ᱥᱩᱵᱷᱟᱥ ᱪᱚᱸᱫᱽᱨᱚ ᱵᱳᱥ
ᱫᱤᱥᱚᱢ ᱟᱨ ᱡᱟ.ᱛᱤ ᱞᱟ.ᱜᱤᱫ ᱡᱟᱦᱟᱸᱭ ᱵᱤᱨᱵᱷᱟᱱᱴᱟ ᱠᱚ ᱟᱠᱚᱣᱟᱜ ᱡᱤᱣᱤᱵᱟ.ᱛᱤ ᱡᱩᱸᱰᱩᱡ ᱠᱟᱛᱮ ᱫᱤᱥᱚᱢ ᱠᱚ ᱢᱟᱨᱥᱟᱞ ᱦᱚᱴᱚ ᱟᱠᱟᱜᱼᱟ, ᱩᱱᱠᱩ ᱵᱷᱤᱛᱨᱤ ᱠᱷᱚᱱ ᱦᱚᱸ ᱢᱤᱫ ᱦᱚᱲ ᱾ ᱥᱤᱵᱟᱡᱤ ᱟᱨ ᱨᱟᱬᱟᱯᱨᱚᱛᱟᱯ ᱛᱤᱠᱤᱱ ᱞᱮᱠᱟ ᱜᱮ ᱱᱩᱭ ᱦᱚᱸ ᱢᱤᱫ ᱵᱷᱟᱨᱚᱛ ᱟᱭᱳᱭᱤᱡ ᱵᱤᱨ ᱵᱷᱟᱱᱴᱟ ᱦᱚᱯᱚᱱ ᱾ ᱥᱩᱵᱷᱟᱥ ᱞᱮᱠᱟᱱᱤᱡ ᱢᱤᱫ ᱥᱟᱱᱟᱢ ᱜᱩᱱ ᱛᱮ ᱥᱚᱝ ᱯᱮᱨᱮᱡ ᱦᱚᱯᱚᱱ ᱧᱟᱢ ᱠᱟᱛᱮ ᱵᱷᱟᱨᱚᱛ ᱨᱮᱭᱟᱜ ᱚᱛ ᱦᱟᱥᱟ ᱦᱚᱸ ᱠᱚᱯᱟᱲ ᱟᱱ ᱮ ᱢᱚᱱᱮᱜᱼᱟ ᱾ ᱩᱱᱤ ᱢᱟᱨᱟᱝ ᱵᱤᱨ ᱠᱚᱣᱟᱜ ᱡᱤᱭᱚᱱ ᱨᱮᱭᱟᱜ ᱡᱤᱭᱟ.ᱛ ᱠᱟ.ᱦᱱᱤ ᱞᱮᱠᱟᱛᱮ ᱥᱤᱧᱚᱛ ᱱᱟᱜᱟᱢ ᱨᱮ ᱡᱟᱭᱡᱩᱜᱽ ᱫᱤᱭᱟ.ᱣᱲᱟ ᱵᱟ.ᱛᱤ ᱞᱮᱠᱟ ᱡᱩᱞ ᱟᱠᱟᱭ ᱛᱟᱦᱮᱸᱱᱟ ᱾
᱑᱘᱙᱗ ᱥᱟᱞᱮ ᱨᱮᱭᱟᱜ ᱡᱟᱱᱩᱣᱟᱨᱤ ᱒᱓ ᱢᱟᱺᱦᱤᱛ ᱦᱤᱞᱚᱜ ᱠᱚᱴᱚᱠ ᱨᱮᱭᱟᱜ ᱢᱤᱫ ᱩᱰᱤᱭᱟ. ᱵᱟᱡᱟᱨ ᱨᱮ ᱩᱱᱤ ᱫᱚᱭ ᱡᱟᱱᱟᱢ ᱞᱮᱱᱟ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟ ᱡᱟᱱᱠᱤᱱᱟᱛᱷ ᱵᱳᱥ ᱠᱚᱴᱚᱠ ᱨᱤᱱᱤᱡ ᱢᱤᱫ ᱧᱩᱛᱩᱢᱟᱱ ᱩᱠᱤᱞ ᱮ ᱛᱟᱦᱮᱸ ᱠᱟᱱᱟ ᱾ ᱟᱡᱤᱡ ᱡᱟᱱᱟᱢ ᱟᱭᱳᱣᱟᱜ ᱧᱩᱛᱩᱢ ᱫᱚ ᱛᱟᱦᱮᱸ ᱠᱟᱱᱟ ᱯᱨᱚᱵᱷᱟᱵᱚᱛᱤ ᱫᱮᱵᱤ ᱾
ᱟᱡᱟᱜ ᱜᱤᱫᱽᱨᱟ. ᱚᱠᱛᱚ ᱯᱩᱭᱞᱩ ᱥᱮᱪᱮᱫ ᱫᱚ ᱟᱸᱜᱽᱞᱳ ᱤᱱᱰᱤᱭᱟᱱ ᱟᱥᱲᱟ ᱨᱮ ᱮᱛᱚᱦᱚᱵ ᱞᱮᱱᱟ ᱾ ᱑᱙᱑᱓ ᱥᱟᱞᱮᱨᱮ ᱩᱱᱤ ᱛᱟᱱᱟᱞᱟ/ ᱢᱟᱴᱨᱤᱠ ᱵᱤᱱᱤᱰ ᱨᱮ ᱫᱚᱥᱟᱨ ᱴᱷᱟᱶ ᱟᱢᱮᱴ ᱠᱟᱛᱮᱭ ᱨᱟᱠᱟᱵ ᱮᱱᱟ ᱾ ᱱᱚᱶᱟ ᱛᱟᱭᱚᱢ ᱩᱱᱤ ᱠᱚᱞᱠᱟᱛᱟ ᱪᱟᱞᱟᱣ ᱠᱟᱛᱮ ᱯᱨᱮᱥᱤᱰᱮᱱᱥᱤ ᱵᱤᱨᱫᱟ.ᱜᱟᱲ ᱨᱮ ᱧᱩᱛᱩᱢ ᱮ ᱚᱞ ᱦᱚᱪᱚ ᱠᱮᱫ ᱛᱟᱭᱟ ᱾ ᱵᱟᱵᱟᱦᱟᱜ ᱩᱱᱩᱫᱩᱜ ᱞᱮᱠᱟᱛᱮ ᱩᱱᱤ ᱤᱸᱰᱤᱭᱟᱱ ᱥᱤᱵᱷᱤᱞ ᱥᱚᱨᱵᱤᱥ ᱨᱮ ᱡᱤᱛᱠᱟ.ᱨᱚᱜ ᱞᱟ.ᱜᱤᱫ ᱞᱚᱱᱰᱚᱱ ᱮ ᱪᱟᱞᱟᱣ ᱮᱱᱟ ᱾ ᱯᱟᱲᱦᱟᱣ ᱨᱮ ᱜᱟᱺᱦᱤᱨ ᱢᱚᱱᱮ ᱟᱞᱟᱭ ᱠᱟᱛᱮ ᱛᱩᱨᱩᱭ ᱪᱟᱸᱫᱚ ᱛᱟᱭᱚᱢ ᱩᱱᱤ ᱯᱩᱱᱟᱜ ᱴᱷᱟᱶ ᱟᱢᱮᱴ ᱠᱟᱛᱮ ᱟᱭᱤ. ᱥᱤ. ᱮᱥ. ᱵᱤᱱᱤᱰ ᱮ ᱯᱟᱥ ᱠᱮᱜᱼᱟ ᱾
