ᱡᱟᱦᱮᱨ ᱜᱟᱲ
ᱡᱟᱦᱮᱨ ᱜᱟᱲ ᱫᱚ ᱠᱷᱮᱨᱣᱟᱲ ᱜᱷᱩᱴ ᱥᱟᱱᱛᱟᱲ ᱠᱚᱣᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱵᱚᱸᱜᱟ ᱛᱷᱟᱱ ᱠᱟᱱᱟ ᱾ ᱟᱹᱛᱩ ᱠᱩᱞᱦᱤ ᱢᱩᱪᱟᱹᱫ ᱨᱮ ᱟᱹᱛᱩ ᱢᱚᱬᱮ ᱢᱟᱯᱟᱡᱤᱭᱟᱸᱛᱮ ᱵᱮᱨᱮᱫ ᱠᱚᱜᱼᱟ ᱾ ᱡᱟᱦᱮᱨ ᱜᱟᱲ ᱵᱚᱸᱜᱟ ᱛᱷᱟᱱ ᱯᱩᱨᱩᱵᱽ/ᱥᱟᱢᱟᱝ ᱥᱮᱦᱮᱫ/ᱟᱨᱵᱟᱝ ᱵᱮᱲᱟ ᱨᱟᱠᱟᱵ ᱯᱟᱦᱴᱟ ᱨᱮᱠᱚ ᱫᱚᱦᱚᱭᱟ ᱾ ᱡᱟᱦᱮᱨ ᱜᱟᱲ ᱛᱟᱞᱟ ᱨᱮᱫᱚ ᱥᱟᱨᱡᱚᱢ ᱫᱟᱨᱮ ᱜᱟᱡᱟᱲ ᱯᱮᱨᱮᱡ ᱠᱚᱜᱼᱟ ᱾ ᱡᱟᱦᱮᱨ ᱨᱮᱫᱚ ᱢᱟᱨᱟᱝ ᱵᱳᱨᱳ, ᱡᱟᱦᱮᱨ ᱟᱭᱳ, ᱞᱤᱴᱟᱹ ᱜᱳᱥᱟᱸᱭ ᱥᱟᱶᱛᱮ ᱥᱤᱢᱟᱹ ᱥᱟᱲᱮ ᱵᱚᱸᱜᱟ ᱵᱳᱨᱳ ᱠᱚᱠᱚ ᱨᱟᱠᱟᱵ ᱛᱷᱟᱯᱚᱱ ᱠᱚᱜᱼᱟ ᱾ ᱡᱟᱦᱮᱨ ᱜᱟᱲ ᱫᱚ ᱟᱹᱰᱤ ᱥᱚᱱᱚᱛ ᱱᱤᱨᱚᱲ ᱴᱷᱟᱶ ᱠᱟᱱ ᱛᱟᱵᱚᱱᱟ ᱾ ᱱᱚᱱᱰᱮ ᱵᱚᱝᱜᱟᱭᱤᱡ ᱦᱚᱲ ᱫᱚ 'ᱱᱟᱭᱠᱮ' ᱠᱚ ᱢᱮᱛᱟᱭᱟ, ᱱᱩᱭ ᱜᱮ ᱱᱚᱱᱰᱮᱱ ᱥᱟᱱᱟᱢ ᱵᱚᱸᱜᱟ ᱠᱚᱭ ᱯᱮᱨᱮᱡ ᱩᱢᱟᱹᱲ ᱠᱚᱣᱟ/ᱵᱚᱸᱜᱟ ᱟᱠᱚᱣᱟ ᱾ ᱡᱟᱦᱮᱨ ᱛᱟᱞᱟ ᱛᱮ ᱦᱚᱨ ᱵᱮᱱᱟᱣ ᱵᱟᱝ ᱜᱟᱱᱚᱜᱼᱟ, ᱟᱺᱭᱴᱷᱟᱹ ᱡᱩᱴᱷᱟᱹ, ᱚᱡᱽᱨᱟ ᱡᱚᱵᱽᱨᱟ ᱠᱟᱛᱮ ᱡᱟᱦᱮᱨ ᱵᱷᱤᱛᱨᱤ ᱵᱚᱞᱚᱱ ᱵᱟᱝ ᱜᱟᱱᱚᱜᱼᱟ ᱾ ᱠᱩᱲᱤ ᱦᱚᱯᱚᱱ ᱠᱚ ᱵᱟᱝ ᱜᱟᱱᱚᱜ ᱚᱠᱛᱚ ᱨᱮ ᱡᱟᱦᱮᱨ ᱵᱚᱞᱚᱱ ᱫᱚ ᱢᱟᱱᱟ ᱜᱮᱭᱟ ᱾
ᱛᱤᱱ ᱞᱮᱠᱟᱱ ᱡᱟᱦᱮᱨ
