Microsoft

Il est cnoxhou long et lådje di cåze di s' sistinme d' operance "Windows", ki fwait roter 90 åcint des copiutreces di måjhon so Daegn etire. C' est l' sistinme d' operance "Windows" k' a spårdou li tecnike des purneas.

L' askepieu et lontins prezidint d' Microsoft, Bill Gates est ene des pus ritchès djins do monde.

On-z a rprotchî a Microsoft di n' nén dner li scret di s' sistinme d' operance, ey insi espaitchî les programeus a leu boûsse d' etcherpeter des programes ki vont avou "Windows".

Dispu 2004, li Comission Uropeyinne est e margaye avou Microsoft, pask’ i spotchèt tos les ôtes fijheus d' sistinmes d' operance eyet d' programes.

Ça fwait ki, li 24 di måss 2004, Microsoft a stî gadjî po 497 miyons d’ uros.

Li 8 di djun 2004, Microsoft ala-st en apel al Coû uropeyinne di djustice a Lussimbork. Ci-cial oblidje Microsoft a payî l' aminde divant l' djudjmint d' apel. Mins zels, i n’ schoûtèt nén. Ça fwait ki, li 15 di decimbe 2005, li Coû d’ Lussimbork ricodåne Microsoft a payî ene astrinte d' 1 miyon et dmey d’ € par djoû pask’ i n’ ont nén apliké l’ djudjmint di 2004.

Microsoft ni paye todi nén. Et, pitchote a midjote, å 12 di djulete 2006, li desse avind les 280 miyons d’ uros.

Li 17 di setimbe 2007, li Coû d’ Lussimbork rind s’ djudjmint, tot dnant tos les toirts a Microsoft.

Li 22 d’ octôbe 2007, Microsoft anonce k’ i n’ irè nén en apel.

Si vont i accepter :

1. di drovi les lokets di si sistinme d’ operance Windows. Dabôrd, les programeus a leu boûsse pôront vni ovrer dsu.
2. di clawer li montant des abondroets ridvous a Microsoft po bouter a pårti d’ leu tcherpinte infôrmatike a 10.000 uros, on côp l' an, po tchaeke diswalpeu d’ programes.
3. di baxhèt cråndimint les abondroets pol sistinme « Windows » : di 5,95 %, i pasnut a 0,4 åcint des vindaedjes.