華列他

華列他港口
(英文名)	City of Valletta
(法文名)	Ville de La Valette
登錄類型	文化遺產
評定標準	文化遺產(i) (vi)
登錄年份	1980年
拓展年份
備考
官方網頁	UNESCO（英語）
地圖

華列他（Valletta，中國大陸譯瓦萊塔）係馬耳他首都，位於馬耳他本島東部沿岸。面積只係得0.55平方公里，2000年估計人口7,048。

喺1565年嘅馬爾他大圍攻之中，統治馬耳他嘅醫院騎士團擊退咗奧斯曼帝國嘅侵襲。騎士團為咗防止敵人再度襲擊，決定要起一座堅固嘅要塞都市。1566年3月28日，當時嘅騎士團總團長Jean Parisot de la Valette就為華列他城奠基，重賜名畀佢。華列他於是就發展成為繁華嘅市區嘞，而當地大部分古色古香嘅建築都係源自騎士團統治時期嘅。為咗保衛華列他城，騎士團喺城入面起咗座向海嘅碉堡，而家列為聯合國教科文組織世界遺產之一。

經過騎士團統治時期同埋短暫嘅法國統治時期之後，華列他嘅建築喺19世紀初受到咗英國統治嘅影響。啲建築嘅閘門改闊咗，又或者重新起過咁。第二次世界大戰期間，華列他遭受到德國同意大利軍隊空襲，多處地方受到嚴重損壞。最知名嘅損壞係喺19世紀初起嘅、離華列他城門冇幾遠嘅歌劇院。

圍城入面現存嘅歷史建築包括：

• 位於Republic Street嘅聖約翰聯合教堂（St John's Co-Cathedral，原本係騎士修道教堂）；
• 位於碉堡附近嘅首相辦公室；
• Palace Square對面、Republic Street上面嘅總統辦公室；
• 位於South Street嘅馬耳他國家美術館；
• 位於Republic Street嘅的馬耳他國家考古博物館；
• 馬耳他國會大樓（原本係騎士團宮殿，Grand Master's Palace）等等。

 

華列他位於馬耳他本島東部沿岸嘅半島度，兩邊係天然海港Marsmaxett同Grand Harbour，係全國嘅主要海港。貨物起卸區設於Marsa，而郵輪客運站就喺Grand Harbour度。

華列他面積得0.55平方公里，大細只係相當於其他世界大國嘅細區仔。作為馬耳他嘅首都，華列他係國家嘅行政、商業中心，亦係全國嘅運輸樞紐。馬耳他嘅公共運輸系統好依靠陸路，主要嘅公共交通工具係巴士，而全國大部分嘅巴士路線都會經過華列他城門外嘅巴士總站。城入面要揸車受到一定嘅限制，部分主要道路就劃為行人專用區。

華列他城入面有多座古色古香嘅建築，聚集咗啡廳、餐館、銀行、酒店、政府辦公室等等。碉堡就改設為公園，畀遊客觀賞海港同埋馬耳他島上嘅景色。

喺一眾古建築之中，Old Theatre Street嘅Manoel Theatre，自1732年起已經係演藝場地㗎嘞。嗰間音樂廳當年由騎士團團長António Manoel de Vilhena起嘅，而家多數用嚟做古典文藝表演，亦都有時用嚟搞詩詞朗誦會、爵士樂、民俗樂、搖滾樂等表演呀咁。

每年2月10號，華列他全城會慶祝聖保羅日。

華列他亦都因華列他足球會（Valletta FC）變得好出名，係馬耳他島上最強勁嘅足球會之一。

2005年，史提芬·史匹堡嘅電影作品《慕尼黑》嘅部分場景，就係喺華列他度拍㗎嘞。