孔慶慇

佢參與香港商業電台工作期間有過多個暱稱，包括：黑叻、黑哥、長洲淫慇、商台劉青雲、商台麥包、陝西江門麥包、東莞麥包、肥粉、長洲黑濱、短濱、急急關注、王安石、野豬、丁蟹。雖然其硬漢形象及膚色令其另有「鐵漢」之稱，被譏笑冚鐵被瞓覺、用鐵筆扒飯，但同時又經常被梁志健（森美）譏諷佢係三八婦女節出世。

孔慶慇讀過長洲國民學校，灣仔聖若瑟書院及香港華仁書院。 2000 年成為香港商業電台DJ，與同屬香港華人書院畢業嘅蘇耀宗（細So）參與過二台節目《森美移動》同《兄弟做野》。

當年曾經喺節目遊戲中輸咗要即時落九龍城便利店買避孕套，但係被人發現走咗無買到。另外又被森美指派參觀中國第一位太空人楊利偉嘅專題展覽，向森美報告期間誤以為楊利偉餵飼嘅白鴿為雞。

後來離職去咗美國威斯康辛州升學。喺美國期間一直畀《森美移動》啲舊同事無間斷打電話整蠱。由於佢有一段時間無聯絡，令森美喺節目《森美移動》呼籲聽眾喺Yahoo!香港搜尋孔慶慇個名，因而令佢先後登上 Yahoo! 香港搜尋榜人氣組同埋洩氣組第一名。

孔慶慇亦有參與音樂創作，代表作係劉德華嘅《鴿子情緣》，呢首歌成為 903 廣播劇《鴿子園》主題曲，並獲得 2001 年度叱咤樂壇流行榜頒獎典禮專業推介．叱咤十大第四位。

佢喺 2006 年經濟系畢業後返香港之後喺唱片公司做嘢，又再做香港商業電台星期六足球節目《一腳踢》主持，其後辭職，出任紅牛能量嘢飲高層。

同時佢亦熱衷於足球運動，於 2013 年自資出版體育消費雜誌 The PLAY Magazine ，聲稱為一本「唔講波」嘅足球雜誌。經常訪問香港足球前輩及當時嘅球星，甚至曾經到訪日本、台灣、英國等地參觀當地嘅足球球會及球圈工作。雖然雜誌出版工作已於 2018 年結束，但其實自 2016 年亦同馬啓仁（ Keyman ）主持二台一個「唔講波」嘅足球節目《皇牌出場》。喺 2018一年 5 月二台節目《在晴朗的一天出發》舉辦「唔係呀馬世界杯」帶住「皇牌出場隊」迎戰「晴朗隊」； 2020 年 1 月又帶「黃牌運輸隊」喺「唔係呀馬賀歲盃」對决「晴朗飲食隊」。另外於 2018 年 10 月受林海峰委派任務——帶潘小濤到英國利物浦晏飛路球場觀看球賽。由 2019 年起成為香港賽馬會青少年體育記者培訓計劃嘅主任導師（創作）。

於 2015 年尾接替鄭詩君（ C 君）加盟二台節目《好出奇》（ holy tricky ），難得令到同一個電台節目內嘅所有節目主持人（蘇耀宗（細 So ）、吳佩賢（朱薰））都係同一年（ 1979 年）出世。由於孔慶慇離任，《好出奇》亦喺 2016 年 5 月完結。

2018 年 2 月李澄（西瓜）離職及朱穗傑（傑傑）調任為二台節目《口水多過浪花》嘅節目監製。 2018 年 4 月 20 日星期五開始，獲邀同森美、小儀主持《早霸王（中文：早霸王）》，首日開咪被森美刻意安排遲半個鐘入直播室造成「壓軸出場」嘅效果。之後喺 2018 年 5 月 14 日星期一正式參與「視電台」嘅《識貨之人》環節，當日試食三文魚芝士水餃。

孔慶慇嘅電台師父係叱咤 903 節目監製朱穗傑（傑傑），孔慶慇嘅主持風格都好大程度受佢影響。

2023年3月，孔慶慇正式離開《早霸王》，但仍繼續主持《皇牌出場》。