Hokusai

Moai">10. Moai 1849) waas n Japanisken Holtsnitkunstler fon Ukiyo-e, ju traditionelle Japaniske Kunst fon dän Holtsnit. Hokusai häd binne aal Genren fon Ukiyo-e oarbaided, man ap berüümdeste wuud hie truch sien Londskupsoubieldengen. Tou sien bekoandste Wierke heere do Säksuntrütich Ansichte fon dän Bierich Fuji un do Hokusai Manga.

Hokusai wuud gebooren in Edo (däälich Tokio) in dät njuugende Mound fon dät tjaande Jier fon ju Horeki-Periode. Uur sien Oolden is niks bekoand. As hie tjo Jiere oold waas, wuud hie as Bäiden annuumen fon Nakajim Ise, die der Speegele moakede foar dät Hoaf fon dän Shogun. Ap sien achttienste, as hie al wät Ärfoarenge hied mät Holtsnitdruk, fäng hie oun tou oarbaidjen in ju Wierksteede fon dän Ukiyo-e-Kunstler Katsugawa Shunso, die der sik uutlaid hiede ap Bielden fon Tjooterspielere. Deeruum dät hie artistisk n uur Meemenge hiede as sin Leerder, moaste hie 1785 ju Wierksteede ferläite.

Hierätter koom ne Tied fon Äärmoud foar Hokusai. Man hie studierde daach fääre uum sik artistisk tou ferbeeterjen.

Hokusai moakede Bielden foar Bouke un Holtsnitte mäd as wichtichste Subjekte dät Deegslieuwend in Japan un do japaniske Traditione un Soagen.

 

Sien bekoandste Wierke moakede hie ätter sien säkstichste Jier. Do Fugaku Sanjûrokkei, ofwäil do Säksuntrütich Ansichte fon dän Bierich Fuji moakede hie 1831, ätterdät hie truch sin Bäidenswänt in läipe finanzielle Probleme keemen waas. Hie ferwoande in disse Wierke insteede fon dät fon oalershäär bekoande plontenoardige Indigoblau oafte dät näiere Prüüskblau, n chemisken Faawestof die der in Japan eerste siet 1829 bekoand waas.

Ju groote Wooge

 

Sien bekoandste Oarbaid Ju groote Wooge bie Kanagawa, wier eenige litje Boote ap n See fon Hïuünenwoogen fersäike tou foaren. Foarallen ju grootste Wooge is imponierjend un häd wät häär n Monster mäd Klauen. Disse Wooge stoalt ju Kraft fon de Natuur deer un ieuenso ju Kraft fon do Roiere in do Boote. Uurigens waas et in ju Tied fon Kanagawa noch nit bewiesd, dät et sukke Woogen wuddelk rakt, oawers apstuuns is ju Wietensup deer wäil fon uurtjuugd. Sukke Woogen sunt uk woarnumen in dän Bucht fon Tokio, wier Hokusai dät Geböären ap ju Bielde woarskienelk situierde.

In ju Bäätergruunde stoant die Bierich Fuji, oawers Hokusai häd dän woarskienelk uk in ju foarnste Wooge oubielded, deeruum dät ju Wooge juust diesälge Uumfang häd as ju Fuji fon ne uur Siede. Ju groote Wooge häd ätters fuul Kunstlere inspirierd, oawers uk fuul Teeknere fon politiske (Spot)bielden.

Hokusai stoorf dän 10 Moai 1849. Hie liet 30.000 Wierke ätter. Sien lääste Woude skuulen weesen hääbe:"Noch tjoon Jier, of bloot fieuw, un ik waas n grooten Kunstler wuuden".

Hokusai is ne Inspirationswälle weesen foar uuner uur dän japaniske Kunstler Ando Hiroshige, man as hierbuppe mälded uk foar fuul Kunstlere uur de ganse Waareld.

  Commons: Katsushika Hokusai – Sammelenge fon Bielden, Filme un Heerdoatäie

• Hokusai-Museum in Obuse, Japan
• Museum of Fine Arts, Boston - Database mäd uum 760 Oubieldengen fon Wierke fon Hokusai
• Dynalias - Siede mäd bolde tjoduusend hoochwäidige Oubieldengen fon Wierke fon Hokusai
• The Metropolitan Museum of Art's (New York) Portoal uur Ju groote Wooge bie Kanagawa
• Hill-Stead Museum, Farmington Connecticut - Siede uur Katsushika Hokusai