ಜಾನಕಿ ಆದಿ ನಾಗಪ್ಪನ್ (ಜಾನಕಿ ತೆವರ್) ಸುಭಾಸ್ ಚಂದ್ರ ಭೋಸೆರೆನ ಇಂಡಿಯನ್ ನ್ಯಾಶನಲ್ ಆರ್ಮಿ(INA)ದ ಪೊಂಜೊವು ಪಡೆ ಝಾನ್ಸಿ ರಾಣಿ ರೆಜಿಮೆಂಟ್ದ ರಡ್ಡನೇ ಕಮಾಂಡರ್ ಆದ್ ದೇಶಸೇವೆ ಮಲ್ತಿನಾರ್ ಬುಕ್ಕ ಮಲೇಶ್ಯನ್ ಇಂಡಿಯನ್ ಕಾಂಗ್ರೆಸ್ ಪಕ್ಸೊದ ಸ್ಥಾಪಕ ಸದಸ್ಯೆರ್.
ಉಂಬೆರ್ ಮಲೇಷ್ಯಾ ದೇಸೊದ ಸ್ವಾತಂತ್ರ್ಯ ಹೋರಾಟೊಡುಲಾ ಪಾಲ್ ದೆತೊಂದಿತ್ತೆರ್.
ಜಾನಕಿ ೨೫ನೇ ತಾರೀಕ್, ಫೆಬ್ರುವರಿ ೧೯೨೫ದಾನಿ ಮಲೇಷ್ಯಾ ತಮಿಳ್ ಕುಟುಮೊಡು ಪುಟ್ಟಿಯೆರ್. ಅಪಗದ ಕಾಲೊಡು ಏತೆ ಬಿರ್ದ್ದ ಕುಟುಮೊ ಆಂಡಲಾ ಪೊಂಜೊವುಲು ಕಟ್ಪಾಡ್ಡೆ ಇಪ್ಪೊಡಿತ್ಂಡ್, ಇಲ್ಲಡ್ದ್ ಪಿದಾಯಿ ಬರ್ರೆ ಇಜ್ಜಿತ್ಂಡ್. ಆಂಡಲಾ ಜಾನಕಿ ದೇಶಸೇವೆಗಾದ್ ಇಲ್ಲದ ಕಟ್ಪಾಡ್ ಮೀರ್ದ್ ಪಿದಯಿ ಬತ್ತೆರ್
೧೯೪೩ನೇ ಇಸವಿದ ಒಂಜಿ ದಿನ ಇಂಡಿಯನ್ ನ್ಯಾಶನಲ್ ಆರ್ಮಿಗ್ ಜನ ಸೇರಾವರ ಬುಕ್ಕ ಸ್ವಾತಂತ್ರ್ಯ ಹೋರಾಟೊಗು ಪಣವು ಸಂಪೊಲಿಪರಗಾದ್ ಸುಭಾಸ್ ಚಂದ್ರ ಭೋಸೆರ್ ಸಿಂಗಾಪುರಡ್ ಒಂಜಿ ಮಾಮಲ್ಲ ಸಭೆ ಮಲ್ತೆರ್. ಸುಮಾರ್ ೫೦,೦೦೦ ಜನ ಸೇರ್ದಿತ್ತೆರ್. ಆ ಸಭೆಟ್ ಭೋಸೆರೆನ ಭಾಷಣ ಕೇಂಡಿನ ೧೬ ವರ್ಸ ಪ್ರಾಯೊದ ಪೊಣ್ಣು ಜಾನಕಿ, ಭಾರತೊದ ಸ್ವಾತಂತ್ರೊಗಾದ್ ಪೊರ್ಂಬಾಟ ಮಲ್ಪರ ಭೋಸೆರೆನ ಇಂಡಿಯನ್ ನ್ಯಾಶನಲ್ ಆರ್ಮಿ ಸೇರರ ಮನಸ್ ಮಲ್ತೆರ್. ಸುರುಕು ಜಾನಕಿನ ಇಲ್ಲದಕುಲು ಬುಕ್ಕ ಆರೆನ ಅಮ್ಮೆರ್ ಜಾನಕಿನ ನಿರ್ಧಾರೊಗು ಎದುರು ಉಂತಿಂಡಲಾ ಕಡೆಕ್ ಒಪ್ಪಿಗೆ ಕೊರಿಯೆರ್. ಸಿಂಗಾಪುರದ ವಾಟರ್ಲೂ ಪೇಟೆಡ್ ಇತ್ತಿನ ಝಾನ್ಸಿ ರಾಣಿ ರೆಜಿಮೆಂಟ್ಡ್, ಕ್ಯಾಪ್ಟನ್ ಆದಿತ್ತಿನ ಲಕ್ಷ್ಮಿ ಸೆಹೆಗಲ್ ಉಂಬೆರೆನ ಅಡಿಟ್ ಜಾನಕಿ ಸೇರಿಯೆರ್.
