होकुसाइ

कात्सुशिका होकुसाइ(जापानी भासय् 葛飾北斎) इदो कालया छम्ह जापानमि कलाकार, उकियो-ए (ukiyo-e) किपामि व प्रिन्तमेकर ख। वय्‌कःया ईलय् वय्‌कः जापानया चिनिया किपाया विज्ञ नं ख। इदो (वर्तमान टोक्यो)य् बुयादीम्ह होकुसाइयात वय्‌कःया सिंत्यालय् ध्वायातःगु (woodblock print) फुजि च्वकाया सुइखुगु लू(Thirty-six Views of Mount Fuji) किपाझ्वःया निंतिं म्हसीकिगु या। थ्व झ्वलय् वय्‌कःया सिक्क नांजाःगु कानागावाया तःधं ज्वारभाट (The Great Wave off Kanagawa)नं ला। होकुसाइं फुजि च्वकाया सुइखुगु लू जापानय् अबिलय् प्रवर्धन जूगु आन्तरिक पर्यटनया हुनिइ थःगु फुजि च्वापुगुं नापया व्यक्तिगत आकर्षणया लिच्वःया रुपय् दयेकादिल। थ्व किपाझ्वलय् दूगु तःधं ज्वारभाट (The Great Wave) व यचुगु लखय् फुजि (Fuji in Clear Weather) सिक्क नां जाः। इतिहासविद रिचार्द लेनजुं थ्व विषयय् थथे धयादी “Indeed, if there is one work that made Hokusai's name, both in Japan and abroad, it must be this monumental print-series...” होकुसाइया मेमेगु ज्या नं सिक्क हे महत्त्वपूर्ण जुसां थ्व ज्यां वय्‌कःयात अन्तराष्ट्रिय ख्याति बिल।