唐樓(粵拼:Tong4 lau4;英文:Tong lau)係一種樓,冇𨋢,唔計天臺最多八層高。唐樓嘅結構以棟樓四邊牆同埋靠陣嚟支撐。同打後先出現嘅洋樓唔同,唐樓多數係商住混用,地下多數用嚟做舖頭,樓上攞來住。唔少唐樓對住街都有騎樓。
唐樓個名嚟自洋樓出現嘅年代(19 世紀後半橛)。嗰時啲粵人以為建築風格主要分兩種-唐式同西式-所以唐人啲建築(無論係粵式、閩南式、海派定係北方)都一律嗌做「唐式」,而西人啲建築(無論係英國、法國定係東歐)都一律嗌做「洋式」。
香港政府未大量咁起公共房屋之前,除咗寮屋嘅居民外,幾乎所有香港人都係住喺唐樓嗰度。唐樓早喺 19 世紀中後橛開始喺香港嗰度出現。嗰陣時啲唐樓樓高兩至三層,闊十五呎(大約 4.5 米),用青磚砌出嚟(呢點同古典粵式建築好似),而屋頂係用木結構同埋瓦片組成嘅斜頂,唐樓側面就有啲木樓梯嚟連接各層。當中部份嘅唐樓更加有成兩呎闊嘅鐵造騎樓。
19 世紀尾開始,香港嘅唐樓普遍有三至四層,每層高四米,闊五米。喺設計方面,騎樓用磚砌嘅支柱嚟撐住,並跨出唐樓前面嘅行人路。因為呢種設計係喺廣州開始嘅,所以當時啲人俗稱佢做「廣州式騎樓」。到咗 1930 年代,混凝土取代咗磚成為唐樓嘅主要建築材料。而家重存在嘅唐樓,尤其係喺九龍嘅,都係用混凝土起嘅。
二戰之後,香港嘅人口升得好勁,房屋短缺。唔少唐樓都畀人攞嚟整分租。通常分租嘅唐樓會由其中一位住客「包租」-畀人嗌做「包租公」或者「包租婆」。包租嗰個人向業主每個月交固定嘅租金,同時亦都負責交水電。唐樓嘅單位再有得劃分做房嚟分租,通常最少分做「騎樓房」(亦有個名叫「頭房」,面積大啲同光線充足)、中間房、尾房;好多時更加會喺廚房或者廁所度整啲「閣仔」(閣樓)出租。亦都有將個單位細分做「床位」。正因為咁,根據香港法例第 123F 章《建築物(規劃)規例》嘅第 46 條,唐樓嘅定義係「任何建築物,而喺佢住嘅部分有任何起居室擬供或改裝以供多過一個租客或分租客使用」,而呢條法例到家陣重有效。
隨住市區嘅急速發展,香港部分嘅唐樓經已畀人拆咗重建,但係大部分都重係分佈喺以下各個地方,而且都經過翻新嚟延長使用期:
市區重建局近年保留咗灣仔莊士敦道、茂蘿街同埋巴路士街多棟嘅唐樓,並計劃喺修葺之後做文化用途。喺灣仔石水渠街 72 至 74 號,喺 1922 年起嘅幾棟唐樓,因為畀人油成藍色,而有藍屋嘅花名,亦都畀政府列咗做歷史建築物。喺旺角荔枝角道,由九巴創辦人之一雷亮喺 1931 年起嘅唐樓雷生春,就喺 2003 年 10 月 7 日由九巴家族後人捐贈畀香港政府,並計劃改建做博物館。
喺 2010 年 1 月 29 日下晝1 點 43 分左右,發生咗馬頭圍道冧唐樓事故,喺馬頭圍道 45 號 J 一座 5 層高嘅唐樓成座冧咗,造成 4 個人死亡,係香港二戰之後嘅少有同類事件,令到政府同社會都開始關注全港同類大約五廿年樓齡嘅唐樓嘅安全問題。
澳門市區重保存咗唔少唐樓,喺議事亭前地同新馬路一帶嘅唐樓,依然保留咗廿世紀初期嘅風格,部份唐樓嘅上層就經改裝之後畀人攞嚟做商業用途。
This article uses material from the Wikipedia 粵語 article 唐樓, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.