《時代革命》(粵拼:si4 doi6 gaak3 ming6)(英文:Revolution of Our Times),係一部2021年香港修例風波紀錄片,由周冠威執導,2021年7月16號喺第74屆康城影展首映。
時代革命 Revolution of Our Times | |
---|---|
資料明細 | |
導演 | 周冠威 |
片長 | 152分鐘 |
產地 | 香港 |
話 | 粵語 |
官方網站 | Facebook專頁 |
上畫同發行 | |
上畫日期 | 2021年7月16號(康城影展) |
由於《香港國家安全法》嘅實施以及隨之而嚟嘅《電影檢查條例》檢查員指引修訂,《時代革命》內容同片名意味住呢套片幾乎冇可能喺香港公開發行或者放映。
《時代革命》以香港修例風波為主題,通過示威運動入面七組唔同示威者嘅視角,展現出運動嘅宏觀背景同參與者嘅個人體驗同感受。影片首先介紹九七回歸嘅歷史背景,之後詳盡記錄住2019年夏天開始嘅示威運動過程,涵蓋咗示威者佔領立會、七二一元朗襲擊以及香港理工大學衝突等關鍵事件,最後以第二年《香港國家安全法》嘅通過同實施做結尾。
影片訪問咗戴耀廷、李怡、林榮基、何桂藍,以及擔當不同崗位嘅示威者,影片最後播放黃之鋒嘅公開發言,形容香港係「自由世界前緣、抵抗極權嘅香港」。
喺2019年抗爭嗰陣,仍然有唔少人願意拍呢啲紀錄抗爭歷史嘅影片,開頭周冠威雖然受邀,但未覺得自己嘅紀錄會有幾重大嘅意義,但去到後嚟北京唔問過香港人,喺香港強行實施《香港國安法》,有唔少導演被迫退出,周冠威開始感到責任漸大,而且仲有啲行家將手上大量影片轉讓畀佢,希望佢幫手完成歷史。
而最終成品,除咗周冠威團隊親身拍攝嘅內容之外,亦有採用唔同嘅新聞素材,有啲係人哋無償供片,而佢亦有向傳媒買片。篩選剪接片段,亦係佢最花時間嘅一部分。但亦因為段片其實係好多人嘅貢獻,所以電影署名為「香港人作品」。周冠威亦形容,自己只係去到最後剪接、負責把關嘅人。
因為推出之前,壹傳媒旗下三間公司畀保安局未經法庭手令強行凍結資產之後而令到蘋果日報同壹週刊停刊,周冠威一度擔心,社會會被政府搞到恐懼,連分享都唔敢,但結果大量網民仍然如常去分享有關新聞,報導同預告片,佢表示開心。有唔少網民表示睇到流眼淚,紛紛感謝導演記錄歷史。但亦有人表示,擔心導演拍完呢條片後嘅人身安危。
2021年11月7號,《時代革命》獲得第58屆金馬獎最佳紀錄片。導演周冠威之後公開多謝所有香港人,形容呢套片係屬於每一個有良知、有公義、為香港流過眼淚嘅香港人,又希望呢套戲可以畀香港人一份安慰,一份擁抱。
杜汶澤、羅冠聰同許智峯就分別喺社交媒體公開向周冠威表達謝意,杜汶澤形容呢段片記錄香港人一段以血淚憤勇抵抗極權嘅歷史,流傳萬世,令每一個喺香港、喺海外、喺監獄入面嘅同路人都感到驕傲。
This article uses material from the Wikipedia 粵語 article 時代革命 (紀錄片), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.