武漢肺炎薩摩亞疫情係介紹「武漢肺炎」喺薩摩亞嘅爆發情形。截至2022年4月10號,薩摩亞夾埋有3665單確診病例,死咗7個人。
薩摩亞喺2020年3月18號懷疑有確診疑似武漢肺炎感染個案,患者曾經去過紐西蘭旅遊;三日後重懷疑出現有8位密切接觸者曾經去過紐西蘭嗰邊返嚟;不過喺同月22~25號先至證實虛驚一場。薩摩亞政府隨後喺同日宣佈,唔畀喺澳洲同紐西蘭冚唪唥嘅航班飛入薩摩亞。同月26號,薩摩亞政府宣佈封國,唔畀冚唪唥船隻做釣魚或未夠14日隔離期而做商務啲人士入境,淨畀貨運船帶貨品或運機油入境。封鎖直到同年5月14號先至解封,不過淨開放咗往返紐西蘭堪培拉同惠靈頓嘅航班。同年6月重宣佈封城,唔畀除食品批發同緊急必需品外嘅其它業務開搞,重呼籲民眾保持至少2m嘅社交距離同限制埋參與大型儀式嘅人數上限。
2020年11月18號,薩摩亞確診咗第一單武漢肺炎感染個案,患者係位船長,喺上個禮拜從紐西蘭坎特貝利大區基督城揸船返薩摩亞時發現感染武漢肺炎。事發六日後,薩摩亞政府宣佈延長隔離期,入境必須要自行隔離21日兼期間核酸結果係陰性先至得。三日後確診咗第二單武漢肺炎個案,患者係70歲嘅老坑,曾經去過澳洲新南威爾士州墨爾本同紐西蘭屋崙,亦喺18號當日同確診第一單武漢肺炎嘅患者一齊搭過同一輪渡,而嗰兩位患者喺同年12月4號好返出院。
踏入2021年,喺2月12號確診咗第三單武漢肺炎個案,患者係美國嘅男性,同佢阿媽一齊搭飛機到屋崙後轉機到薩摩亞,入境薩摩亞後喺第二次檢測核酸時發現陽性而確診。患者喺同年5月17號好返出院。
踏入2022年,1月20號當日開始出現確診10單武漢肺炎感染個案(4男6女,年紀介乎11個月嘅孲𤘅子到63歲嘅老坑)。患者出自澳洲航空嘅航班,喺澳洲昆士蘭州布里斯班飛返薩摩亞時發現,重喺兩日後確診多5單。隨後薩摩亞政府考慮採取封城措施,決定喺23號搞為期48個鐘頭嘅封城。封城期間,又確診多5單感染個案,政府亦宣佈繼續延長一日嘅封城。期間又出多6單感染個案,患者都係喺1月20號搭嘅布里斯班飛返薩摩亞嘅撤僑航班時發現。25號當日又確診多一單,政府亦繼續延長封城。據悉,喺封城期間確診嗰7位患者入面,其中有1位旅客感染咗Δ變種,淨低嗰6位都係感染咗Ο變種毒株。到30號晚黑,又出多三單確診個案,其中重包括咗4歲嘅細路。期間政府宣佈雖然可以暫時解除封城,但係聚會最多限制喺卅人;出入境方面,淨限貨運先至得,唔開放客運通道。
踏入2月,1號確診咗兩單無症狀感染者個案,患者分別係政府司機同醫生,喺14日隔離期結束後時發現。第二日再確診多一單。到月底先至發現有33單感染個案。
踏入3月,7號確診咗八單無症狀感染者個案,患者出自2月27號返去薩摩亞嘅包機航班入面啲乘客。10號確診多4單感染個案,患者都出自3月7號返去薩摩亞嘅包機航班入面啲乘客。
This article uses material from the Wikipedia 粵語 article 武漢肺炎薩摩亞疫情, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.