Spriss

El Spris el nase a Venexia a metà '800 durante el dominio Austriaco; i miłitari austriaci no i gera boni de bevar el vin lisio (abituai come che i gera coła bira) quindi no esèndoghe bira i tagiava el vin co l'acqua (anca deso in Austria el Spritzer o G'spritzter el xe fato co vin e soda o vin e łimonada). Da qui nase el primo Spris composto da Acqua e Vin.

No ghe xe na compoxision compagna in tuti i posti pal spritz. Dixemo che de sołito se ghe missia rento vin bianco, acqua lisia o col gas, e, vendoghe voja, na coresion del Aperol o de Campari. Sul goto te ghe poi metare anca na decorassion, disemo na oliva col stecadente o un tocheto de naransa o altri mistieri compagni. De pì, dal momento che un sprisseto tira che l'altro xe uxansa compagnar el spriss co un piateo de patatine (o nei posti pì rafinai pissette e altri potaci) de modo tal che no el te vaga ała testa.

 

Metemo xò do ricete de esempio:

Prima compoxision:

• 1/3 Aperol (ma el podarìa anca èsare Campari o Bitter e a Venessia ìzoła Select e parfin el Cynar raramente)
• 1/3 Vin Bianco (mejo se proseco, cusì ghe xe łe bołe)
• 1/3 de acqua.

Seconda compoxision:

• 1/2 Aperol o Campari o Select
• 1/2 Proseco
• 1 oliva col stecadente
• 1/2 feta de naransa

Terza compoxision:

• 1/3 acqua col gas
• 1/3 Campari/Select/Aperol
• 1/3 Vin bianco
• 1 Oliva col stecadente
• 1/2 feta de naransa/limon (se xe col Campari o col Aperol,naransa, se xe col Select, limon)

A Padoa i toxi i beve el spris (che iori i ciama anca spriseto) inte łe piasse, cusì che ła vien fora tanta confuxion e anca tante barufe. Anca a Venexia i beve el spris, ma no lo beve soło i toxi, ma anca i veci, magari 'compagnà co na ombra de vin. El momento bon de torse el spris ne ła cità dei Doxi el xe trae sete de matìna e e diese de sera.

Ghe xe tante de quełl maniere de bévare el spris, ma łe dó pi importanti łe xe queła co l'Aperol e queła col Campari. E ghe xe tante de quełe diferense tra ste do version del spris che no podemo gnanca contarle qua: łe xe dó rełigion, dó fiłoxofie de vida. Prinsipalmente paro' i tosi i beve Spriss col Aperol parche' el ga un gusto meno amaro de quel col Campari, che xe sempre stà bevuo prinsipalmente dai veci quando el Aperol niancora no esistea.

El spris se beve anca in friul e in trentin e ghe xe dei bar parfin a Bologna che i xe boni de farteło, anca se no i ło fa mia ben come noialtri. Pi a ovest de Brescia no i sa mia cosa che el xe, opure i ło ciama inte n'altra maniera. En Sud-Tirol el spriss el vien fato cofà che i faxeva i austriaçi a Venesia, donche con vin bianco e aqua; el spriss fato con aperol, vin bianco e aqua se cata a Bolsàn col nom de veneziano (venesian). El "sdoganamento" nasionałe del spris xe stà fato da poco da na publicità de l'Aperol chea diseva: "Hai mai provato lo spritz?" ("Gheto gnancora provà el spris?").

• Sito padoan dedicà al spritz Archivià il 28 de febraro 2008 in Internet Archive.