Clinton Richard Dawkins (Nairobi, 26 moarte 1941) is een Iengelsn etholoog, evoluusjebioloog en populair-wetenschappelike schryver.
T' hope mè Stephen Jay Gould is Richard Dawkins êen van de bekendste moderne schryvers over de evolutietheorie. Je verdedigt dien theorie mè wetenschappelike argumentn tegen kritiek vanuut zowel wetenschappelike as nie-wetenschappelike kriengn.
J' is een uutgesprookn atheïst, seculier humanist, en skepticus.
Toet dat j' acht joar was weundigde Dawkins in Kenia, woa dan zyn ouders een boerdery haan. Derachter zyn ze noar Iengeland verhuusd.
Dawkins studeerdigde zoölogie aan 't unif van Oxford, woardat je wierd ounderweezn deur den Hollandschn etholoog, zoöloog en Nobelpryswinnoare Niko Tinbergen. Van 1967 toet an 1969 was tjie assisteernd hoogleroare in de zoölogie an 't unif in Berkeley, Californië. Sedert 1970 is tjie as zoöloog verboundn an 't unif van Oxford, woardat je tusschn 1995 en 2008 de post van Simonyi Professor for the Public Understanding of Science haad. Verder is tjie ook nog Fellow of the Royal Society (Britse academie vo nateurwetenschappn). In 2005 kreeg tjie een êredoctoroat van den Vrije Universiteit Brussel, en in 2009 êenn van den Universiteit Antwerpen.
Dawkins is ounder andere bekend vô 't populariseern van de evolutietheorie in verschillende boekn, met de vornaamste The Selfish Gene (1976), The Blind Watchmaker (1986) en The Ancestor's Tale (2004).
Zyn vornoamste bydrage toet d' evolutietheorie is 't idee da nateurlike seleksje up de geenn werkt, zodoanig da je zou kunn'n peizn da 't lichaam van een bêeste of een plante moa juuste een maniere is vor het DNA hem vôort te doen zettn.
Zyn upvattiengn over d' evolutietheorie brochtn in conflict met de creationisten. Zyn boek The God Delusion (2006) kan gezien wordn as een ofrekening met die overtugiengn van uut 't oogpunt van een atheïst, binst da zyn boek The Greatest Show on Earth: The Evidence for Evolution mêer geschreevn vanuut 't standpunt van een wetenschapper.
Neffest zyn publicoasjes is tjie ook een veelgevraagd spreker en j' hèt an veel televisieprograms en -debattn dêelgenoomn.
This article uses material from the Wikipedia West-Vlams article Richard Dawkins, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). De inhoud is, tenzij anders aangegeven, beschikbaar onder CC BY-SA 4.0 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki West-Vlams (DUHOCTRUNGQUOC.VN) is an independent company and has no affiliation with Wiki Foundation.