თერმოდინამიკა (ჯვ.
ბერძ. θέρμη Therme — სიტიბა + δύναμις Dynamis — ნძალა) — ფიზიკაშ დისციპლინა ნამუთ გურაფულენს სიტიბაშ, მუშობაშ, ტემპერატურაშ დო ენერგიაშ ურთიართობას ართიანწკჷმა. ჸათე ურთიართობეფი გერსხილი რე თერმოდინამიკაშ ოთხ კანონს.
თერმოდინამიკაქ მუჭოთ მენცარობაქ დირსხუ XIX ოშწანურას. ჸათე პერიოდიშ მენცარეფი (ნიკოლა ლეონარ სადი კარნო) ოცადუდეს ორქიშ ქვარქვანტეფიშ ეფექტურობაშ გაუჯგუშებას. 1824 წანას კარნოქ გჷმაბჟინუ მენცარული ნახანდი "ფირქეფი დაჩხირიშ მამოტივირაფალი ნძალეფიშ გეშა". ყათე წინგით კარნოქ მიშეღჷ დიდი თია ახალი დისციპლინაშ - თერმოდინამიკაშ დორსხუაფაშა.
1854 წანას ბრიტანალი ფიზიკოსიქ დო მათემატიკოსიქ უილიამ ტომსონიქ წჷმარინუ თერმოდინამიკაშ, მუჭოთ ზოხორინელი დისციპლინაშ ფორმულაცია.
გერმანალი ფიზიკოსიქ რუდოლფ კლაუზიუსიქ, სადი კარნოშ ციკლიშ გიმორინაფათ, წჷმარინუ სიტიბაშ თეორიაშ გაუჯგუშებული ვერსია. კლაუზიუსიქ, მუში ომენცარე ნახანდის "სიტიბაშ ჸარაფული ნძალეფიშ გეშა" (ნამუქჷთ 1850 წანას გიშართჷ), წჷმარინუ თერმოდინამიკაშ მაჟირა კანონიშ ბაზისური იდეა, 1865 წანას მიშეღჷ ენტროპიაშ კონცეფცია დო 1870 წანას ვირიალიშ თეორემა.
დუდშე თერმოდინამიკული რკვიებეფი ორხველუდჷ ხვალე სიტიბაშ მექანიკურ ქვარქვანტეფს. უკულ თიქ გეფართინუ ქიმიური ნიფთიერებეფიშ დო ქიმიურ რეაქციეფიშ რკვიებეფით. თეხანური პერიოდიშო არსებენს ქიმიური თერმოდინამიკა ხოლო, ნამუთ გურაფულენს ენტროპიაშ როლს ქიმიური რეაქციეფიშ პროცესის.
This article uses material from the Wikipedia მარგალური (Margaluri) article თერმოდინამიკა, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). დინორე მიწორინაფილი რე გეჸვენჯი ლიცენზიათ (დო შხვა ვა რე მეწურაფილი-და): CC BY-SA 4.0. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki მარგალური (Margaluri) (DUHOCTRUNGQUOC.VN) is an independent company and has no affiliation with Wiki Foundation.