日期	2022年10月3號－10月28號
播出時間	逢星期一至五 21:30－22:30
海外推出
播出國家／地區	馬來西亞 Astro AOD
播出日期	2022年10月3號－10月28號
播出時間	逢星期一至五 21:30－22:30
出面網頁
官方網站

呢套劇2022年5月尾開拍，8月中殺青，10月3號首播，由開拍到首播唔夠半年。

鍾家寶（陳瀅飾）、林小美（陳曉華飾）、李靜兒（劉佩玥飾）三個姊妹情深，畢業後因為唔同原因而各散東西。家寶被小美私底下提名參加雜誌嘅校花選舉，最終脫穎而出後被金牌經理人王一言（陳山聰飾）睇中；一言鼓勵家寶參選香港小姐，但被同屆佳麗兼繼妹鍾家琪（蔣家旻飾）陷害……家寶之後成功入到娛樂圈呢個「戰場」，仲識到富二代龐振宇（方力申飾）。佢哋結婚之後，家寶入到另一個豪門「戰場」，仲同兩個姊妹漸行漸遠，令佢哋互相走遠嘅，究竟係妒忌、尊嚴、財勢，定係其他？

• 陳瀅 飾 鍾家寶
• 陳山聰 飾 王一言
• 朱晨麗 飾 唐昕
• 劉佩玥 飾 李靜兒
• 蔣家旻 飾 鍾家琪
• 方力申 飾 龐振宇
• 陳曉華 飾 林小美
• 姜大衛 飾 龐國棟
• 丁子朗 飾 程裕進
• 何依婷 飾 龐子珊
• 林盛斌 飾 徐富貴
• 張馳豪 飾 區家明

由於《美麗戰場》係台慶劇，加上係葉念琛首次嘅電視劇作品，所以呢套劇一開始被傳媒提及嘅時候，就已經收到唔少關注。不過，不論係中國定係香港嘅網民，都有對呢套劇作出唔少批評，主要係針對部分演員演技浮誇、劇情老土狗血、同埋結局爛尾嘅問題。喺中國影評網站豆瓣，《美麗戰場》得到嘅分數只有4.8分，甚至有網民形容佢係「史上最差TVB劇」。

演技問題方面，唔少香港網民一面倒大彈陳瀅嘅演技，指佢唔自然嘅演技係劇集最大敗筆，高八度聲綫講對白太過火，角色同佢嘅外表唔合襯，同時表情亦非常浮誇。呢啲評語，亦有啲內地網民認同，批評陳瀅集集瞪眼，瞪到自己訓覺都發惡夢。不過，陳瀅回應網民批評嗰陣，亦有話自己會虛心接受，仲話儲起自己瞪眼嘅劇照嚟做貼圖。

另外，劇情亦被指老土兼狗血，而針對爛尾嘅問題，喺大結局播出前一日，葉念琛受訪時話劇入面鍾家琪將會復仇，所有謎團將會解開。，但係大結局嘅時候，成件事落差甚大，從唐昕忽然搭上龐國棟、到龐振宇突然失蹤、鍾家琪喺在最後一刻突然出現，隨即結束等，都令觀眾甚至係演員一頭看得不明所以，引起網民批評。女主角陳瀅亦表示，佢雖然是女主角，但就係最唔了解故事嘅人。而方力申就表示佢拍咗幾個版本，但最終導演無用。葉念琛回應嘅時候就話，以前好多劇集都係開放式結局，最重要係讓觀眾對結局上心同埋引起討論。而當被問到係咪為續集鋪路嘅時候，佢明言有考慮。不過，對於開拍續集嘅提議，由於爛尾同埋演員演技浮誇嘅問題，好多網民嘅反應都偏向負面。