ᱤᱸᱜᱽᱞᱚᱸᱰ ᱠᱷᱚᱱ ᱨᱩᱣᱟ.ᱲ ᱠᱟᱛᱮ ᱩᱱᱤ ᱜᱟᱱᱫᱷᱤᱡᱤ ᱭᱟᱜ ᱧᱮᱞ ᱡᱚᱛᱚᱱ ᱨᱮ ᱪᱟ.ᱞᱩᱜ ᱠᱟᱱ ᱵᱟᱝᱼᱥᱚᱦᱚᱫ ᱢᱤᱪᱷᱤᱞ ᱨᱮᱭ ᱥᱮᱞᱮᱫ ᱮᱱᱟ ᱾ ᱱᱤᱭᱟ. ᱛᱟᱭᱚᱢ ᱥᱩᱵᱷᱟᱥ ᱟ.ᱛᱩᱼᱟ.ᱛᱩ ᱫᱟᱬᱟ ᱠᱟᱛᱮ ᱪᱮᱛᱮᱫᱤᱭᱟ., ᱢᱟᱪᱮᱛ, ᱪᱟ.ᱥᱤ, ᱩᱠᱤᱞ ᱟᱨ ᱥᱚᱨᱠᱟᱨ ᱠᱟ.ᱢᱤ ᱦᱚᱲ ᱠᱚ ᱯᱷᱩᱞᱜᱟ.ᱞ ᱢᱤᱪᱷᱤᱞ ᱨᱮ ᱥᱮᱞᱮᱫᱚᱜ ᱞᱟ.ᱜᱤᱫ ᱮ ᱫᱩᱼᱫᱮᱞᱟ ᱟᱫ ᱠᱚᱣᱟ ᱾ ᱑᱙᱒᱓ ᱥᱟᱞᱮᱨᱮ ᱪᱤᱛᱚᱨᱚᱸᱡᱚᱱ ᱟᱜ ᱟᱺᱜᱤᱵᱷᱟᱨ ᱨᱮ ᱥᱣᱚᱨᱟᱡᱣᱚ ᱯᱟᱨᱴᱤ ᱛᱷᱟᱯᱚᱱ ᱮᱱᱟ ᱾ ᱱᱚᱶᱟ ᱯᱟᱨᱴᱤ ᱨᱮᱭᱟᱜ ᱯᱩᱭᱞᱩ ᱟᱺᱜᱤᱵᱷᱟᱨ ᱫᱚ ᱥᱩᱵᱷᱟᱥ ᱮ ᱦᱟᱛᱟᱣ ᱠᱮᱜᱼᱟ ᱾
ᱥᱩᱵᱷᱟᱥ ᱫᱚ ᱢᱤᱫ ᱵᱤᱨ ᱠᱚᱲᱟ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾ ᱵᱟᱝ ᱥᱚᱦᱚᱫ ᱢᱤᱪᱷᱤᱞ ᱨᱮ ᱥᱮᱞᱮᱫ ᱠᱟᱛᱮ ᱩᱱᱤ ᱟ.ᱰᱤ ᱫᱷᱟᱣ ᱵᱤᱲᱤ ᱨᱮᱦᱚᱸᱭ ᱛᱟᱦᱮᱸ ᱟᱠᱟᱱᱟ ᱾ ᱤᱸᱜᱽᱨᱟ.ᱡᱽ ᱠᱚ ᱱᱚᱶᱟ ᱫᱤᱥᱚᱢ ᱠᱷᱚᱱ ᱞᱟᱜᱟ ᱰᱤᱜᱽᱞᱟ.ᱣ ᱞᱟ.ᱜᱤᱫ ᱠᱚ ᱛᱮᱠᱷᱟᱱ ᱩᱱᱠᱩ ᱥᱟᱶ ᱫᱚ ᱢᱟᱭᱟᱢ ᱞᱤᱸᱜᱤᱱ ᱦᱩᱞ ᱞᱟ.