ინგირწყარი — წყარმალუ ბჟადალ საქორთუოს, კავკაციონიშ თარი წყარგჷმმართალი ქჷნდჷრიშ ობჟათე კართეს დო კოლხეთიშ რზენს.
ოდუდე უღუ ჯიშთი ინგირს, ზუღაშ დონეშე 2614 მ-ს. ნოღა ანაკლიაწკჷმა აკათუ უჩა ზუღას. სიგირძა 213 კმ, ღანჩოშ ფართობი 4060 კმ2. თარი ნადუეფი რე — მარძგვანი: ადიშისჭალა, ხალდეჭალა, მულხრა, დოლრაჭალა, ნაკრა, ნენსკრა; კვარჩხანი: თხეიში, ხუმფრერი, ლასილი, მაგანა, ჯუმი დო შხვა. ინგირწყარი ჟიმოლენს კვათჷნს შონეშ ქვიბის, ოდო უკული ტომბა დო ცორქო ლეხერს მეხირჩანს. ჟიმოლენს დო შქა დინაფას წყარმალუშ კალაპოტი მინჸურე ჭორომიანიე. ნოღა ჯვარწკჷმა წყარმალუ გიშმურს კოლხეთიშ რზენს, ქიმინუნს ფართო ლეხერს დო იჩხვინჩხვალუ. ოფუტე რუხიწკჷმა ირთუ ჟირი ნოჸელათ, ნამუეფ შქას აშაძჷ 12 კმ სიგირძაშ დო 0,5-2,0 კმ სიგანაშ კოკი. თიშა გეკიდილი რე ოფუტე შამგონა. ინგირწყარი აკოწყორილი რდუალაშ წყარმალუ რე; ჟიმოლენს წანური გიმნაველიშ 66 %-ის აკმადგინანს თირიშ დო ჯიშთიშ წყარი, 22 %-ის გრუნტიშ წყარი, 12 %-ის ჭვემაშ წყარი, თუდოლენს ოსქვებურო — 18 %, 26 % დო 56 %-ის. ოშქაშე წანური ხარჯი ოფუტე ხაიშიწკჷმა 109 მ3/წმ მანგიე აკაკათაფუწკჷმა 170 მ3/წმ. წყარალა უჩქჷ აფუნს დო ზარხულს, წყარმორჩილი რე ზათონც. ოფუტე ლახამულიშე ოფუტე შამგონაშახ ინგირწყარს ირინუანა ჯა-ტყაშ გიმასიონტაფალო, თუდოლენს — ოწყარალო, ინგირ-გალიშ ოწყარალი არხიშ მეშქაშალათ. ნოღა ჯვარწკჷმა გიკიდჷ ინგირწყარიშ ჰიდროელექტროსადგჷმქ. ოფუტე ტობარწკჷმა დოპროექტაფილიე 750 ვითარი. კვტ სიძალიარაშ ტობარჰესიშ გეკიდუა. ინგირწყარიშ მანგას გიშმურს სამარგალოშ დო აფხაზეთიშ რეგიონეფიშ ადმინისტრაციული სანძღო.
This article uses material from the Wikipedia მარგალური (Margaluri) article ინგირწყარი, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). დინორე მიწორინაფილი რე გეჸვენჯი ლიცენზიათ (დო შხვა ვა რე მეწურაფილი-და): CC BY-SA 4.0. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki მარგალური (Margaluri) (DUHOCTRUNGQUOC.VN) is an independent company and has no affiliation with Wiki Foundation.