Playstation 2

プレイステーション ツー

Li PlayStation 2, c' est l' no del deujhinme grande console di Sony. C' est ene console del shijhinme djeneråcion. Elle a rexhou e 2000, e-n Urope. Elle s' a vindou disk' e 2013.

Atake

Sony aveut advierti do pordjet d' ès deujhinme grande console, li 2 d' måss 1999. Li PlayStation 2 aveut stî prezinté a tertot, li 11 di may del minme anêye, tins di mosteure lomêye « Electronic Entertainment Expo ».

 

Sôres

Prumire varyisté

Li prumire varyisté di PlayStation 2 dmeure foirt rconoxhåve. Come di djusse, c' est les grossès consoles, come sol foto a droete. La k' i gn a ki bråmint d' coleurs diferintes, k' el madjorité des coleurs est foirt råle. C' esteut l' varyisté k' esteut sol mårtchî inte 2000 eyet 2004.

Po mete ubén rsaetchî ene plake, on doet aspoyî l' boton avou li triyingue et rectingue bleus åtoû. Po l' côper, on doet aspoyî lonmint sol boton ådzeu : el ci avou l' mot « Reset » e vete. Si on-z astoke seulmint k' on ptit côp, el console va rdemarer.

Deujhinme varyisté

 

Li deujhinme varyisté, leye, elle est bråmint pus ledjire. I gn åré yeu ki cwate coleurs : li noer (li pus peuprece), li grijhe (peuprece eto), li rôze (el minme sacwè) ey el blanke. C' est l' varyisté k' a stî sol mårtchî pindant ey après 2004 disk' al fén d' ès vindêye.

Po l' erdemarer ubén l' distinde, i fåt fé les minmès sacwès avou l' boton di droete ki po li prumire varyisté. Po candjî d' cédés ubén di dévédés, on doet astoker l' boton al mitan. El diferince, c' est k' el lijheu di plakes ni ride pus. Al plaece, ça si drouve e hôteur.

Materiå

Ès chipe ([EN] processing unit), c' est l' Emotion Engine. Ene d' ses noveaté, c' est d' awè stî, a l' epoke, ene console avou on lijheu d' cédés eyet di dévédés.

Limerotaedje

Li PlayStation 2 a cnoxhou sacwants limerotaedjes, « SCPH-xxxxx ». Ça candje sovint sorlon l' edroet ewou çk' el console est vindowe. Po çoula, i fåt djusse rwaitî el dierin limero, dj' ô bén, l' ci k' est l' pus a droete :

• SCPH-xxxx1 : Amerike bijhrece
• SCPH-xxxx2 : Ostraleye eyet Novele-Zelande
• SCPH-xxxx3 : Urope (åré Rweyåme-Uni)
• SCPH-xxxx4 : Rweyåme-Uni
• SCPH-xxxx5 : Corêye nonnrece

Disk' asteure, li PlayStation 2 dmeure el console ki s' a l' pus vindou ttåvå. Do costé des troes consoles del , elle a grandmint mougnî ses deus bateus : li Xbox di Microsoft ey el GameCube di Nintendo. I nd a puzieurs råjhons a ça, metans k' les manotes estént les pus åjheyes a prinde dins les mwins eyet k' ele rotént sins rujhe.

Poirtant, li PlayStation 2 n' esteut nén l' pus roede. Tot rwaitant el moteur des consoles, i gn aveut k' el DreamCast di Sega k' esteut pus flåwe. La k' li Xbox esteut dvant ele. Avou ça k' el GameCube li bateut ossu sol plan tecnike.