ಸೈನ್ಯೊಡು ದಿನಾಲ ಕಠಿಣವಾಯಿನ ತರಬೇತಿ,ಶಸ್ತ್ರಾಸ್ತ್ರ ತರಬೇತಿಡ್ ಪಾಲ್ ಪಡೆವೊಡಿತ್ಂಡ್. ಬಿರ್ದ್ದ ಕುಟುಮೊಡು ಬುಳೆದಿತ್ತಿನ ಜಾನಕಿಗ್ ಸುರು ಸುರುಟು ಸೈನ್ಯೊಡು ಬೇಲೆ ಮಲ್ಪುನಗ ಕಷ್ಟ ಎನ್ನಿಂಡ್. ಆಂಡ, ಆರೆನ ಉತ್ಸಾಹ ಬುಕ್ಕ ದೇಸೊದ ಸ್ವಾತಂತ್ರ್ಯಗಾದ್ ಮಲ್ಪುನ ಸೇವೆ ಉಂದು ಎನ್ನಿದ್ ನನಲಾ ಎಚ್ಚ ಉಲ್ಲಸೊಡು ಜಾನಕಿ ತರಬೇತಿಡ್ ಪಾಲ್ ಪಡೆವರ ಸುರು ಮಲ್ತೆರ್.
೧೯೪೪ನೇ ಇಸವಿಡ್ ಜಾನಕಿ ನಾಗಪ್ಪನ್ ಝಾನ್ಸಿ ರಾಣಿ ರೆಜಿಮೆಂಟ್ದ ಕಮಾಂಡರ್ ಆಯೆರ್. ಉಂದೇ ಪೊರ್ತುಡು ಝಾನ್ಸಿ ರಾಣಿ ರೆಜಿಮೆಂಟ್ದ ಬರ್ಮಾ ತುಕಡಿ ಅಸ್ತಿತ್ವೊಗು ಬತ್ಂಡ್. ಬುಕ್ಕ, ಬರ್ಮಾ ದೇಸೊಡು ಸ್ವಾತಂತ್ರ್ಯ ಪೊರ್ಂಬಾಟೊಡು ದುಂಬು ಇತ್ಂಡ್.
೨ನೇ ವಿಶ್ವಯುದ್ಧ ಮುಗಿಬೊಕ್ಕ, ಜಾನಕಿ ಸಾರ್ವಜನಿಕ ಕಾರ್ಯಕರ್ತೆ ಆದ್ ಬೇಲೆ ಬೆಂದೆರ್. ಮಲೇಷ್ಯಾಡ್ ಇಪ್ಪುನ ಭಾರತೀಯ ನಾಗರಿಕೆರೆಗ್ ರಾಜಕೀಯ ಬೆರಿಸಾಯ ಬೋಡು ಪಂಡ್ದ್ ಮಲೇಷ್ಯಾದ ರಾಜಕಾರಿಣಿ ಜಾನ್ ಥೀವಿನೊಟ್ಟುಗು ಸೇರ್ದ್ ೪ನೇ ತಾರೀಕ್ ಆಗಷ್ಟ್ ೧೯೪೬ನೇ ಇಸವಿಡ್ ಮಲೇಶ್ಯನ್ ಇಂಡಿಯನ್ ಕಾಂಗ್ರೆಸ್ ಪಕ್ಸೊನ್ ಸ್ತಾಪಿಸಾವರ ಸಾಯ ಮಲ್ತೆರ್. ಬುಕ್ಕ ಮಲೇಷ್ಯಾ ಸಂಸತ್ದ ಮಿತ್ತ ಇಲ್(ಮೇಲ್ಮನೆ)ದ ಸದಸ್ಯೆ ಆಯೆರ್
ನಮ ದೇಸೊದ ೪ನೇ ಮಾಮಲ್ಲ ಬಿರ್ದ್ ಆಯಿನ ಪದ್ಮಶ್ರೀ ಪುರಸ್ಕಾರೊನು ಜಾನಕಿ ನಾಗಪ್ಪೆರೆಗ್ ಭಾರತ ಸರ್ಕಾರ ೨೦೦೦ನೇ ಇಸವಿಡ್ ಪ್ರದಾನ ಮಲ್ತ್ಂಡ್.
೯ನೇ ಮೇ ೨೦೧೪ನೇ ಇಸವಿಡ್ ನ್ಯುಮೋನಿಯ ಸೀಕ್ಡ್ದಾವರ ಜಾನಕಿ ನಾಗಪ್ಪನ್ ತೀರಿಯೆರ್.
This article uses material from the Wikipedia ತುಳು article ಜಾನಕಿ ಆದಿ ನಾಗಪ್ಪನ್, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.