Россини Ҷоаккино

Ҷоаккино Россини таҳсили мусиқиро дар литсеи Болонск гирифт ва дар сини 14-солагӣ узви Академияи филармонияи Болонск интихоб гардид. Ӯ фортепиано, скрипка, виолончелро хеле хуб менавохт, дар шаҳрҳои Италия бомуваффақият консерт намоиш медод ва де-ре нагузашта дар ин кораш обрӯманд гашт. Россини ҳамчун композитори операнавис машҳур гардид. Махсусан операҳои «Танкред» ва «Итолиёвидухтар дар Алжир», ки ҳарду с. 1813 офарида шуданд, ба ӯ шуҳратмандии зиёд оварданд. Операи ҳаҷвии «Сартароши севилӣ» дар таърихи санъати мусиқӣ, яке аз беҳтарин офаридаҳои Россини ба шумор меравад. Дар арафаи инқилоби Фаронса (1830), ӯ операи қаҳрамонӣ – патриотии «Вилгелм Телл» (аз Шиллер)-ро менависад, ки дар инкишофи жанри операи калони фаронсавӣ нақши муҳим бозидааст. Эҷодиёти операвии Россини бо мавзӯъҳои ҳаётӣ, хушоҳангии бардавом, коркарди бисёр хуб, маводи вокалӣ, моҳирона, ҷиллои устодонааш фарқ карда меистод. Ӯ санъати операи ҷаҳониро бой гардонида, ба инкишофи театри мусиқавии Итолиё ва Фаронса боис шуд. Осораш – аз 39 опера, 2 симфония барои оркестр, кантатаҳо, гимнҳо, ансамблҳои камеравӣ – созӣ, пиесаҳо барои фортепиано, барои овоз бо фортепиано, мусиқии нафасӣ ва ғ. иборат аст.