ಗೌರಿ ಪರ್ಬೊ Gowri Habba ಕನ್ನಡ ನಾಡ್ದ ಮಲ್ಲ ಪರ್ಬೊ.
ಭಾದ್ರಪದೊ ತದಿಗೆದಾನಿ ಗೌರಿ ಪರ್ಬೊ ಮಲ್ಪುವೆರ್.ಗೌರಿ ಗಣೇಶನ ಪರ್ಬೊ ಇಸೇಸೊ ಆದ್ ದಕ್ಷಿಣ ಕರ್ನಾಟಕ, ಆಂಧ್ರಪ್ರದೇಸೊ ಬುಕ್ಕೊ ತಮಿಳುನಾಡ್ಡ್ ಆಚರಿಸವುನಂಚಿನ ಮಲ್ಲ ಪರ್ಬೊ. ಉತ್ತರ ಭಾರತೊಡು ಇಂದೆನ್ ಹರತಲಿಕಾ ಪಂಡ್ದ್ ಲೆಪ್ಪುವೆರ್. ಗೌರಿ ಪರ್ಬೊನು ಗಣೇಶ ಚತುರ್ಥಿದ ದುಂಬುನಾನಿ ಆಚಾರಿಸವೆರ್. ಮುಲ್ಪ ಗೌರಿ ಪಂಡ ಗಣೇಶ ಬುಕ್ಕೊ ಸುಬ್ರಹ್ಮಣ್ಯ(ಕಾರ್ತಿಕೇಯ) ದೇವರೆ ಅಪ್ಪೆ ಪಾರ್ವತಿ.
ಗೌರಿ ಪರ್ಬೊದಾನಿ ಗೌರಿ ದೇವೆರೆನ್ ದಿಂಜ ಭಕ್ತಿಡ್ ಪೂಜೆ ಮಲ್ಪುವೆರ್. ಗೌರಿ ದೇವೆರ್ ಶಕ್ತಿ ದೇವತೆ ಆಯಿನೆಡ್ದಾವರ ಆದಿ ಶಕ್ತಿನ ಅವತಾರೊಂದು ನಂಬುವೆರ್. ಗೌರಿ ದೇವರೆನ್ ನಂಬಿಕೆ ಬುಕ್ಕೊ ಭಕ್ತಿಡ್ ಪೂಜೆ ಮಲ್ಪುನ ಭಕ್ತೆರೆಗ್ ಆಳ್ ದೈರ್ಯೊ ಬುಕ್ಕೊ ಮಸ್ತ್ ಶಕ್ತಿನ್ ಕೊರ್ಪಲ್ಂದ್ ನಂಬಿಕೆ ಉಂಡು. ಗೌರಿ ಪರ್ಬೊದಾನಿ ಗೌರಿ ದೇವೆರೆ ಆರ್ಶೀವಾದೊ ಪಡೆಯರ ಸ್ವರ್ಣಗೌರಿ ವ್ರತೊನು ಆಚರಿಸವೆರ್.
ಗಣೇಶ ಮೂರ್ತಿದ ಸ್ತಾಪನೆ ಬುಕ್ಕ ಪೂಜೆದ ಕ್ರಮ.
ಗೌರಿ ಪರ್ಬೊ ಪಂಡ ಪೊಂಜೋವುನಕ್ಲೆ ಪರ್ಬೊಂದೆ ಪುದರಾತ್ಂಡ್.ಉಂದು ಮುತ್ತೈದೆ ಪೊಂಜೊವುನಕ್ಲೆಗ್ ಸೌಬಾಗ್ಯೊ ಕೊರ್ಪುನ ಪರ್ಬೊ.
ಸ್ವರ್ಣಗೌರಿ ವ್ರತೊಡು ಕೊರ್ಪುನ ಬಾಗಿನದ ತಯಾರಿ ಮಲ್ಪುನನೆ ಪ್ರಾಮುಖ್ಯವಾಯಿನ ಕೆಲಸ.ಅವೆನ್ ಕ್ರಮ ಪ್ರಕಾರ ತಯಾರಿ ಮಲ್ಪೊಡಾಪುಂಡು. ಸ್ವರ್ಣಗೌರಿ ಪರ್ಬದ ಬಾಗಿನೊಗು ಕೊರ್ಪುನ ಪೊಸ ಮೊರ(ಕಿನ್ಯ ತಡ್ಪೆ)ಕುಲೆನ್ ಪರ್ಬೊದ ದುಂಬುದ ಅಮವಾಸ್ಯೆಗ್ ದುಂಬೆ ದೆಕ್ಕ್ದ್ ಲುಂಗಾದ್ ಮೊರಕ್ಲೆಗ್ ಮಂಜಲ್ (ಅರಿಶಿನ)ಪೂಜೊಡು. ಮಲ್ಲಕುಲೆಗ್ ರಡ್ಡ್ ಜೊತೆ ಮಲ್ಲ ಮೊರ, ಎಲ್ಯಕುಲೆಗ್ ಒಂಜಿ ಜೊತೆ ಎಲ್ಯಮೊರ ಅವೆಕ್ ಮಧ್ಯೊಡು ಕುಂಕುಮ ದೀದ್ ತಿರ್ತ್ ಚಂದ್ರ(ಕೇಸರಿ ಬಣ್ಣ) ಬೊಕ್ಕ ಮಯಿತ ಚುಕ್ಕೆಲೆನ್ ದೀವೊಡು್. ಐನ್ ಬಚ್ಚಿರೆ ಮಂಜಲ್ ನೂಲುಗು ಮಂಜಲ್ ತುಂಡು ಕಟ್ಟ್ದ್ ಮಿತ್ತ್ ಮುಚ್ಚುನ ಮೊರಕ್ಕ್ ಕಟ್ಟೊಡು.