Mirnii (ven.: Мирный, jakut.: Мииринэй / Мирнэй) om Venäman lidn da lidnankund Saha Tazovaldkundan päivlaskmas.
Se om tazovaldkundan koumanz' lidn eläjiden lugun mödhe, Mirnijan rajonan administrativine keskuz.
Lidnanznam | Flag |
Valdkund | Venäma |
Eläjiden lugu (2020) | 35,390 ristitud |
Pind | 15 km² |
Pämez' | Aleksei Tonkih (sügüz'ku 2022—) |
Telefonkod | +7−41 136-xx-xxx |
Avtokod | 14 |
Aigvö | UTC+9 (MSK+6) |
Vl 1955 avaitihe «Mir»-kimberlitturut, sen samine vedihe vll 1957−2001 kar'jermahtusel. Panihe eländpunktan alust vl 1955 samha diamantoid, nimitihe löudmižsijan mödhe. Vl 1959 Mirnii sai lidnan statusad.
Lidn om Jakutijan koumen rajonan diamantoiden samižen keskuz, «Venäman diamantoiden pälidn». «ALROSA»-kompanijan päfater, sen energetikan tütärkompanijad, kaks' kaivust («Mir», «Internacional'nai») da küllästamižfabrik sijadasoiš täs. Toižed edheotandad oma leibtegim da maidtegim. Kivivoinümbriradai tegim om sauvomas.
Lidn sijadase Ireläh-jogen oiktal randal (jakut.: Иирэлээх, Vilüi-jogen bassein), 350 m ü.m.t. keskmäižel korktusel, vezivaradim om ülezjogen. Matkad Jakutskhasai om 815 km päivnouzmha orhal vai 1270 km «Vilüi»-avtotedme. Lähembaižed lidnad oma Nürb 237 km pohjoižpäivnouzmha orhal vai 387 km avtotedme i Lensk 209 km suvhe orhal vai 234 km avtol.
Klimat om ven kontinentaline subarktižen röunal. Voden keskmäine lämuz om −6,9 C°, kezakun-elokun +14..+17 C°, tal'vkun-uhokun −26..−30 C°. Ekstremumad oma −54 C° i +36 C°. Paneb sadegid 317 mm vodes, enamba kezakus-elokus (46..53 mm kus), vähemba tal'vkus-sulakus (9..15 mm kus).
Mirnii om lidnankundan üks'jäine eländpunkt. Lidnankundan pind — 7 177,97 km².
Vn 2010 kaiken Venäman rahvahanlugemižen mödhe eläjiden lugu oli 37 188 ristitud, rajonan pol'. Kaikiš suremb ristitišt oli 39..40 tuhad eläjid vll 1992 i 2002−2005 (40 tuh. rist. vl 2003). Vl 2017 lidnan ristitišt oli 35 376 eläjad.
Ortodoksižen hristanuskondan ph. Stroican jumalanpert', ph. Ezikuctud Ondrii-apostolan mez'jumalankodi i kaks' časounäd oma olmas lidnas.
Mirnijan regionaline tehnine kolledž i üläopendusen viž filialad (Jakutsk, Tomsk, Novosibirsk) oma lidnan professionaližikš aluzkundoikš.
Lidnan pämez' om sen Administracijan pämez'. Edeline lidnan pämez' om Klim Antonov (keväz'ku 2017 — sügüz'ku 2022). Lidnan Nevondkundan ezimez' om Julija Mödova vn 2021 semendkuspäi.
Avtobusad oma kundaližeks transportaks lidnas da sen ümbrištos. Lidn ühtenzoitase avtotel Lenskan jogiportanke. «Vilüi»-avtote Jakutskhasai om saudud, no asfal'tkrepindata tobjimalaz, nell' sildad oma pordaigaližed sil. Voib sadas tal'vteidme Irkutskan agjahasai.
Tatanmaine civiline Mirnii-lendimport (МИР / MJZ / UERR, 363 tuh. passažiroid vl 2019) sijadase ani päivnouzmha lidnfartališpäi, uz' lendahtamižsarg om sauvomas i linneb vaumitud vn 2023 lopus. Se om varalendimportaks rahvahidenkeskeižiden reisiden täht Pohjoižamerikaspäi Azijha. Tehtas reisid Moskvha i Sibirin lidnoihe (Irkutsk, Jakutsk, Habarovsk, Novosibirsk).
Mirnii (Saha Tazovaldkund) Vikiaitas |
Saha Tazovaldkundan lidnad | ||
Aldan | Jakutsk | Lensk | Mirnii | Nerüngri | Nürb | Olökminsk | Pokrovsk | Srednekolimsk | Tommot | Udačnii | Verhojansk | Vilüisk | ||
This article uses material from the Wikipedia Vepsän article Mirnii (Saha Tazovaldkund), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Südäimišt voib kacta CC BY-SA 4.0, ku ei ole ozutadud nimidä tošt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Vepsän (DUHOCTRUNGQUOC.VN) is an independent company and has no affiliation with Wiki Foundation.