Žukovk

Se om Žukovkan ümbrikon (edel 2021. vot — rajonan) administrativine keskuz.

Žukovk
Жуковка

Lidnanznam
Valdkund	Venäma
Eläjiden lugu (2021)	17,628 ristitud
Pind	13 km²
Telefonkod	+7−48 334-xx-xxx
Avtokod	32
Aigvö	UTC+3 (MSK+0)

Eländpunktan aluz om pandud vl 1867 kuti pol'stancii holitamha «Orel — Vitebsk»-raudted. Kätihe raudtestancijaks vl 1871. Saudihe raudanvalamižtegint raudten täht 19. voz'sadan lopus, raudteškolad 20. voz'sadan augotišes. Kätihe tegimišton sijaližeks keskuseks aigan mändes, i sai radnikžilon statusad VCIK:an pätandan mödhe vn 1931 31. päiväl redukud. Radnikžilo sai lidnan statusad vl 1962.

Žukovk šingotase «Stels»-kvadrocikliden, lumi- i solikkuimiden da veloramoiden järedal tegimel, sömtegimišton edheotandoil (maidtegim sen saguden pästandanke, kombisötkentegim, villänümbriradai kombinat), mugažo tehnologižen mašiništon tegim radab i mecan edheotandad oma väges.

Lidn sijadase Desnan hural randal, 150..160 m ü.m.t. korktusil. Matkad Bränskhasai om 56 km suvipäivnouzmha. Lähembaižed lidnad oma Dät'kovo 40 km päivnouzmha orhal vai 63 km avtol i Sel'co 40 km suvipäivnouzmha raudtedme.

Latiši-žilo da kuz' küläd mülüihe lidnankundha Žukovkan ližaks. Lidnankundan pind oli 74,4 km².

Vn 2010 Venäman rahvahanlugemižen mödhe lidnan eläjiden lugu om 18 269 ristitud, rajonan pol'. Kaikiš suremb lidnan ristitišt oli 19..20 tuhad eläjid vozil 1989−2005 (20 600 rist. vl 1996). Kaik 16 953 ristitud elihe lidnas i 17 917 ristitud kaikes lidnankundas vl 2017.

Ortodoksižen hristanuskondan ph. Aleksandr Nevalaižen jumalanpert' om udessaudud vll 1991−1995.

Bränskan agrarižen tehnikuman (Starodub) Žukovkan filial om lidnan professionaližen opendusen aluzkundaks.

Jäl'gmäine lidnan pämez' (Lidnan Rahvahandeputatoiden nevondkundan ezimez') oli Galina Šiškareva vn 2014 tal'vkuspäi vn 2021 keväz'kuhusai.

• Enččen lidnankundan lehtpoled Žukovkan ümbrikon tobmuden zh32.ru-saital. (ven.)