ᱡᱟᱦᱮᱨ ᱫᱚ ᱯᱮ ᱞᱮᱠᱟᱱᱟ ᱾ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ :- ᱑. ᱥᱤᱧ ᱵᱤᱨ ᱡᱟᱦᱮᱨ ᱾ ᱒. ᱢᱟᱱ ᱵᱤᱨ ᱡᱟᱦᱮᱨ ᱾ ᱓. ᱢᱟᱫᱮ ᱵᱤᱨ ᱡᱟᱦᱮᱨ ᱾
ᱱᱚᱶᱟ ᱠᱚ ᱢᱟ.ᱫᱽᱨᱮ ᱟᱵᱚᱣᱟᱜ ᱢᱩᱲᱩᱛ ᱡᱟᱦᱮᱨ ᱫᱚ ᱦᱩᱭᱩᱜ ᱠᱟᱱᱟ ᱥᱤᱧᱵᱤᱨ ᱡᱟᱦᱮᱨ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱫᱚ ᱟᱹᱛᱩ ᱯᱤᱪᱷᱤ ᱡᱟᱦᱮᱨ ᱛᱟᱦᱮᱸᱱᱟ ᱾ ᱡᱟᱦᱮᱨ ᱜᱟᱲ ᱵᱚᱸᱜᱟ ᱛᱷᱟᱱ ᱨᱮᱫᱚ ᱟᱹᱛᱩ ᱢᱚᱬᱮ ᱢᱟᱯᱟᱧᱡᱤ ᱟᱨ ᱵᱚᱸᱜᱟ ᱵᱳᱨᱳ ᱦᱚᱛᱮᱛᱮᱭ ᱵᱟᱪᱷᱚᱱ ᱟᱠᱟᱱ ᱱᱟᱭᱠᱮ ᱵᱟᱵᱟ ᱜᱮᱭ ᱵᱚᱸᱜᱟ ᱵᱳᱨᱳᱭᱟ ᱾ ᱡᱟᱦᱮᱨ ᱜᱟᱲ ᱨᱮ ᱢᱟᱱᱟᱣᱜ ᱠᱟᱱ ᱡᱚᱛᱚ ᱠᱷᱚᱱ ᱢᱟᱨᱟᱝ ᱵᱚᱸᱜᱟ ᱠᱚᱣᱟᱜ ᱯᱟᱨᱟᱵᱽ ᱫᱚ ᱵᱟᱦᱟ ᱵᱚᱸᱜᱟ ᱠᱟᱱᱟ ᱾ ᱵᱟᱦᱟ ᱵᱚᱸᱜᱟ ᱫᱚ ᱯᱷᱟᱹᱜᱩᱱ ᱵᱚᱸᱜᱟ ᱨᱮ ᱦᱩᱭᱩᱜᱼᱟ ᱾ ᱚᱱᱟ ᱥᱟᱶᱛᱮ ᱢᱟᱜᱽ ᱵᱚᱸᱜᱟ ᱨᱮ ᱢᱟᱜ ᱢᱚᱬᱮ ᱦᱚᱸ ᱡᱟᱦᱮᱨ ᱛᱷᱟᱱ ᱨᱮᱜᱮ ᱵᱚᱱ ᱵᱚᱸᱜᱟ ᱵᱳᱨᱳᱭᱮᱜᱼᱟ ᱾
ᱥᱤᱧᱵᱤᱨ ᱡᱟᱦᱮᱨ
ᱥᱤᱧᱵᱤᱨ ᱡᱟᱦᱮᱨ ᱫᱚ ᱟᱹᱛᱩ ᱨᱮᱱᱟᱜ ᱥᱤᱸᱜᱤ ᱨᱟᱠᱟᱵ ᱥᱮᱦᱮᱫ ᱨᱮ ᱛᱟᱦᱮᱸᱱᱟ ᱾ ᱟᱨ ᱵᱟᱝ ᱠᱷᱟᱱ ᱟ.ᱛᱩ ᱨᱮᱱᱟᱜ ᱠᱚᱧᱮ ᱯᱟᱦᱴᱟ ᱨᱮ ᱛᱟᱦᱮᱸᱱᱟ ᱾ ᱱᱚᱶᱟ ᱡᱟᱦᱮᱨ ᱨᱮᱫᱚ ᱢᱩᱲᱩᱛ ᱞᱮᱠᱟᱛᱮ ᱡᱟᱦᱮᱨ ᱟᱭᱳ ᱜᱮ ᱢᱟᱹᱱ ᱮ ᱧᱟᱢᱟ ᱾ ᱚᱱᱟ ᱥᱟᱶᱛᱮ ᱞᱤᱴᱟᱹ, ᱢᱚᱬᱮ ᱠᱚ, ᱛᱩᱨᱩᱭ ᱠᱚ ᱮᱢᱟᱱ ᱵᱚᱸᱜᱟ ᱵᱳᱨᱳ ᱠᱚᱵᱚᱱ ᱯᱮᱨᱮᱡ ᱩᱢᱟᱹᱬ ᱠᱚᱣᱟ ᱾ ᱟᱵᱚᱣᱟᱜ ᱥᱟᱱᱟᱢ ᱫᱩᱠ ᱚᱸᱰᱮ ᱵᱚᱱ ᱞᱟᱹᱭ ᱛᱟᱵᱚᱱᱟ ᱟᱨ ᱩᱱᱠᱩ ᱵᱚᱸᱜᱟ ᱵᱳᱨᱳ ᱦᱚᱛᱮᱛᱮ ᱜᱮ ᱟᱵᱚᱣᱟᱜ ᱥᱟᱱᱟᱢ ᱵᱷᱟᱹᱞᱟᱹᱭ ᱦᱩᱭᱩᱜ ᱠᱟᱱᱟ ᱾ ᱟᱹᱛᱩ ᱨᱮ ᱨᱚᱜᱟᱜ ᱵᱷᱤᱜᱤᱱᱟᱹᱜ ᱥᱚᱲᱚ ᱵᱚᱞᱚ ᱞᱮᱱ ᱠᱷᱟᱱ ᱚᱸᱰᱮ ᱱᱟᱭᱠᱮ ᱚᱛᱟ ᱛᱟᱵᱮᱨ ᱟᱛᱮ ᱫᱟᱜ ᱠᱚᱭ ᱫᱚᱲᱚᱢ ᱵᱟᱲᱟ ᱞᱮᱠᱷᱟᱱ ᱜᱮ ᱥᱟᱱᱟᱢᱟᱜ ᱫᱩᱠ ᱛᱟᱵᱚ ᱥᱟᱦᱟ ᱪᱟᱵᱟ ᱩᱛᱟᱹᱨᱚᱜᱼᱟ ᱾
ᱚᱱᱟᱛᱮ ᱴᱷᱟᱹᱣᱠᱟᱹ ᱢᱮᱱ ᱞᱮᱠᱷᱟᱱ ᱜᱟᱱᱚᱜᱼᱟ ᱵᱟᱝ ᱢᱟ ᱚᱱᱟ ᱥᱤᱧᱵᱤᱨ ᱡᱟᱦᱮᱨ ᱨᱮᱫᱚ ᱟᱵᱚᱣᱟᱜ ᱡᱤᱣᱤ ᱵᱚ ᱫᱚᱦᱚ ᱟᱠᱟᱜᱼᱟ ᱚᱸᱰᱮ ᱜᱮ ᱟᱵᱚᱣᱟᱜ ᱡᱤᱣᱤ ᱫᱚᱦᱚ ᱧᱟᱢᱚᱜ ᱦᱚᱨ ᱫᱚ ᱾ ᱚᱱᱟ ᱜᱮ ᱫᱷᱚᱨᱚᱢ ᱟᱨ ᱚᱸᱰᱮ ᱜᱮ ᱫᱷᱚᱨᱚᱢ ᱛᱷᱟᱱ ᱛᱟᱵᱚ ᱫᱚ ᱾ ᱚᱱᱟ ᱡᱟᱦᱮᱨ ᱛᱷᱟᱱ ᱨᱮᱜᱮ ᱟᱵᱚ ᱫᱚ ᱥᱮᱨᱢᱟ ᱨᱮ ᱢᱟᱜᱽ, ᱵᱟᱦᱟ, ᱮᱨᱚᱜ ᱥᱤᱢ, ᱦᱟᱹᱨᱭᱟᱹᱲ ᱥᱤᱢ (ᱟᱹᱥᱟᱹᱲᱤᱭᱟᱹ) ᱮᱢᱟᱱ ᱠᱚᱵᱚ ᱵᱚᱸᱜᱟ ᱵᱳᱨᱳᱜᱼᱟ ᱾ ᱟᱨ ᱢᱚᱬᱮ ᱥᱮᱨᱢᱟ ᱨᱮ ᱢᱤᱫ ᱫᱷᱟᱣ ᱢᱟᱜ ᱢᱚᱬᱮ ᱢᱟᱨᱟᱝ ᱫᱚᱥᱚᱱ ᱫᱚ ᱵᱚᱱ ᱵᱚᱸᱜᱟᱭᱟ ᱾
ᱥᱟᱹᱠᱷᱭᱟᱹᱛ
ᱵᱟᱨᱦᱮ ᱡᱚᱱᱚᱲ
This article uses material from the Wikipedia ᱥᱟᱱᱛᱟᱲᱤ article ᱡᱟᱦᱮᱨ ᱜᱟᱲ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.