رام کرشن

پیدائش اور بچپن

رام کرشن پرم ہنس 18 فروری 1836ء کو مغربی بنگال کے ضلع ہوگلی میں واقع کامار پکور گاؤں میں پید ہوئے۔ ان کا خاندان انتہائی غریب لیکن پاک باز برہمن تھا۔ اس وقت تک کامار پکور میں شہری زندگی کے آثار نہیں پہنچے تھے، وہاں چاول کے کھیت، کھجور کے اونچے اونچے درخت، کیلے، کچھ جھرنے اور دو شمشان گھاٹ تھے۔ ان کے والد کا نام کھودی رام چٹوپادھیائے اور والدہ کا نام چندرمنی دیوی تھا۔ رام کرشن کے پیروکاروں کے بقول، ان کی پیدائش سے پہلے ان کے والدین کے ساتھ کچھ مافوق الفطرت واقعات بھی پیش آئے تھے۔ گیا میں ان کے والد خودی رام نے ایک خواب دیکھا جس میں بھگوان گدادھر (وشنو کا ایک روپ) نے ان سے کہا کہ وہ ان کے بیٹے کی شکل میں جنم لیں گے۔ اسی طرح رام کرشن کی والدہ چندرمنی دیوی نے دیکھا کہ شیو مندر کی روشنی ان کے رحم میں داخل ہو رہی ہے۔

رام کرشن بارہ برس کی عمر تک اپنے گاؤں کے اسکول میں تعلیم حاصل کرتے رہے لیکن بعد میں انھوں نے یہ کہہ کر اسکول جانا ترک کر دیا کہ انھیں اس ذریعہ معاش بننے والی تعلیم سے دلچسپی نہیں ہے۔