Sumgajit

Se om lidn tazovaldkundan alištusenke, Baku-pälidnan lodehline kaimdailidn, mülüb sen aglomeracijha.

Sumgait
Sumqayıt

Lidnanznam
Valdkund	Azerbaidžan
Eläjiden lugu (2015)	298,000 ristitud
Pind	94,17 km²
Pämez'	Zakir Faradžev (sügüz'ku 2015—)
Telefonkod	+994-(0)18
Aigvö	UTC+4

Eländpunktan aluz om pandud vl 1938 sauvomha kivivoin ümbriradajid tegimid keskustas Bakuspäi varuitomudhe näht. Om nimitadud ühtennimižen penen jogen mödhe. Sumgajit sai lidnan statusad vl 1949.

Himižed, metallurgižed, sauvondmaterialiden da tekstiližed edheotandad oma Sumgajitan tegimišton aluseks.

Lidn sijadase 30 km lodeheze Bakuspäi, Apšeronan pol'sarel, Kaspijan meren randal, 5..30 m korktusil Kaspijan pindan päl. Samur-Apšeronan kanal ümbärdab lidnad suvespäi.

Klimat om subtropine kuiv. Paneb sadegid 247 mm vodes, vihmatomuz oleskeleb kezakus-elokus.

Sumgajit jagase nomeruidud lidnanlaptoihe, läz ei ole nimitadud irdoid. Kaks' lidnanvuittušt žilod oma alištunuded lidnan tobmudele: Gadži-Zeinalabdin i Džorat. Apšeronan rajon röunatab lidnanke, Bakun municipaline territorii om läz päivnouzmašt lidnan röunad.

Vl 2014 lidnan eläjiden lugu oli 294 500 ristitud. Vl 2018 ristitišt kahtenke lidnanvuiččenke žilonke oli 341 tuhad eläjid.

Lidnalaižiden 97 % oma azerbaidžanlaižed, ristitišton londuseline ližaduz om znamasine.

Kaik 13 üläopendusen aluzkundad i 6 kolledžad ratas lidnas. Sumgajit-futbolklub vändab ezidivizionas.

Avtobusad, maršruttaksid da avtotaksid oma kundaližeks transportaks. Kaks'žiruižed ezilidnelektrojonused ühtenzoittas lidnad Bakunke da Apšeronan pol'saren eländpunktoidenke rengazraudtedme. Kiruhavtote om Bakuhusai. Meriport radab lidnas.

• Lidnan tobmuden oficialine sait (sumqayit-ih.gov.az). (azerb.)