ᱠᱛᱤᱜ ᱠᱟᱱᱟ, ᱱᱚᱶᱟ ᱩᱱᱤ ᱚᱱᱛᱚᱨ ᱨᱮ ᱦᱩᱫᱤᱥ ᱦᱮᱡ ᱟᱫᱮᱭᱟ ᱾ ᱜᱟᱸᱫᱷᱤᱡᱤ ᱟᱨ ᱮᱴᱟᱜ ᱠᱩᱜ ᱥᱟᱶ ᱦᱚᱸ ᱜᱟᱞᱚᱪᱜᱚᱴᱟ ᱠᱟᱛᱮ ᱥᱮᱱᱟ ᱠᱚ ᱤᱫᱤ ᱠᱟᱛᱮ ᱢᱤᱫ ᱯᱟ.ᱭᱠᱚ ᱠᱚᱣᱟᱜ ᱜᱟᱫᱮᱞ ᱮ ᱵᱮᱱᱟᱣ ᱠᱮᱜᱼᱟ ᱾ ᱱᱚᱶᱟ ᱨᱮᱭᱟᱜ ᱟᱺᱜᱤᱵᱷᱟᱨ ᱫᱚ ᱟᱡ ᱜᱮᱭ ᱦᱟᱛᱟᱣ ᱠᱮᱜᱼᱟ ᱾ ᱟᱡᱟᱜ ᱟᱞᱟᱭ, ᱟᱴᱠᱟᱣ ᱛᱟᱦᱮᱸᱱ, ᱟᱨ ᱵᱤᱱ ᱞᱟᱸᱜᱟ ᱠᱟ.ᱢᱤ ᱩᱱᱤ ᱡᱟ.ᱛᱤ ᱢᱮᱞᱟᱝᱠᱤ ᱨᱮ ᱢᱤᱫ ᱵᱤᱨ ᱵᱷᱟᱱᱴᱟ ᱞᱮᱠᱟ ᱛᱮᱭ ᱛᱷᱟᱯᱚᱱ ᱠᱮᱫᱮᱭᱟ ᱾ ᱟ.ᱰᱤ ᱴᱷᱟᱶᱨᱮ ᱥᱚᱵᱷᱟ ᱥᱮᱱᱮᱞᱮᱫ ᱫᱚᱦᱚ ᱠᱟᱛᱮ ᱤᱸᱜᱽᱨᱮᱡᱽ ᱥᱚᱨᱠᱟᱨ ᱵᱤᱨᱩᱫᱷᱨᱮ ᱥᱮᱸᱜᱮᱞ ᱧᱩᱨᱩᱜ ᱠᱟᱱ ᱞᱮᱠᱟ ᱡᱩᱞᱩᱜ ᱟᱲᱟᱝ ᱛᱮ ᱜᱟᱞᱚᱪ ᱮ ᱮᱢ ᱠᱮᱜᱼᱟ ᱾ ᱱᱚᱶᱟ ᱧᱮᱞᱛᱮ ᱤᱸᱜᱽᱨᱮᱡᱽ ᱥᱚᱨᱠᱟᱨ ᱩᱱᱤ ᱦᱟ.ᱲᱤ ᱠᱟᱛᱮ ᱡᱤᱦᱚᱞ ᱨᱮᱭ ᱥᱟᱸᱵᱟᱣ ᱠᱟᱫᱮᱭᱟ ᱾ ᱞᱮᱛᱟᱲᱼᱞᱮᱛᱟᱲ ᱟᱡᱟᱜ ᱡᱤᱦᱚᱞ ᱦᱩᱭᱩᱜ ᱠᱟᱱ ᱠᱷᱟ.ᱛᱤᱨ ᱟᱡᱟᱜ ᱦᱚᱲᱢᱚ ᱨᱮ ᱵᱟ.ᱲᱤᱡ ᱚᱨᱥᱚᱝ ᱯᱟᱲᱟᱣ ᱮᱱᱟ ᱾ ᱚᱱᱟᱛᱮ ᱛᱤᱠᱪᱷᱟ. ᱦᱚᱪᱚᱜ ᱞᱟ.