ಬಾಗಿನೊಡು ಬೇತೆಬೇತೆ ವಿದೊತ ವಸ್ತುಲಾಯಿನ ಮಂಜಲ್, ಕುಂಕುಮೊ, ಕಪ್ಪು ಕಾಜಿ, ಕಪ್ಪು ಮಣಿಕುಲು, ಬಾರ್ಪಾನೆ, ಎಲ್ಯ ಕನ್ನಡಿ, ಸೀರೆ ,ರವಿಕೆ ತಾರಾಯಿ, ದಾನ್ಯೊಲು, ಅರಿ, ಗೋದಿ, ಬುಕ್ಕೊ ಬೆಲ್ಲೊ ಇಪ್ಪುಂಡು. 16 ಮೊರಟ್ ಬಾಗಿನೊನು ತಯಾರಿ ಮಲ್ತ್ದ್ ಗೌರಿನ ಎದುರು ಮಾತ ಬಾಗಿನೊಲೆನ್ ದೀದ್ ಅವೆಡ್ದ್ ಬೊಕ್ಕ 15 ಮುತ್ತೈದೆಯೆರೆಗ್ ಬಾಗಿನೊಲೆನ್ ಕೊರ್ಪೆರ್. ಒಂಜಿ ಬಾಗಿನೊನು ಇಲ್ಲಡ್ ದೀವೊನುವೆರ್. ಗೌರಿ ಪೂಜೆಡ್ದ್ ಬೊಕ್ಕ ಮುತ್ತೈದೆಯೆರೆನ್ ಮುಡಾಯಿ ಅತ್ತ್ಂಡ ಪಡ್ಡೆಯಿ ಮೈಕ್ ಮೋನೆ ಪಾಡ್ದ್ ಕುಲ್ಲಾದ್ ಅಕುಲೆನ ಅಂಗೈ, ಕಾರ್ಲೆಗ್ ಕುರ್ದಿ ನೀರ್ ತಲಿತ್ದ್, ಕುಂಕುಮ ಪೂ ಕೊರ್ದು ಬಾಗಿನೊನು ಮುಚ್ಚಿದ್ ಒಂಜಿ ಉದ್ದರಣೆ ನೀರ್, ಅಕ್ಷತೆ ಪಾಡ್ದ್ ನಮ್ಮ ಸೆರಗ್ನ್ ಅವೆತ ಮಿತ್ತ್ ದೀದ್ ಕೊರೊಡು .ಸೀರೆದ ಸೆರಗ್ಡ್ ಮಹಾಲಕ್ಷ್ಮೀ ಸೌಭಾಗ್ಯ ರೂಪೊಡುಪ್ಪುನೆಡ್ದಾತ್ರ ಸೆರಗ್ ಪತ್ತ್ದ್ ಬಾಗಿನ ಕೊರೊಡು .ಬಾಗಿನ ದೆತೊನೊನ ಮುತ್ತೈದೆಲ ತನ್ನ ಸೀರೆದ ಸೆರಗ್ನ್ ಪುಗೆಲ್ದ ಮಿತ್ತ್ಡ್ದ್ ಎದುರು ಕೊನತ್ದ್ ರಡ್ಡ್ ಕೈ ಪತ್ತ್ದ್ ಬಾಗಿನೊನು ದೆತೊಂದು ಅಡ್ಡಡ್ಡ ಉದ್ದುದ್ದೊ ತೂಂಕೊಡು.ಮೊರದಬಾಗಿನೊಡು ನಾರಾಯಣನ ಅಂಶ ಉಪ್ಪುಂಡು ಪನ್ಪಿ ನಂಬಿಕೆ. ಮೊರ(ಕಿನ್ಯತಡ್ಪೆ) ಪನ್ಪಿ ನಾರಾಯಣೆ ಬೊಕ್ಕ ಉಲಯಿ ಉಪ್ಪುನ ಲಕ್ಷ್ಮಿನ ತರ ಜೊತೆಟ್, ದಂಪತಿಲು ಲಕ್ಷ್ಮೀ-ನಾರಾಯಣೆರೆ ಲೆಕ್ಕೊ ಉಪ್ಪಡ್ ಪನ್ಪಿ ಕಾರಣೊಗು,ಅಂಚನೆ ಸುಮಂಗಲಿತನ ಯಾಪಲ ಒರಿಯಡ್ ಪಂದ್ ೧೬ ಸುಮಂಗಲೀ ದೇವತೆಲೆನ್ ಸಾಕ್ಷಿಯಾದ್, ಬಾಗಿನ ಕೊರ್ಪೆರ್.
ಮುತ್ತ್ತೈದೆ ದೇವತೆಲು ೧೬(ಷೋಡಶಲಕ್ಷ್ಮೀನಕುಲು) .
ಪಾರ್ವತೀದೇವಿ ಆರೆನ ಅಪ್ಪೆ ಇಲ್ಲಗ್ ಪೋಪುನ ಸಂಬ್ರಮೊ ಈ ಪರ್ಬೊಡು ಸಾಂಕೇತಿಕವಾದ್ ಬರ್ಪುಂಡು.
This article uses material from the Wikipedia ತುಳು article ಗೌರಿ ಪರ್ಬೊ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.