ᱜᱤᱫ ᱥᱣᱤᱡᱚᱨᱞᱟᱸᱰ ᱮ ᱪᱟᱞᱟᱣ ᱮᱱᱟ ᱾ ᱚᱸᱰᱮ ᱛᱟᱦᱮᱸᱱ ᱚᱠᱛᱚᱨᱮ ᱩᱱᱤ ᱱᱟᱯᱟᱭ ᱠᱟᱛᱮ ᱫᱤ ᱤᱱᱰᱤᱭᱟᱱ ᱥᱴᱨᱚᱜᱚᱞ ᱯᱚᱛᱚᱵ ᱮ ᱚᱞᱼᱛᱚᱞ ᱞᱮᱜᱼᱟ ᱾ ᱑᱙᱓᱗ ᱥᱟᱞᱮᱨᱮ ᱩᱱᱤ ᱵᱷᱟᱨᱚᱛ ᱮ ᱨᱩᱣᱟ.ᱲ ᱦᱮᱡ ᱮᱱᱟ ᱾ ᱤᱱᱟ.ᱜ ᱛᱮᱫᱚ ᱩᱱᱤ ᱵᱷᱟᱨᱚᱛ ᱨᱮ ᱧᱩᱛᱩᱢᱟᱱ ᱱᱮᱛᱟ ᱞᱮᱠᱟᱛᱮ ᱩᱯᱨᱩᱢ ᱮ ᱧᱟᱢ ᱦᱩᱭ ᱠᱮᱜᱼᱟ ᱾ ᱑᱙᱓᱘ ᱥᱟᱞᱮᱨᱮ ᱦᱚᱠᱯᱩᱨ ᱨᱮ ᱜᱚᱴᱷᱚᱱ ᱞᱮᱱ ᱠᱚᱸᱜᱨᱮᱥ ᱜᱟᱫᱮᱞ ᱨᱮ ᱟ.ᱜᱩᱣᱟ.ᱱ ᱞᱮᱠᱟᱛᱮᱭ ᱵᱟᱪᱷᱚᱱ ᱮᱱᱟ ᱾ ᱛᱨᱤᱯᱩᱨᱟ ᱨᱮ ᱑᱙᱓᱙ ᱥᱟᱞᱮᱨᱮ ᱫᱚᱥᱟᱨ ᱫᱷᱟᱣ ᱞᱟ.ᱜᱤᱫ ᱥᱚᱵᱷᱟᱯᱚᱛᱤ ᱭᱟᱜ ᱢᱟ.ᱪᱤᱭ ᱥᱟᱡᱟᱣ ᱥᱚᱵᱷᱟ ᱠᱮᱜᱼᱟ ᱾ ᱱᱤᱭᱟ. ᱵᱷᱤᱛᱨᱤ ᱨᱮ ᱜᱟᱸᱫᱷᱤᱡᱤ ᱟᱨ ᱮᱴᱟᱜ ᱠᱩᱜ ᱥᱟᱶ ᱟ.ᱰᱤ ᱜᱟᱺᱦᱤᱨ ᱛᱮ ᱟᱯᱟᱲᱤᱥ ᱦᱩᱭ ᱮᱱᱟ ᱾ ᱡᱟᱦᱟᱸ ᱠᱷᱟ.ᱛᱤᱨ ᱤᱱᱟ. ᱥᱮᱨᱢᱟ ᱜᱮ ᱩᱱᱤ ᱠᱚᱸᱜᱨᱮᱥ ᱥᱚᱵᱷᱟᱯᱚᱛᱤ ᱠᱷᱚᱱ ᱥᱟᱦᱟᱭ ᱦᱟᱛᱟᱣ ᱠᱮᱜᱼᱟ ᱾ ᱱᱚᱶᱟ ᱛᱟᱭᱚᱢ ᱩᱱᱤ ᱯᱷᱚᱨᱣᱟᱰ ᱵᱞᱚᱠ ᱧᱩᱛᱩᱢᱟᱱ ᱢᱤᱫ ᱜᱟᱫᱮᱞ ᱮ ᱜᱚᱴᱷᱚᱱ ᱠᱮᱜᱼᱟ ᱾
ᱦᱟᱯᱛᱟᱠᱤᱭᱟ. ᱯᱷᱚᱨᱣᱟᱰ ᱵᱞᱚᱠ ᱵᱮᱣᱨᱟ ᱥᱟᱠᱟᱢ ᱨᱮᱭᱟᱜ ᱢᱤᱫ ᱚᱱᱚᱞ ᱠᱷᱟ.ᱛᱤᱨ ᱑᱙᱔᱐ ᱥᱟᱞᱮᱨᱮ ᱥᱩᱵᱟᱥ ᱫᱚ ᱵᱤᱪᱟ.ᱨ ᱟᱠᱷᱲᱟᱨᱮ ᱚᱱᱟ ᱨᱮᱭᱟᱜ ᱠᱟᱨᱚᱱ ᱞᱟ.ᱭ ᱦᱩᱭ ᱟᱫᱮ ᱛᱟᱦᱮᱸᱫ ᱾ ᱠᱩᱞᱤ ᱠᱩᱯᱩᱞᱤ ᱠᱷᱟ.ᱛᱤᱨ ᱡᱟᱢᱤᱱ ᱨᱮᱭ ᱛᱟᱦᱮᱸ ᱠᱟᱱ ᱵᱮᱲᱟᱨᱮ ᱩᱱᱤ ᱠᱚᱞᱠᱟᱛᱟ ᱨᱮ ᱢᱮᱱᱟᱜ ᱟᱡᱟᱜ ᱵᱟᱥᱟ ᱴᱷᱟᱶ ᱠᱷᱚᱱ ᱮ ᱟᱫ ᱞᱮᱱᱟ ᱾ ᱛᱟᱲᱟᱢ ᱠᱟᱛᱮ ᱠᱟᱵᱩᱞ ᱨᱮ ᱥᱮᱴᱮᱨᱚᱜ ᱞᱟ.ᱜᱤᱫ ᱮ ᱥᱟᱦᱟᱥ ᱞᱮᱜᱼᱟ ᱾ ᱤᱱᱟ. ᱛᱟᱭᱚᱢ ᱩᱱᱤ ᱥᱮᱱᱴᱨᱟᱞ ᱮᱥᱤᱭᱟ ᱟᱨ ᱢᱚᱥᱠᱚ ᱥᱮᱫᱛᱮ ᱡᱚᱨᱢᱟᱱᱤ ᱨᱮᱭᱟᱜ ᱨᱟᱡᱽᱜᱟᱲ ᱵᱚᱨᱞᱤᱱ ᱨᱮᱭ ᱥᱮᱴᱮᱨ ᱞᱮᱱᱟ ᱾ ᱚᱸᱰᱮ ᱩᱱᱤ ᱱᱟᱡᱤ ᱥᱚᱨᱠᱟᱨᱟᱜ ᱜᱚᱲᱚ ᱥᱚᱦᱚᱫ ᱛᱮ ᱥᱤᱧᱚᱛᱤᱭᱟ. ᱯᱟᱭᱠᱚ ᱠᱚ ᱤᱫᱤ ᱠᱟᱛᱮ ᱤᱸᱜᱽᱨᱟ.ᱡᱽ ᱠᱚᱣᱟᱜ ᱵᱤᱨᱩᱫᱷᱨᱮ ᱟᱡᱟᱫᱽ ᱦᱤᱸᱫᱽ ᱧᱩᱛᱩᱢᱟᱱ ᱢᱤᱫ ᱯᱟᱭᱠᱚ ᱜᱟᱫᱮᱞ ᱮ ᱜᱚᱲᱦᱚᱱ ᱠᱮᱜᱼᱟ ᱾ ᱫᱚᱥᱟᱨ ᱡᱮᱜᱮᱛ ᱦᱩᱞᱨᱮ ᱱᱟᱡᱤ ᱥᱚᱨᱠᱟᱨ ᱫᱚ ᱤᱸᱜᱽᱨᱟ.ᱡᱽ ᱨᱤᱱ ᱢᱤᱫ ᱵᱟ.ᱭᱨᱤᱭ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱠᱷᱟ.ᱛᱤᱨ ᱡᱚᱨᱢᱟᱱᱤ ᱯᱟᱦᱴᱟ ᱠᱷᱚᱱ ᱯᱟᱞᱮ ᱜᱮᱞ ᱤᱨᱟ.ᱞ ᱜᱮᱥᱟᱭ ᱜᱟᱱ ᱥᱤᱧᱚᱛᱤᱭᱟ. ᱯᱟᱭᱠᱚ ᱦᱩᱞ ᱨᱮᱭᱟᱜ ᱛᱚᱦᱚᱨ ᱟᱨ ᱦᱟ.ᱛᱤᱭᱟ.ᱨ ᱵᱮᱵᱷᱟᱨ ᱞᱟ.ᱜᱤᱫ ᱥᱮᱪᱮᱫ ᱠᱚ ᱟᱢᱮᱴ ᱠᱮᱜᱼᱟ ᱾
᱑᱙᱔᱓ ᱥᱟᱞᱮᱨᱮ ᱥᱩᱵᱷᱟᱥ ᱢᱤᱫ ᱡᱚᱨᱢᱟᱱ ᱞᱟ.ᱣᱠᱟ. ᱨᱮ ᱫᱚᱦᱲᱟ ᱛᱮ ᱟᱨᱦᱚᱸ ᱫᱚᱨᱮᱭᱟ ᱨᱮ ᱢᱤᱫ ᱵᱤᱯᱚᱫᱽ ᱛᱮ ᱯᱮᱨᱮᱡ ᱟᱠᱟᱱ ᱦᱚᱨ ᱮ ᱥᱟᱺᱜᱷᱟᱨ ᱠᱮᱜᱼᱟ ᱾ ᱵᱷᱟᱨᱚᱛ ᱢᱟᱦᱟ ᱥᱟᱜᱚᱨ ᱨᱮ ᱢᱤᱫ ᱡᱟᱯᱟᱱᱤ ᱡᱟᱦᱟᱡᱽ ᱟᱡ ᱮ ᱛᱟᱺᱜᱤ ᱞᱮᱫᱮᱭᱟ ᱾ ᱩᱱᱤ ᱱᱟᱯᱟᱭ ᱛᱮ ᱥᱤᱸᱜᱟᱯᱩᱨ ᱨᱮᱭ ᱥᱮᱴᱮᱨ ᱮᱱᱟ ᱾ ᱚᱸᱰᱮ ᱩᱱᱤ ᱡᱟᱯᱟᱱᱟᱜ ᱜᱚᱲᱚ ᱥᱚᱦᱚᱫ ᱫᱟᱨᱟᱭ ᱛᱮ ᱟᱡᱟᱫᱽ ᱦᱤᱸᱫᱽ ᱧᱩᱛᱩᱢᱟᱱ ᱫᱟᱲᱮ ᱛᱮ ᱯᱮᱨᱮᱡ ᱥᱮᱱᱟᱵᱟ.ᱦᱤᱱᱤᱭ ᱛᱤᱸᱜᱩ ᱠᱮᱜᱼᱟ ᱾ ᱱᱚᱶᱟ ᱛᱟᱭᱚᱢ ᱱᱩᱠᱩ ᱥᱮᱱᱟᱵᱟ.ᱦᱤᱱᱤ ᱟᱡᱟᱜ ᱟ.ᱭᱩᱨ ᱛᱮ ᱵᱷᱟᱨᱚᱛ ᱨᱮᱭᱟᱜ ᱮᱛᱚᱢᱼᱥᱟᱢᱟᱝ ᱥᱮᱦᱮᱫ ᱠᱷᱚᱱ ᱫᱤᱞᱞᱤ ᱥᱮᱫ ᱠᱚ ᱨᱮᱞᱟᱣ ᱮᱱᱟ ᱾ ᱩᱱᱠᱩ ᱫᱚ ᱢᱚᱬᱤᱯᱩᱨ ᱨᱮᱭᱟᱜ ᱤᱢᱯᱷᱟᱞ ᱫᱷᱟ.ᱵᱤᱡ ᱠᱚ ᱯᱟᱨᱚᱢ ᱦᱩᱭ ᱞᱮᱱᱟ, ᱤᱠᱷᱟ.ᱱ ᱡᱟᱯᱟᱱᱤᱭᱟ.ᱫᱚ ᱤᱸᱜᱽᱨᱟ.ᱡᱽ ᱠᱚ ᱥᱟᱶ ᱦᱩᱞ ᱨᱮᱠᱚ ᱦᱟᱨᱟᱣ ᱮᱱ ᱠᱷᱟᱱ ᱩᱱᱠᱩ ᱥᱟᱶ ᱠᱚ ᱯᱮᱲᱟᱭᱮᱱᱟ ᱾ ᱡᱟᱦᱟᱸ ᱠᱷᱟ.ᱛᱤᱨ ᱥᱩᱵᱷᱟᱥ ᱵᱳᱥ ᱫᱚ ᱟᱨ ᱡᱟᱯᱟᱱᱤᱭᱟ. ᱯᱟᱦᱴᱟ ᱠᱷᱚᱱ ᱜᱚᱲᱚ ᱵᱟᱭ ᱧᱟᱢ ᱞᱮᱜᱼᱟ ᱾ ᱱᱚᱶᱟ ᱛᱟᱭᱚᱢ ᱑᱙᱔᱕ ᱥᱟᱞᱮᱨᱮ ᱢᱤᱫ ᱡᱚᱴᱟᱣ ᱦᱚᱨᱤᱵᱩᱨ ᱨᱮᱦᱢᱟᱱ ᱥᱟᱶ ᱢᱤᱫ ᱩᱰᱟ.ᱣᱜ ᱜᱟ.ᱰᱤ ᱛᱮ ᱴᱳᱠᱤᱳ ᱠᱤᱱ ᱥᱮᱱᱚᱜ ᱠᱟᱱ ᱛᱟᱦᱮᱸᱱ, ᱤᱠᱷᱟ.ᱱ ᱦᱚᱨ ᱨᱮ ᱯᱷᱚᱢᱳᱡᱟ ᱫᱤᱯᱚ ᱨᱮ ᱩᱰᱟ.ᱣᱜ ᱜᱟ.ᱰᱤ ᱢᱤᱫ ᱮᱴᱠᱮᱴᱚᱬᱮᱭ ᱥᱟᱢᱟᱝ ᱠᱮᱜᱼᱟ ᱾ ᱱᱮᱛᱟᱡᱤᱭᱟᱜ ᱢᱩᱪᱟ.ᱫ ᱡᱤᱭᱚᱱ ᱱᱟᱜᱟᱢ ᱫᱚ ᱱᱤᱛᱚᱜ ᱫᱷᱟ.ᱵᱤᱡ ᱦᱚᱸ ᱥᱤᱧᱚᱛᱤᱭᱟ. ᱠᱚᱴᱷᱮᱱ ᱫᱚ ᱥᱟ.ᱨᱤ ᱛᱮᱫ ᱫᱚ ᱯᱚᱴᱚᱢ ᱠᱟᱛᱮ ᱜᱮ ᱛᱟᱦᱮᱸ ᱫᱚᱦᱚ ᱭᱮᱱᱟ ᱾
This article uses material from the Wikipedia ᱥᱟᱱᱛᱟᱲᱤ article ᱥᱩᱵᱷᱟᱥ ᱪᱚᱸᱫᱽᱨᱚ ᱵᱳᱥ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.